ការប្រកួតប្រដាល់អន្តរជាតិដ៏ធំដែលគេប្រសិទ្ធនាមថា King of The Ring ដែលកំពុងទាញឲ្យអ្នកនិយមប្រដាល់ជាតិទន្ទឹងរង់ចាំនឹងចូលមកដល់នៅយប់ថ្ងៃទី២៩វិច្ឆិកាចុងខែនេះលើរេញ ស៊ីធីអិន ចាប់ពីម៉ោង៦ល្ងាចទៅ ដោយនឹងមានផ្សាយផ្ទាល់តាមប៉ុស្តិ៍មួយនេះផងដែរ។
ថ្វីបើគូប្រកួតក៏ដូចជាសមាសភាពកីឡាករបរទេសយើងខ្ញុំនៅមិនទាន់ទទួលបានក៏ពិតមែន តែតាមការអះអាងរបស់លោក ម៉ា សេរី ប្រធានកម្មវិធីកីឡាប៉ុស្តិ៍ស៊ីធីអិន ថាមានការប្រកួតអន្តរជាតិ៦គូ។ ក្នុងនោះមានកីឡាករខ្មែរ២រូបដែរគឺជើងខ្លាំងទម្ងន់៧០គីឡូក្រាម ភេឌី ម៉ឺនសុភា ដែលនៅមិនទាន់ច្បាស់ថាជួបនរណានៅឡើយ តែ ពៅ ស័ក្ដិសិទ្ធិ នឹងប្រឈមមុខជាមួយកីឡាករខ្លាំងជនជាតិ អាមេរិក។ ”ដំបូងឡើយយើងថាដាក់ វ៉ន វីវ៉ា ឲ្យប៉ះ Thomas របស់អង់គ្លេសតែ វីវ៉ា គេជាប់ហ្វឹកហាត់ត្រៀម ស៊ីហ្គេម ដូច្នេះប្ដូរឲ្យ ម៉ឺនសុភា ហើយខាងអន្តរជាតិគេមិនទាន់ឲ្យដំណឹងថាដៃគូ ម៉ឺនសុភា ជានរណានៅឡើយ គេថាប្រាប់ថ្ងៃហ្នឹងតែអត់ឃើញ។ ទាំងនេះជាការរៀបរាប់បន្ថែមរបស់អ្នកគ្រប់គ្រងខាងលើ។
លោក សេរី ឲ្យដឹងទៀតថា ក្រៅពីកីឡាករខ្មែរ២នាក់ខាងលើនេះ នៅមានកីឡាករ៤នាក់ផ្សេងទៀតមកពីប្រទេសនានាក្នុងតំបន់អាស៊ាន។ ថ្វីបើលោកមិនលម្អិតពីគោលបំណងនៃកម្មវិធីក៏ពិតមែន តែកីឡាករសរុបទាំង៦នាក់នោះ នឹងត្រូវចាប់គូឲ្យប៉ះដៃគូមកពី អន្តរជាតិ ពោលកីឡាករ៦នាក់នៃតំបន់អាស៊ាន រាប់ទាំង២នាក់របស់កម្ពុជា ត្រូវទទួលកីឡាករបរទេសរៀងៗ លើរេញតែមួយ។
ដោយឡែកប្រភពបន្ថែមថា សំបុត្រចូលរួមទស្សនាមានតម្លៃ ២ដុល្លារ ៥ដុល្លារ និងសំបុត្រ VIP តម្លៃ២៥ដុល្លារដែលមានរៀបចំជួននូវអាហារ ភេសជ្ជៈ និងស្រាជាដើម កំឡុងពេលអង្គុយទស្សនាការប្រកួត៕
0 comments:
Post a Comment