នៅសល់តែ ២ ថ្ងៃទៀតប៉ុណ្ណោះការប្រកួតវគ្គជម្រុះស្វែងរកក្រុមឡើងទៅលេងក្នុងពានរង្វាន់ មិត្តហ្វូនខេមបូឌានលីក ២០១៤ នឹងចាប់ផ្ដើមហើយ នៅពហុកីឡដ្ឋានជាតិ។ ក្រុមហ៊ុន TriAsia Group ដែលមានក្លិបបាល់ទាត់ផ្ទាល់ខ្លួន មានឈ្មោះចូលរួមប្រកួតក្នុងព្រឹត្តិកាណ៍នោះបានសហការណ៍ជាមួយ សហព័ន្ធកីឡាបាល់ទាត់កម្ពុជា ផ្ដល់សំណាងដល់ទស្សនិកជនចូលទស្សនានឹងអាចឈ្នះទូរសព្ទសេរ៊ីថ្មីម៉ាក iPhone 5C មួយគ្រឿង។
តាមរយៈការជាវតម្លៃសំបុត្រចូលទស្សនាការប្រកួតមួយសន្លឹកតម្លៃ ១ ពាន់រៀល នោះអ្នករៀបចំកម្មវិធីនឹងយកកន្ទុយសំបុត្រតាំងពីថ្ងៃប្រកួតទី១ ទៅដាក់ក្នុងធុងឆ្នោតដើម្បីចាប់រង្វាន់នៅថ្ងៃចុងក្រោយ។ ក្រៅពីរង្វាន់ iPhone 5C ទស្សនិកជនក៏អាចឈ្នះរង្វាន់លើកទឹកចិត្តផ្សេងទៀត មានដូចជា សម្ភារៈសម្រាប់កីឡាបាល់ទាត់ ជាដើម។ ក្រៅពីចាប់ឆ្នោតផ្សងសំណាង ក្នុងការប្រកួតនោះក៏នឹងមានការប្រគំតន្ត្រីជូនទស្សនិកជន បានទស្សនាផងដែរ។
លោក Hiroya Kon តំណាងក្រុមហ៊ុន Tri Asia បានលើកឡើងក្នុងសន្និសិទសាព័ត៌មានស្ដីពីការចូលរួមសហការរបស់ក្រុមហ៊ុន ជាមួយសហព័ន្ធ នៅព្រឹកថ្ងៃទី ១០ តុលា នេះថា ការចូលរួមចំណែករបស់ក្រុមហ៊ុនលោកជាមួយសហព័ន្ធគឺ ដើម្បីជួយលើកស្ទួយកីឡាបាល់ទាត់នៅកម្ពុជា ឱ្យកាន់តែរីកចម្រើន ចាប់បានការគាំទ្រខ្លាំងឡើង។
រីឯលោក គល់ សុផាណា អគ្គលេខាធិការសហព័ន្ធកីឡាបាល់ទាត់កម្ពុជាបានថ្លែងអំណរគុណដល់ក្រុមហ៊ុន TriAsia ដែលបានចូលរួមចំណែកជាមួយសហព័ន្ធលើដំណើការអភិវឌ្ឍន៍កីឡាបាល់ទាត់ក្នុងស្រុក។
ចង់ដឹងណាស់ថា តើទស្សនិកជនរូបណា ដែលមានវាសនាជាម្ចាស់ទូរសព្ទ iPhone 5C?
0 comments:
Post a Comment