“Ronaldo or Messi?” ឬ “Messi or Ronaldo?” ជាសំណួរដែលត្រូវបានគេសួរមិនចេះចប់មិនចេះហើយទៅកាន់បុគ្គលសំខាន់ៗ ឬអ្នកជំនាញបាល់ទាត់នានាក្នុងកន្លះទសវត្សចុងក្រោយនេះ។ មិនត្រឹមតែប៉ុណ្ណោះទេ សំណួរនេះក៏ត្រូវបានអ្នកមើលបាល់ទាត់ក្នុងលោក ដេញដោលគ្នាយ៉ាងតានតឹងផងដែរ។ តើការប្រៀបធៀបរកអ្នកខ្លាំងជាង រវាងកីឡាករកំពូលទាំង២នេះ នឹងបន្តដល់ពេលណាទៀត?
រូប Ronaldo និង Messi ត្រូវបានគេដាក់រួមគ្នាធ្វើរូបភាព Wallpaper (ប្រភព៖ football-cover)
ប្រាកដណាស់ថាកីឡាករទាំងពីរ សុទ្ធតែជាកីឡាករកំពូលដូចគ្នា ពោលគឺមានជំនាញ និងសមត្ថភាពលេចធ្លោជាងកីឡាករឯទៀតក្នុងលោកនារយៈពេលប៉ុន្មានឆ្នាំចុងក្រោយនេះ។
ជាក់ស្ដែង កាលពីខែមុន ប្រធាន FIFA លោក Sepp Blatter ក៏ត្រូវបានគេសួរពេលផ្ដល់បទសម្ភាសន៍នៅ Oxford Union ថា Messi ឬ Ronaldo ដែរ។ ការឆ្លើយតបទៅនឹងសំណួរនោះហើយ ដែលធ្វើឲ្យលោក Blatter ត្រូវក្រុមអ្នកគាំទ្រ Ronaldo ក៏ដូចជាអ្នកមើលបាល់ជាច្រើនរិះគន់លោកយ៉ាងចាស់ដៃ។
ចំណែកកាលពីម្សិលមិញនេះវិញ លោក Arsene Wenger អ្នកចាត់ការក្លិប Arsenal ក៏ត្រូវបានគេសួរសំណួរដូចគ្នានេះដែរ នៅក្នុងកម្មវិធីសំណួរ/ចម្លើយតាមបណ្ដាញសង្គម Twitter របស់កាំភ្លើងធំ ទាំងលោកមិនធ្លាប់ជាប់ទាក់ទងខ្លាំងនឹងកីឡាករទាំងពីររូបផងនោះ។ ឆ្លើយទៅកាន់សំណួរនោះ អ្នកចាត់ការ សញ្ជាតិបារាំង វ័យ៦៤ឆ្នាំ បានឆ្លើយថា៖ “Messi នៅកំពូលគេរហូតដល់បច្ចុប្បន្ន ប៉ុន្តែនៅឆ្នាំនេះ Ronaldo កំពុងនាំមុខ”។
ងាកទៅមើលអ្នកគាំទ្រពួកគេទាំងពីរវិញ រឹតតែក្ដៅគគុកខ្លាំងជាងនេះទៀត ក្នុងការបញ្ចេញមតិយោបល់លើកម្ខាង បង្អាប់ម្ខាង ទាំងក្នុងគេហទំព័រកីឡានានាជុំវិញពិភពលោក ក៏ដូចជាតាមបណ្ដាញសង្គម Facebook ក៏ដូចជា Twitter។ យ៉ាងណាក្ដី ក្នុងចំណោមនោះ ក៏មានអ្នកលើកថាកីឡាករទាំងពីរសុទ្ធតែល្អដូចគ្នា ឬល្អម្យ៉ាងម្នាក់នោះដែរ ហើយពួកគេទាំងពីរសុទ្ធតែជាវីរបុរសបាល់ទាត់សម័យបច្ចុប្បន្ន។
ជំនួប El Clasico ប៉ុន្មានឆ្នាំចុងក្រោយ ក៏អ្នកទាំងពីរត្រូវបានគេដាក់រួមគ្នាដែរ (រូបភាព៖ bubblews)
ដូចដែលប្រិយមិត្តបានដឹងហើយថា កីឡាករព័រទុយហ្គាល់ ពាក់លេខ៧ នៅ Real Madrid ជាម្ចាស់ពានរង្វាន់បាល់មាសឆ្នាំ២០០៨ ខណៈគូប្រជែងជនជាតិអាហ្សង់ទីន ពាក់លេខ១០ នៅ Barcelona គឺជាម្ចាស់ពាននេះ៤ឆ្នាំចុងក្រោយជាប់គ្នា ពោលគឺចាប់ពី២០០៩មក។ ដោយឡែកនៅឆ្នាំ២០១៣នេះវិញ ពួកគេទាំងពីរ នៅតែស្ថិតក្នុងចំណោមបេក្ខភាពទាំង២៣ដើម្បីដណ្ដើមពាននេះទៀត ដែលធ្វើឲ្យការយកអ្នកទាំងពីរមកធៀបគ្នា កាន់តែលេចឡើងខ្លាំងឡើងៗ។
សម្រាប់ប្រិយមិត្តវិញ យល់យ៉ាងណាដែរចំពោះការយកកីឡាករទាំងពីរមកធៀបគ្នាមិនចេះចប់បែបនេះ? បើត្រូវបានគេសួរថា រវាង Messi និង Ronaldo មួយណាខ្លាំងជាង តើប្រិយមិត្តនឹងឆ្លើយយកមួយណា ឬក៏យកទាំងពីរ?
អត្ថបទទាក់ទង៖
- Ronaldo បាញ់ប្រធាន FIFA ឈឺៗ តាម Facebook
- Messi ក្លាយជាកីឡាករទី១ អាចធ្វើហ៊ែតទ្រីក៤ដងនៅ Champions League
- ប្រៀបធៀប Messi និង Ronaldo តិចមើល៍ មុនជំនួប El Clasico មកដល់
- តើ Messi ឬ Ronaldo ឈ្នះ Ballon d’Or ឆ្នាំនេះ?
អត្ថបទ៖ សុខ សុវត្ថិ
0 comments:
Post a Comment