យុវជនខ្មែរទាំងពីរនេះបើទោះជាមានប្រភពកំណើត ការអប់រំ និងចំណេះជំនាញផ្សេងគ្នាក៏ដោយ ប៉ុន្តែចំណុចរួមតែមួយដែលពួកគេមានដូចគ្នានោះ គឺថាពួកគេទាំងពីរ ចូលចិត្តធ្វើឲ្យគ្រប់គ្នាដែលនៅជុំវិញខ្លួន ទទួលបានភាពសប្បាយរីករាយ។
ម្នាក់ក្នុងចំណោមពីរនាក់ គឺលោក តេង សាម៉ៅ ត្រូវបានប្រិយមិត្តនៅលើបណ្ដាញសង្គម Facebook ស្គាល់ច្បាស់ថា ជាអ្នកលេងវេទមន្តតាមដងផ្លូវ(Street Magic) ដំបូងដ៏មានប្រជាប្រិយភាពរបស់កម្ពុជា។ ក្នុងបទសម្ភាសន៍កន្លងមកជាមួយយើងខ្ញុំលោក សាម៉ៅ ដែលមកពីខេត្តបាត់ដំបង បានប្រាប់ថា “ខ្ញុំចូលចិត្តធ្វើឲ្យគ្រប់គ្នាសើចសប្បាយ ហើយនេះ គឺជាគុណសម្បត្តិរបស់ Magic ដែរ គឺធ្វើឲ្យគ្រប់គ្នាភ្ញាក់ផ្អើល រំភើបសប្បាយ និងចងចាំយើង ដូច្នេះហើយខ្ញុំចាប់ផ្តើមចូលចិត្តវាដែរ!”។
របៀបដែលលោក តេង សាម៉ៅ និយមធ្វើឡើងបង្កការសប្បាយដល់ប្រិយមិត្តអ្នកគាំទ្រនោះ គឺលោកដើរសម្ដែងវេទមន្ត(Magic)តាមទីសាធារណៈផ្សេងៗ ជាមួយរបៀបលេងខុសៗពីគ្នា ហើយផលិតជាវីដេអូឃ្លិបបង្ហោះលើបណ្ដាញ Facebook និង Youtube ចែកចាយជូនប្រិយមិត្តបានទស្សនាកម្សាន្ត។
មិនសូវខុសគ្នាប៉ុន្មានដែរ លោក ស៊ីវភិន ចុង យុវជនមកពីខេត្តស្ទឹងត្រែង បច្ចុប្បន្នកំពុងសិក្សានៅសាកលវិទ្យាល័យលីមកុកវីងជំនាញ Design ក៏និយមធ្វើវីដេអូកំប្លែងប្លែកៗបង្ហោះលើបណ្ដាញទំនើប Facebook និង Youtube ធ្វើឲ្យប្រិយមិត្តបានទស្សនាកម្សាន្តសើចសប្បាយដែរ។
យ៉ាងណារបៀបសម្ដែងរបស់ ស៊ីវភិន ចុង គឺខុសពីលោក តេង សាម៉ៅ ដោយអ្វីដែលលោករមែងធ្វើ គឺប្រើទេពកោសល្យពីកំណើត និងចំណង់ចំណូលចិត្តរបស់ខ្លួន សម្ដែងកាយវិការ និងសាច់រឿងខ្លីប្លែកៗ។ យុវជនរូបនេះ បាននិយាយជាមួយយើងខ្ញុំកន្លងមកថា “មិនដឹងថាម៉េចទេ គឺខ្ញុំចូលចិត្តធ្វើអីប្លែកៗអីចឹងតាម៉ង…ពេលខ្លះមើលការសម្ដែងខ្លួនឯង ដូចខ្មាសៗដែរ(សើច)”។
លោក ស៊ីវភិន ចុង ក្នុងបទសម្ភាសន៍ជាមួយយើងខ្ញុំកន្លងមក
ជាសរុបមក ទាំងលោក តេង សាម៉ៅ និង ស៊ីវភិន ចុង សុទ្ធជាបុគ្គលដែលគេទទួលស្គាល់ថា ជាអ្នកដែលមានជំនាញរៀងខ្លួន ធ្វើឲ្យគ្រប់គ្នាដែលជុំវិញខ្លួនទទួលបានភាពសប្បាយរីករាយ។ ដោយសារតែបែបនេះហើយ ទើបពួកគេទាំងមានការគាំទ្រខ្លាំងនៅលើបណ្ដាញទំនើបរៀងៗខ្លួន។
ដូច្នេះពេលហើយ សម្រាប់ប្រិយមិត្តបង្ហាញថា ខ្លួនជាអ្នកគាំទ្រនរណាម្នាក់ចំណោមពួកគេ។ តែយ៉ាងណា…សូមទស្សនាស្នាដៃចុងក្រោយពួកគេ មុនពេលប្រាប់ថាតើ តេង សាម៉ៅ ឬ ភិន ចុង ធ្វើឲ្យអ្នកសប្បាយជាងគេ?
ស្នាដៃចុងក្រោយរបស់ លោក តេង សាម៉ៅ “SAMAO THE MYSTERY MAN”
ស្នាដៃចុងក្រោយរបស់លោក ស៊ីវភិន ចុង Holy Sping
0 comments:
Post a Comment