Robin van Persie បានបំបែកកំណត់ត្រាស៊ុតបញ្ចូលទីច្រើនជាងគេ ក្នុងប្រវត្តិសាស្រ្ដបាល់ទាត់ជម្រើសជាតិហុល្លង់ ក្រោយធ្វើបានហ៊ែតទ្រីកក្នុងវគ្គជម្រុះ World Cup ទល់នឹងហុងគ្រីយប់មិញនេះ។
៣គ្រាប់បន្ថែមដែលជួយឲ្យហុល្លង់លត់ហុងគ្រីចាស់ដៃ ៨-១ នោះ បានធ្វើឲ្យខ្សែប្រយុទ្ធក្លិបបិសាចក្រហម Manchester United រូបនេះ កើនគ្រាប់បាល់ដល់ ៤១ គ្រាប់ បំបែកកំណត់ត្រាចាស់របស់ Patrick Kluivert ដែលធ្លាប់ធ្វើបាន ៤០គ្រាប់មុនចូលនិវត្តន៍។
Van Persie អបអរក្រោយស៊ុតបញ្ចូលទី
ទោះបីជាហុល្លង់បានដឹងខ្លួនថា ជាប់ទៅប្រេស៊ីលជាស្វ័យប្រវត្តិតាំងពីខែមុនហើយក៏ដោយ ក៏ក្រុមនេះមិនបានប្រណីហុងគ្រីដែលត្រូវការពិន្ទុចាំបាច់ដើម្បីបន្តដង្ហើមនាវគ្គជម្រុះនោះឡើយ។ ហ៊ែតទ្រីករបស់ RVP កើតឡើងនៅនាទី១៦, ៤៤ និង៥៣ ខណៈ៥គ្រាប់ផ្សេងទៀតធ្វើបានដោយ Kevin Strootman (នាទី២៥) Jeremain Lens (នាទី៣៨) Nigel de Jong (នាទី៦៤) Arjen Robben (នាទី៩០) និងការធ្វើឲ្យចូលទីខ្លួនរបស់កីឡាករ Szllard Devecseri នៅនាទី៦៥។ ចំណែក១គ្រាប់សងវិញរបស់ក្រុមភ្ញៀវហុងគ្រី កើតឡើងដោយការស៊ុតបាល់ពិន័យ១១ម៉ែត្ររបស់កីឡាករ Balazs Dzsudzsak នៅនាទី៤៧។
ខ្សែប្រយុទ្ធវ័យ ៣០ឆ្នាំបាននិយាយក្រោយការប្រកួតថា ៖ “វាពិតជាអស្ចារ្យណាស់ ជាពិសេសគឺខ្ញុំស្ទើរតែមិនអាចចូលលេងក្នុងការប្រកួតនេះ (របួសមេជើង)។ គ្រូបង្វឹកបានសម្រេចដាក់ខ្ញុំឲ្យលេងនៅ១ម៉ោងមុនការប្រកួត”។
អ្វីដែលគួរឲ្យកត់សម្គាល់ផងដែរនោះ គឺក្រោយស៊ុតបំបែកកំណត់ត្រារួចហើយ Van Persie បានរត់ឱបម្ចាស់កំណត់ត្រា Kluivert ដែលអង្គុយទស្សនាក្នុងនាមជាជំនួយការគ្រូបង្វឹក Louis van Gaal។
Persie បានចាប់ផ្ដើមជាប់ក្នុងជម្រើសជាតិលើកដំបូងកាលពីខែមិថុនា ឆ្នាំ២០០៥ ពេលហុល្លង់ប៉ះរ៉ូម៉ានី។ ការស៊ុតបង្គ្រប់គ្រាប់ទី៤១របស់គេយប់មិញនេះ គឺជាការបង្ហាញខ្លួនជាលើកទី៨០៕
ចាំមើលមើល៍ ថាតើអតីតខ្សែប្រយុទ្ធក្លិប Feyenoord និង Arsenal រូបនេះ អាចបន្តបង្កព្យុះភ្លៀងបានទៀតឬទេ នៅ World Cup ឆ្នាំក្រោយ?
Persie រត់ឱប Kluivert ក្រោយស៊ុតបញ្ចូលទីបំបែកកំណត់ត្រា
អានអត្ថបទផ្សេងទៀតទាក់ទងនឹង World Cup សូមចុចត្រង់នេះ។
0 comments:
Post a Comment