អ្នកចាត់ការក្រុមតោខៀវ Chelsea លោក Jose Mourinho បានដើរចេញពីសន្និសីទសារព័ត៌មានត្រៀមប្រកួត UEFA Champions League យប់នេះ ទាំងកណ្ដាលទី ដោយសារខឹងរឿងអ្នកកាសែតសួរពីបញ្ហាកីឡាករដែលលោកមិនដាក់ឲ្យចូលលេង។
លោក Jose Mourinho បញ្ជាកូនក្រុមនាការប្រកួតកន្លងមក
ការក្ដៅស្លឹកត្រចៀកនោះ គឺពេលក្រុមអ្នកសារព័ត៌មានបានសួរអំពីការដកឈ្មោះកីឡាករ Kevin de Bruyne ពីក្នុងក្រុមសម្រាប់ប្រកួតទល់នឹង Steaua Bucharest។ ខ្សែបម្រើស្លាបសញ្ជាតិបែលហ្សិករូបនោះ មិនមានឈ្មោះក្នុងបញ្ជីធ្វើដំណើរមករ៉ូម៉ានីនោះទេ ខណៈមិត្តរួមជាតិរបស់គេ គឺ Eden Hazard ក៏អវត្តមានដែរ ប៉ុន្តែដោយសារបញ្ហារបួស។
ការខឹងនេះ គឺដោយសារតែលោកបានធុញទ្រាន់នឹងសំណួរដដែលៗ ពោលគឺកាលពីប៉ុន្មានសប្ដាហ៍ចុងក្រោយនេះ មានសំណួរជាច្រើនសួរអំពីបញ្ហាមិនដាក់ Juan Mata ឲ្យលេង ហើយពេលនេះឈានដល់រឿង De Bruyne ទៀត។
អ្នកចាត់ការសញ្ជាតិព័រទុយហ្គាល់បាននិយាយក្នុងន័យឌឺដងមុនដើរចេញពីសន្និសីទកាសែតថា៖ “នេះពិតជាអស្ចារ្យណាស់ដែលគ្មានអ្នកណាម្នាក់សួរខ្ញុំពី Mata។ អ្នកបាននិយាយពី Mata ៣សប្ដាហ៍មកហើយ ហើយពេលនេះអ្នកនិយាយពី Kevin de Bruyne ទៀត។ តើអ្នកមិនចាប់អារម្មណ៍នឹងកីឡាករដែលត្រូវលេងខ្លះទេឬ? អ្នកបានចាប់អារម្មណ៍តែកីឡាករដែលមិនបានលេងប៉ុណ្ណោះ។ គាត់ (Bruyne) មិនត្រូវបានជ្រើសរើស។ វាជាការសម្រេចរបស់ខ្ញុំ។ មានតែ១១នាក់ប៉ុណ្ណោះដែលត្រូវចូលលេង ហើយមានតែ១៨នាក់ប៉ុណ្ណោះដែលអាចត្រូវបានជ្រើសយក”។
Kevin de Bruyne
Kevin De Bruyne ជាកីឡាករវ័យ២២ឆ្នាំដែលតោខៀវទិញពីក្លិប Racing Genk កាលពីឆ្នាំ២០១២ ប៉ុន្តែក្នុងរដូវកាលដំបូង (២០១២-២០១៣) ក្លិបនេះបានឲ្យ Werder Bremen ខ្ចីជើង។ ក្រោយបង្ហាញទម្រង់លេងល្អ Chelsea បានយកមកវិញ ព្រមទាំងដាក់ឲ្យលេងបាន២ប្រកួតក្នុងរដូវកាលថ្មីនេះ។ យ៉ាងណាក្ដី ក្នុងជំនួបរវាងក្លិបនេះ ទល់នឹងក្រុម Spurs សប្ដាហ៍មុន Bruyne មិនមានឈ្មោះនោះទេ។
ងាកមកមើល Chelsea វិញ កាលពីប្រកួតបើកឆាក UCL ក្នុងពូល E ក្រុមជើងឯកឆ្នាំ២០១២ មួយនេះ បានចាញ់ក្រុមស្វីស Basel ២-១ ក្នុងដីខ្លួនឯង។ តើការប៉ះក្រុមនៅរ៉ូម៉ានីនៅយប់នេះវិញ យ៉ាងណាដែរ?
0 comments:
Post a Comment