អ្នកគាំទ្របាល់ទាត់ខ្មែរបានថប់ដង្ហើម និងតឹងទ្រូងមិនស្ទើរកាលពីម្សិលមិញសម្រាប់ការប្រកួតរវាងក្រុមម្ចាស់ផ្ទះ U23 កម្ពុជា និងភ្ញៀវ U23 ឡាវក្នុងការបញ្ចប់វគ្គជម្រុះពូលBនៃព្រឹត្តិការណ៍BIDC Cup 2013។
មុនអ្នកនឹងស្ដាប់មតិយោបល់របស់អ្នកជំនាញបាល់ទាត់ខ្មែរក៏ដូចជាគ្រូបង្វឹកនៃក្រុមនីមួយៗ ប្រិយមិត្តសូមស្ដាប់ការរិះគន់របស់អ្នកគាំទ្រដែលបានរអ៊ូរទាំអំឡុងពេលទស្សនាការប្រកួតរបស់កម្ពុជាកាលពីម្សិល។
អត្ថបទពាក់ព័ន្ធ៖ “ខ្មែរស្រលាញ់ខ្មែរ ខ្មែរជួយខ្មែរ” គួរណាស់តែស្ដែងឡើងនៅ BIDC Cup
អ្នកគាំទ្រជាច្រើនរាប់ពាននាក់បានរអ៊ូរទាំ និងមិនពេញចិត្តនឹងទម្រង់លេងរបស់កីឡាករកម្ពុជាឡើយ ខណៈក្រុមភ្ញៀវត្រូវបានកាត់ក្រហមបណ្ដេញកីឡាករម្នាក់ហើយ ក៏ក្រុមកម្ពុជានៅតែបណ្ដែតបណ្ដោយឱកាសឲ្យកីឡាករឡាវវាយសម្រុកបានតាមអំពើចិត្តរហូតបាននាំមុខកម្ពុជាដល់ទៅពីរដងដែលជាហេតុធ្វើឲ្យគាំទ្រតឹងទ្រូងស្ទើរប្រេះ។
បុរសម្នាក់ដែលពេលខ្លះក្រោកឈរ ពេលខ្លះអង្គុយ ហើយពេលខ្លះយកក្រដាសបោកចោលនឹងដីបាននិយាយថា ម៉េចពួកឯង(កីឡាករ)ជាហេតុជាសេដ្ឋីមែនបានជាលេងដូចឆ្គួតអីចឹង។ គេកាត់ក្រហមអស់កីឡាករម្នាក់ហើយ មិនវាយសម្រុក ឬកៀបសង្កត់គេទេ ពេលគេបានបាល់ចេញពីកណ្តាលទីឆ្ពោះទៅមុខរបស់ខ្លួននោះ។ គួរណាស់តែចូលទៅកៀបសង្កត់ទៅដើម្បីកុំឲ្យគេទាញបាល់ចូលទៅមុខទីកម្ពុជាបានចិត្ត។
អត្ថបទ៖ ហេតុអ្វីក្រុមបាល់ទាត់កម្ពុជាចាញ់ថៃចាស់ដៃម្ល៉េះពេលជួបគ្នាម្តងៗ?
