អតីតតារាស្រីកាលីបខ្ពស់បីនាក់ដែលបានបាត់មុខរាប់ឆ្នាំហើយនោះ បានលេចមុខយ៉ាងកម្រក្នុងពិធីមង្គលពិធីការិនីល្បីឈ្មោះ អ្នកនាង គង់ សុជាតិ និងលោក ជា វិបុល កាលពីចុងសប្ដាហ៍មុននេះ។
អ្នកទាំងបីនាក់នោះ មានអ្នកនាង ស្រីតូច ចំណាន អ្នកនាង ពេជ្រ ច័ន្ទបូរមី និងអ្នកនាង ទូច ស្រីនាង។ពួកគេ បានបន្សាត់ខ្លួនចេញពីសិល្បៈរាប់ឆ្នាំមកហើយ បន្ទាប់ពីបានបែកផ្លូវគ្នាមានស្វាមីរៀងៗខ្លួន ក្នុងនោះម្នាក់ៗសុទ្ធតែរស់ក្នុងជីវភាពយ៉ាងហ៊ឺហា ហើយខ្លះមានងារជាសេដ្ឋីនីផង។
អ្នកនាង ស្រីតូច ចំណាន ត្រូវបានគេដឹងថាជាតារាដែលមានជីវភាពស្តុកស្តម្ភជាងគេ ក្នុងចំណោមអ្នកទាំងបី បន្ទាប់ពីដកខ្លួនពីសិល្បៈ ក្នុងនោះរាល់ដំណើររបស់អ្នកនាង តែងមានអង្គរក្សឆ្វេងស្តាំតាមការពារសុវត្ថិអ្នកនាងជានិច្ច។ បង្ហាញវត្តមានក្នុងរាត្រីនោះ ក្នុងសំលៀកបំពាក់រ៉ូបក្រហមយ៉ាងសិចស៊ី អ្នកនាង ទទួលបានការស្វាគមន៍ជាច្រើនពីអ្នកសិល្បៈ។
លោក អេនឌី ដែលមានភាពស្និទ្ធស្នាលខ្លាំងជាមួយតារាស្រីល្បីៗជាច្រើននោះ បានប្រាប់ថា លោកភ្ញាក់ផ្អើលមែនទែនពេលឃើញអ្នកនាង ស្រីតូច ចំណាន លេចមុខក្នុងពិធី។ លោកថា “ខ្ញុំធ្លាប់តែជួបគាត់តាមតែទូរស័ព្ទទេ ហើយខានបានជួបផ្ទាល់អីចឹងយូរហើយ។ គាត់នៅតែស្អាត និងរួសរាយដដែល អត់មានប្លែកសោះ តាំងពីនៅប្រឡូកសិល្បៈ មកដល់ឥឡូវនៅតែអីចឹង”។
ដោយឡែក អ្នកនាង ពេជ្រ ច័ន្ទបូរមី ក៏ដូចគ្នា អតីតតារាស្រីរូបនេះ ក៏ស្ថិតក្នុងចំណោមតារាស្រីរស់ក្នុងជីវភាពហ៊ឺហាដែរ បន្ទាប់ពីអ្នកនាង បានស្វាមីជាមន្ត្រីប៉ូលីសអន្តរជាតិ(Interpol) ហើយអ្នកនាង ផ្ទាល់ក៏មានជំនួញដីធ្លីជាច្រើនកន្លែង និងមាននាទីកាន់កាប់ក្រុមហ៊ុនមួយចំនួនផង។ នៅក្នុងអតីតកាល អ្នកនាង បូរមី ក៏ស្ថិតក្នុងចំណោមតារាស្រីស្អាតទាំងបួនដួង(ស្រីតូច ចំណាន ពេជ្រ ច័ន្ទបរមី សៀម ស្រីណុច និងឡាយ លក្ខិណា)ដែរ។
អ្នកនាង បានដកខ្លួនចេញពីសិល្បៈអំឡុងឆ្នាំ២០០០ ក្រោយចូលប្រឡូកអំឡុងចុងទសវត្សរ៍៩០។ លោក អេនឌី បានរៀបរាប់ពីភាពជាក់ស្តែងថា អ្នកនាង ពេជ្រ ច័ន្ទបូរមី នៅតែរួសរាយជាមួយមិត្តចាស់ ហើយសម្រស់ក៏នៅតែស្អាតដូចមុន។
អ្នកនាង ទូច ស្រីនាង បងស្រីបង្កើតរបស់អ្នកនាង ទូច ស្រីលក្ខណ៍ តារាសម្ដែងយ៉េយ៉េ។ អតីតតារាចម្រៀងរូបនេះ ក៏ជាតារាល្បីជំនាន់ អ្នកនាង ពេជ្រ ច័ន្ទបូរមី និងស្រីតូច ចំណានដែរ។ អ្នកនាង លេចធ្លោខ្លាំងអំឡុងឆ្នាំ ២០០១ ដល់ ២០០៣ ប៉ុន្តែអ្នកនាងបានទម្លាក់ចោលការងារសិល្បៈ ក្រោយបានស្វាមីជាជនបរទេស ហើយទៅរស់នៅប្រទេសអង់គ្លេស។
យ៉ាងណា អ្នកនាង បានវិលត្រឡប់មកនៅប្រទេសកំណើតវិញ បន្ទាប់ពីរស់នៅស្រុកគេបានមួយរយៈពេលខ្លី។ ជីវភាពក្រោយវិលត្រឡប់នេះ អ្នកនាង ទូច ស្រីលក្ខណ៍ ត្រូវបានស្វាមីបើកក្រុមហ៊ុនអចលនទ្រព្យឲ្យមើលការខុសត្រូវ បន្ទាប់ជំនួញហាងពេជ្រតាមបណ្តោយមហាវិថីព្រះនរោត្តម បានដួលរលំ។
ជាសរុបមក អតីតតារាស្រីល្បីឈ្មោះទាំងបីនាក់ខាងលើ មានសក្ដានុពលមិនលើសខ្វះគ្នាឡើយ ទាំងទ្រព្យសម្បត្តិ និងរូបសម្ផស្ស បើទោះបានដកខ្លួនច្រើនឆ្នាំក៏ដោយ។
យ៉ាងណា ប្រិយមិត្តទស្សនាទៅមើល ថាតើនរណាស្អាតជាងគេ?
អត្ថបទ៖ ទារិកា
0 comments:
Post a Comment