ជំនួយ​ការ​ចៅ​សង្កាត់​ចោម​ចៅ​ម្នាក់​ជួប​គ្រោះ​ថ្នាក់​ចរា​ចរណ៍​ស្លាប់​បាត់​បង់​ជីវិត​​ភ្លាម​​ៗ​​ នៅនឹង​កន្លែង​

រាជធានីភ្នំពេញ ៖ បុរសម្នាក់ដែលគេស្គាល់ថា ជាជំនួយការចៅសង្កាត់ចោមចៅ បានស្លាប់បាត់បង់ជីវិតភ្លាមៗ នៅនឹងកន្លែង ចំណែកប្រពន្ធបានរងរបួសធ្ងន់ ខណៈដែលរូបគាត់ និងប្រពន្ធ ជួបគ្រោះថ្នាក់គ្រោះថ្នាក់ចរាចរណ៍ម៉ូតូបុកម៉ូតូ កាលពីវេលាម៉ោង ៩ និង ១០នាទី យប់ថ្ងៃទី១៤ វិច្ឆិកា ២០១៣ នៅតាមបណ្តោយផ្លូវជាតិលេខ៤ មុខផ្សារជំពូវ័ន្ត ស្ថិតក្នុងភូមិជំពូវ័ន្ត សង្កាត់ចោមចៅ ខណ្ឌពោធិ៍សែនជ័យ។

ជនរងគ្រោះដែលស្លាប់ឈ្មោះ ម៉ាន់ ប៊ុនជឿន ភេទប្រុស អាយុជាង ៤០ឆ្នាំ មានទីលំនៅភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ។

តាមប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះជិះម៉ូតូម៉ាកឌ្រីមC125 ស៊េរីឆ្នាំ២០០៤ ពណ៌ខ្មៅ ពាក់ស្លាកលេខ ភ្នំពេញ 1A-4407 រួមដំណើរជាមួយប្រពន្ធ ធ្វើដំណើរតាមផ្លូវជាតិលេខ៤ ក្នុងទិសដៅពីលិចទៅកើត ខណៈមកដល់ចំណុចកើតហេតុ ក៏មានម៉ូតូស្មាស់វីវ៉ូ ពណ៌ខៀវ ១គ្រឿង ពាក់ស្លាកលេខ ភ្នំពេញ 1Y-5189 ជិះដោយបុរស ២នាក់ ដែលបើកបញ្រ្ចាសទិសគ្នា បុកចំពេញទំហឹង បណ្តាលឲ្យជនរងគ្រោះស្លាប់ភ្លាមៗ ចំណែកប្រពន្ធ និងបុរស ២នាក់ទៀត រងរបួសធ្ងន់ ត្រូវបញ្ជូនទៅសង្រ្គោះបន្ទាន់នៅមន្ទីរពេទ្យ។

ក្រោយកើតហេតុ សមត្ថកិច្ចជំនាញបានធ្វើការវាស់វែង និងមិនទាន់សន្និដ្ឋានថា ភាគីខាងណាខុស ឬត្រូវឡើយ៕