បុរសម្នាក់បានប្រាប់ថាឈ្មោះ ឃឿន មកពីគីឡូម៉ែត្រលេខ៦បាននិយាយថា គាត់តឹងចិត្តនឹងទម្រង់លេងរបស់កម្ពុជាខ្លាំងណាស់។ ពេលក្រុមកម្ពុជាជួបក្រុមខ្លាំងដូចជាម៉ាឡេស៊ីលេងបានល្អគួរសម ប៉ុន្តែពេលប៉ះជាមួយឡាវដែលពុំសូវខ្លាំងសោះ កីឡាករក៏កម្ពុជាលេងរឹតតែអន់។
ឃឿងនិយាយថា ៖«ខ្សែការពារអន់ណាស់ ធ្វើប្រហែសឲ្យគេទាត់ចូលយ៉ាងស្រូល។ ខ្ញុំថប់ដង្ហើមខ្លាំងណាស់ ស្ទើរអង្គុយមើលមិនកើត។ កីឡាករខ្មែរលេងមួយប៉ះៗ និងលេងមួយៗដើម្បីហែកកម្លាំងគេ។ ពេលជួបថៃ បើលេងរបៀបនេះមិនដឹងជាទៅជាយ៉ាងណាទេ»។
បុរសម្នាក់ទៀតដែលបានឃើញកំហុសរបស់កីឡាករកម្ពុជាលេងជាមួយម៉ាឡេស៊ីកាលពីសប្តាហ៍មុន ប៉ុន្តែមិនបញ្ចេញមតិ។ កាលលោកនៅមិនសុខក៏បង្ហាញអារម្មណ៍ពីការគាំទ្ររបស់គាត់ និងកំហុសរបស់កីឡាករខ្មែរដល់Sabay។
លោកប្រាប់ថាឈ្មោះ វិជ្ជានៅទីក្រុងភ្នំពេញបានសុំច្បាប់ពីកន្លែងការងារដើម្បីបានចេញមកទស្សនាការប្រកួតបាល់ទាត់របស់កម្ពុជា។ លោកនិយាយថា ការប្រកួតនេះលទ្ធផលមិនគួរស្មើសោះឡើយ ខណៈក្រុមឡាវកាតក្រហមម្នាក់។ កុំឡើយនិយាយដល់ធ្លាប់មើលកីឡាបាល់ទាត់ ឬអ្នកជំនាញ សូម្បីមនុស្សធម្មតាក៏មើលឃើញពីចំណុចខ្វះខាតរបស់កីឡាករខ្មែរដែរ។
លោកនិយាយថា ៖«ខ្ញុំឃើញកីឡាករខ្មែរលេងបានល្អគួរសមនៅតង់ទីមួយ ប៉ុន្តែនៅតង់ទីពីរកីឡាករខ្មែរហាក់មើលស្រាលដៃគូ ខណៈដឹងថាគេមានគ្នាតែ១០នាក់។ ជាក់ស្តែងលេងអត់ប្រុងប្រយ័ត្នសោះនៅដើមតង់ទីមួយបណ្ដាលឲ្យគេស៊ីយ៉ាងស្រួល។ ពេលនោះខ្ញុំតឹងចិត្តម្តង តែពេលគេនាំមុខជាលើកទីពីរខ្ញុំស្ទើរប្រេះទ្រូងទៅហើយ»។
តាមការប្រកួតកាលពីម្សិលមិញក្រុមកម្ពុជាលេងបានល្អនៅតង់ទីមួយដោយមានឱកាសជាច្រើនប៉ុន្តែធ្វើមិនបានសម្រេច។ អ្នកគាំទ្រភាគច្រើនបំផុតមើលឃើញពីកំហុសកីឡាករត្រង់ការលេងបាល់ខ្លាចខ្លាំងពេក មិនហ៊ានចូលទៅកៀបសង្កត់គេ ការពារខ្សោយ លេងមិនស៊ីសង្វាក់គ្នា និងមើលស្រាលដៃគូរជាដើម។
អត្ថបទពាក់ព័ន្ធ៖ អ្នកគាំទ្រថា កីឡាករខ្មែរគួរកែប្រែកំហុសខ្លះដើម្បីយកឈ្នះឡាវ
នេះមិនមែនជាលើកទីមួយទេដែលអ្នកគាំទ្រខ្មែរមើលឃើញពីកំហុសរបស់កីឡាករខ្មែរ។ កាលក្រុមកម្ពុជាប្រកួតជាមួយម៉ាឡេស៊ីក៏អ្នកគាំទ្រខ្មែរមើលឃើញកំហុសជាច្រើនដែរដោយពួកគាត់ថា កីឡាករខ្មែរលេងបែបអាត្មានិយម៕
អ្នកយល់យ៉ាងណាដែរកាលពីម្សិលមិញ?
អត្ថបទ៖ ជាន ចាន់រ៉ា
0 comments:
Post a Comment