យុវជនម្នាក់សន្លប់ទាំងឈាមហូរចេញពីក្បាល សង្ស័យចោរវាយយកម៉ូតូ
ខេត្តស្ទឹងត្រែង ៖ យុវជនម្នាក់បានសន្លប់បាត់ស្មារតី នៅកណ្តាលថ្នល់ ដោយសារមានឈាមហូរ ចេញពីក្បាលផ្នែកខាងក្រោយ ហើយសមត្ថកិច្ចបានដាក់ការសង្ស័យថា អាចជាករណីវាយប្លន់យកម៉ូតូ ។ ហេតុការណ៍នេះបានកើតឡើង កាលពីវេលាម៉ោងជាង១២ រំលងអធ្រាត្រ ឈានចូលថ្ងៃទី៣ តុលា នៅចំណុចផ្លូវបំបែក គល់ស្ពានសេកុង ក្នុងភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង ។
មន្ត្រីសមត្ថកិច្ចនៅកន្លែងកើតហេតុប្រាប់ថា យុវជនម្នាក់នេះមិនដឹងថា ត្រូវគេវាយតាំងពីថ្មើរណា និងធ្វើដំណើរពីណាទៅណានោះទេ ហើយការពិនិត្យនៅកន្លែងកើតហេតុ ឃើញមានដំបងបាក់ចំនួនពីរកំណាត់ ឫស្សីមួយដើមប្រវែងជិតបីម៉ែត្រ និងស្បែកជើងខុសគ្នាបីចំហៀង និងនៅក្បែរជនរងគ្រោះ មានសីុមទូរស័ព្ទមិត្តហ្វូនមួយ ដែលត្រូវដោះបោះចោល ។
ប្រជាពលរដ្ឋដែលមានលំនៅឋានម្តុំនោះ បានឮសំឡេងម៉ូតូប្រដេញគ្នា និងឮសំឡេងវាយវាត់តែមិនបានដឹងថា មនុស្សវាយគ្នារហូតដួលសន្លប់នោះឡើយ ។ តាមមន្ត្រីសមត្ថកិច្ចសន្និដ្ឋានថា បើមិនមែនជាការវាយប្លន់ម៉ូតូទេ ជនរងគ្រោះអាចនឹងដួលម៉ូតូ ហើយត្រូវពួកឆ្លៀតឱកាសយកម៉ូតូ និងរបស់របររបស់ជនរងគ្រោះ ។
ឯមួយទៀតក៏អាចជារឿងគំនុំ ទើបឈានដល់ការវាយរហូត ស្ទើរស្លាប់ស្ទើររស់បែបនេះ និងមួយទៀតអាចជាករណីវាយប្លន់យកម៉ូតូ ព្រោះនៅចំណុចកើតហេតុយប់ងងឹត ចំណែកភ្លើងនៅតាមដងផ្លូវ និងអំពូលភ្លើងនៅលើស្ពាន ក៏ត្រូវបិទអស់ដែលអាចបង្កឱ្យមានភាពងាយស្រួល ក្នុងការធ្វើសកម្មភាពល្មើស ខណៈមានការឆក់ឱកាសក្នុងរដូវបុណ្យភ្ជុំបិណ្ឌ ពេលយុវជនខាងលើ ធ្វើដំណើរត្រឡប់ពីកម្សាន្តនៅតាមវត្តអារាម ។ ទោះជាយ៉ាងណា រហូតមកដល់ពេលនេះ សមត្ថកិច្ចនៅមិនទាន់សើុបអង្កេតដឹងថា ជាករណីវាយប្លន់យកម៉ូតូឬជារឿងគំនុំឱ្យប្រាកដនៅឡើយទេ ។
0 comments:
Post a Comment