ក្លិបបាល់ទាត់ TriAsia Phnom Penh FC បានចំណាយទឹកប្រាក់ជិតបីពាន់ដុល្លារអាមេរិក ទៅឲ្យក្លិបខេត្តស្វាយរៀង ដើម្បីនាំយកខ្សែប្រយុទ្ធ សុក ចាន់រស្មី មកពង្រឹងក្រុមត្រៀមជើងព្រួលវគ្គ Play-off ដែលការចុះកិច្ចព្រមព្រៀងធ្វើឡើង កាលពីថ្ងៃពុធ សបា្តហ៍មុន។ នេះបើតាមសាមីខ្លួន សុក ចាន់រស្មី។
ខ្សែប្រយុទ្ធដដែលបន្តថា ការចាកចេញរបស់ខ្លួនមិនមែនមកពី មានរឿងរកាំរកូសក្នុងក្លិបអ្វីនោះទេ គ្រាន់តែចង់ផ្លាស់ក្លិបម្ដង ត្បិតរួមរស់ជាមួយស្វាយរៀងជាង៧ឆ្នាំហើយ ម្យ៉ាងចង់ទុកឱកាសឲ្យសិស្សប្អូនរួមក្លិប បញ្ចេញសមត្ថភាពម្ដង។ តាមពិតកុងត្រាជាមួយ ស្វាយរៀង នៅសល់រហូតដល់ឆ្នាំ២០១៥ តែអ្នកគ្រប់គ្រងក្លិបទាំងពីរបានពិភាក្សាគ្នា និងយល់ព្រមក្នុងការផ្ទេរចេញ ដោយ TriAsia ផ្ដល់តម្លៃខ្លួនឲ្យក្លិបដើមក្នុងទំហំទឹកប្រាក់ពី២៥០០ដុល្លារទៅ៣០០០ដុល្លារ។
សុក ចាន់រស្មី កាលលេងក្នុងពានរង្វាន់មិត្តហ្វូនខេមបូឌានលីក ឲ្យ ស្វាយរៀងកន្លងមក
“ទោះជាចាកចេញក៏ដោយ តែខ្ញុំនៅតែនឹកនាដល់ស្វាយរៀង ហើយខ្ញុំជឿជាក់ថា លោកគ្រូ ក៏ដូចជាមិត្តរួមក្លិបទាំងអស់ នឹងនៅតែធ្វើបានល្អ ជាពិសេសក្នុងព្រឹត្តិការណ៍ AFC President’s Cup 2014 ខាងមុខនេះ។ ចំពោះការជ្រើសយក Tri-Asia ជាទ្រនំថ្មីនេះ ដោយសារខ្ញុំមើលឃើញថា ក្លិបថ្មីមួយនេះមានទស្សនៈវិស័យច្បាស់លាស់ ចំណែកគ្រូបង្វឹក និងអ្នកគ្រប់គ្រងរឹតតែធ្វើឲ្យខ្ញុំកក់ក្ដៅថែមទៀត។ ខ្ញុំសង្ឃឹមថា Tri-Asia នឹងធ្វើដំណើរវែងឆ្ងាយ ប្រកបដោយសក្ដានុពលក្នុងលីកកំពូលកម្ពុជា”។ កីឡាករវ័យ២៣ឆ្នាំរូបនេះបន្ថែម។
សុក ចាន់រស្មី ចាប់អាជីពដំបូងក្នុងអំឡុងឆ្នាំ២០០៥-០៦ ជាមួយក្លិបបៀលប្រាយយូណាយធីត ហើយបានផ្លាស់ទៅស្វាយរៀង (កាលនោះជា ព្រះខ័នរាជ) នាឆ្នាំបន្ទាប់។ ឆ្នាំ២០០៨ លេងលក្ខណៈខ្ចីជើងឲ្យ Spark FC ហើយក៏ជាឆ្នាំដែលកីឡាកររូបនេះ ទទួលបានរង្វាន់ស្បែកជើងមាស ក្រោយស៊ុតបញ្ចូលទីបាន១២គ្រាប់ ក្នុងព្រឹត្តិការណ៍ Hun Sen Cup 2008 ៕
0 comments:
Post a Comment