ជើងខ្លាំងវ័យក្មេងកម្ពុជា រឿង សោភ័ណបានផ្ដួលជើងខ្លាំងវ័យក្មេងថៃ Rarong Kaeongam ឲ្យសន្លប់ក្នុងទឹកទី៣ដែលបានក្លាយជាការប្រកួតដ៏ជក់ចិត្តបំផុតដល់អ្នកគាំទ្រនៅសង្វៀន TV3 កាលពីល្ងាចថ្ងៃអាទិត្យម្សិលមិញ។
អត្ថបទពាក់ព័ន្ធ៖ រំចង់, សោភ័ណ្ឌ និងរ៉ាឌី នរណាជាជើងខ្លាំងក្នុងចិត្តអ្នក?
អ្នកក្បាច់ចម្រុះរឿង សោភ័ណ និងកីឡាករថៃ Rarong Raeongam ដែលសុទ្ធតែមានបទពិសោធន៍នៅលើសង្វៀនប្រដាល់ជាង៨០ដងដូចគ្នាបានបើកការប្រយុទ្ធយ៉ាងចាស់ដៃតាំងពីទឹកទីមួយ។ អ្នកលេងឆ្លងដែនបានទាត់ផ្កាប់ចានគួរឲ្យចាប់អារម្មណ៍លើករបស់ម្ចាស់ផ្ទះ ប៉ុន្តែអ្វីដែលចាប់អារម្មណ៍បំផុតនោះក្នុងទឹកដំបូងនេះកីឡាករម្ចាស់ស្រុកបានបញ្ចេញកណ្ដាប់ឆ្វេងពេញទំហឹងលើផ្ទៃមុខភ្ញៀវបណ្ដាលឲ្យដួលអុកគូថ លោកអាជ្ញាកណ្ដាលបានរាប់ដល់៨ តែកីឡាករថៃអាចក្រោកតស៊ូបន្តទៀតបាន។
នៅទឹកទីពីរពួកគេបានវ៉ៃគួរឲ្យញញើត ខណៈសោភ័ណបានគ្រប់ដណ្ដប់។ ការចេញស្នៀតទាត់ និងកែងរបស់កីឡាករថៃបានធ្វើឲ្យអ្នកគាំទ្រស្រៀវខ្នងជំនួសកីឡាករខ្មែរ។ ទោះជាយ៉ាងសោភ័ណនៅតែកៀបសង្កត់ដដែលដោយរន្ទះជើង កណ្ដាប់ដៃឆ្វេង និងកែង។
អត្ថបទពាក់ព័ន្ធ៖ អតីតកីឡាករល្បីឈ្មោះ ឡឹក វិបុល ជា«អនុសេនីយ៍ឯក»
ទឹកទីបីកីឡាករផ្ញៀវត្រូវបានអាជ្ញាកណ្ដាលរាប់៨ពីរដង និងបញ្ឈប់ការប្រកួតតែម្ដងបន្ទាប់ពីកីឡាករដួលជាលើកទីបី។ រឿង សោភ័ណបានរន្ថើនជើងបន្តិចៗនិងបានហក់ចូលវ៉ៃកណ្ដាប់ដៃឆ្វេងចំពេញផ្ទៃមុខ Rarong នាំឲ្យលោកអាជ្ញាកណ្ដាលរាប់ដល់៨។ បន្ទាប់មកសោភ័ណបានទាត់ជើងឆ្វេងចំកណ្ដៀតក្អមកីឡាករថៃបណ្ដាលឲ្យ និងត្រូវអាជ្ញាកណ្ដាលរាប់៨ជាលើកទីពីរ។ ទីបំផុតសោភ័ណបានវាយពីរកន្លែងបណ្ដាលឲ្យកីឡាករថៃសន្លប់ក្រោកលែងរួចតែម្ដង។
ការប្រកួតមិត្តភាពអន្តរជាតិនៅTV3កាលពីម្សិលមិញផងដែរ ឡុង សុភីស្ទើរតែវាយកីឡាករអ៊ីរ៉ង់ Behzad Mohammad ឲ្យសន្លប់ក្នុងទឹកទី៥ទៅហើយបន្ទាប់ពីត្រូវបានរាប់ពីរដង ប៉ុន្តែសុភីហាក់ប្រោសប្រណីដើម្បីឈ្នះពិន្ទុប៉ុណ្ណោះ។ ចំណែកគូពិសេសក្នុងស្រុក រឿម វណ្ណៈ ឈ្នះពិន្ទុ វ៉ាន់ ចាន់វ៉េត៕
0 comments:
Post a Comment