គ្រូបង្វឹករបស់កីឡាករ Manny Pacquiao លោក Freddie Roach និយាយថាលោកនឹងឱ្យ Pacquiao ចូលនិវត្តន៍ពីអាជីពប្រដាល់ប្រសិនបើជើងខ្លាំងសញ្ជាតិហ្វីលីពីនរូបនេះរងបរាជ័យធ្ងន់ទៀតពេលប៉ះកីឡាករ Brandon Rios នៅម៉ាកាវនាថ្ងៃទី២៤ ខែវិច្ឆិកានេះ។
អត្ថបទ៖ ក្រោយផ្ដួល Marquez ជើងខ្លាំងអាមេរិកបើកទ្វារជានិច្ចដើម្បីឱ្យ Pacquiao សងសឹក
លោក Roach បានលើកទឹកចិត្តឱ្យ Pacquiao ផ្ដួល Rios ត្រឹមទឹកទី៥ឬទី៦នៅចុងសប្ដាហ៍ក្រោយក្នុងជំនួបដណ្ដើមខ្សែក្រវាត់ WBO welterweight។ ប៉ុន្តែប្រសិនបើអ្វីៗមិនដំណើរការដូចការគ្រោងទុកទេ ពោលគឺចាញ់ជាលើកទី៣ជាប់ៗគ្នាក្នុងការឡើងសង្វៀន៣លើកចុងក្រោយនោះ គ្រូបង្វឹកសញ្ជាតិអាមេរិកវ័យ៥៣ឆ្នាំដ៏ល្បីល្បាញរូបនេះមិនស្ទាក់ស្ទើរឡើយក្នុងការប្រាប់ Pac-man ឱ្យលាលែងពីអាជីពដើម្បីយកពេលប្រឡូកក្នុងឆាកនយោបាយពេញលេញ ឬធ្វើអ្វីផ្សេងៗទៀត។
អតីតជយលាភីគ្រូបង្វឹកឆ្នើមជាងគេប្រចាំឆ្នាំ២០០៣,២០០៦,២០០៨,២០០៩ និង ២០១០ បញ្ជាក់ថា៖ “ប្រសិនបើខ្ញុំមើលឃើញថាគេចាប់ផ្ដើមធ្លាក់ចុះខ្សោយហើយវាយអន់នោះ ខ្ញុំជាអ្នកទី១ដែលត្រូវនិយាយប្រាប់គេ។ ពួកយើងមានកិច្ចសន្យាមួយដែលកំណត់ថាគេ (Pacquiao) នឹងចូលនិវត្តន៍ប្រសិនបើខ្ញុំប្រាប់ឱ្យគេធ្វើបែបនោះ។ យ៉ាងណាក្ដី បច្ចុប្បន្ននេះខ្ញុំមិនឃើញគេធ្លាក់ចុះខ្សោយឡើយ ផ្ទុយទៅវិញគេកំពុងហ្វឹកហាត់បានយ៉ាងល្អ។ គេកំពុងអន្ទះសាចង់ឡើងរេញប្រដាល់យ៉ាងខ្លាំង”។
អត្ថបទ៖ Floyd នៅតែមិនទាន់មានអ្នកណាផ្ដួលបានដដែល
Pacquiao ដែលនឹងឈានដល់វ័យ៣៥ឆ្នាំក្នុងខែធ្នូចុងឆ្នាំនេះ ខានឡើងវាយជិតមួយឆ្នាំមកហើយ គឺតាំងពីក្រោយពេលត្រូវកីឡាករសញ្ជាតិម៉ិកស៊ីកូ Juan Manuel Marquez ផ្ដួលឱ្យសន្លប់ក្នុងទឹកទី៦នៅទីក្រុង Las Vegas ក្នុងខែធ្នូឆ្នាំមុន។ មុនចាញ់ Marquez កន្លះឆ្នាំ កីឡាករដែលធ្លាប់ឈ្នះជើងឯកពិភពលោក៨ប្រភេទទម្ងន់ផ្សេងគ្នា ក៏បានចាញ់ Timothy Bradley ផងដែរ ប៉ុន្តែចាញ់ទាំងចម្រូងចម្រាស។
ប្រសិនបើលើកនេះ Pacquiao ស្ដារមុខមាត់បានវិញ និយាយឱ្យចំគឺយកឈ្នះ Rios បាននោះ ជំនួបសងសឹកជាមួយ Marquez នឹងកើតមានឡើងម្ដងទៀត ក៏ដូចជាការល្បងសមត្ថភាពជាមួយ Floyd Mayweather, Jr ផងដែរ៕
0 comments:
Post a Comment