ធ្លាប់តែឃើញនិងប្រើប្រាស់ទូរសព្ទម៉ាកផ្សេងៗ តែឥឡូវបែរជាមានទូរសព្ទ Firefox ដែលប្រើប្រាស់ប្រព័ន្ធប្រតិបត្តិការ Firefox OS ហើយកូនខ្មែរមួយរូបកំពុងសាកល្បងធ្វើតេស្តិសាកល្បងប្រើទូរសព្ទដ៏ទំនើបនេះ។
លោក អេង វណ្ណៈ ជាអ្នកតំណាង Mozilla នៅស្រុកខ្មែរ និងកំពុងសាកល្បងប្រើទូរសព្ទ Firefox ម៉ូដែល Keon បានឲ្យដឹងថា ៖” សម្រាប់ទូរសព្ទ FireFox ម៉ូដែល Keon នេះ ខ្ញុំតែម្នាក់គត់នៅក្នុងប្រទេសកម្ពុជាយើង ដែលបានកាន់ប្រើមុនគេ និងកំពុងសាកល្បងក្នុងការតេស្តរកកំហុសឆ្គងផ្សេងៗ”។
ដោយទទួលការអនុញ្ញាតិពី Firefox លោកថា បើការធ្វើតេស្តមានភាពឆ្គាំឆ្គង លោកនឹងរាយការទៅដល់ Mozilla។
ទាក់ទងនឹងការធ្វើតេស្តិសាកល្បងប្រើទូរសព្ទប្រភេទនេះ លោកបញ្ជាក់ថា ទូរសព្ទ Firefox ម៉ូដែល Keon ឃើញមានបញ្ហាមួយចំនួនដូចជា Wifi ដែលពិបាកនៅក្នុងការតភ្ជាប់, បញ្ហាសេវាដែលពេលខ្លះមានពេលខ្លះមិនមាន និងបញ្ហាថាច់ស្រ្គីនជាដើម។
លោកថា លោកនឹងរាយការបញ្ហាទាំងអស់នេះទៅដល់ Mozilla ដើម្បីស្វែងរកដំណោះស្រាយ មុនពេលដែលទូរសព្ទនេះអាចឈានជើងមកដល់ទីផ្សារប្រទេសកម្ពុជា។
យ៉ាងណា លោកថា ទូរសព្ទ Firefox មិនដូចទូរសព្ទដទៃទៀតទេគឺធ្វើឡើងឲ្យត្រូវទៅតាម ទូរសព្ទ និង ប្រព័ន្ធប្រតិបត្តិការ ដោយមិនទាមទារខ្ពស់ពេកទេ។
“ទោះបីជាមានអភិវឌ្ឍន៍ Version ខ្ពស់យ៉ាងណាក៏ទូរសព្ទ Fire Fox ស៊េរីទាបអាចប្រើប្រាស់ប្រព័ន្ធប្រតិបត្តិការ Fire Fox OS ខ្ពស់បានដែរ។ ជាងនេះទៅទៀតគឺ Mozilla ធ្វើឡើងសម្រាប់អតិថិជនដែលលទ្ធភាពតិចតួចអាចទិញប្រើបាន។ ហើយការប្រើប្រាស់សម្រាប់អ្នកដែលមិនមែនជា Developer ក៏អាចយល់ដឹងពី Code ខ្លះៗដែលមានក្នុងការប្រើប្រាស់ប្រព័ន្ធប្រតិបត្តិការ Fire Fox OS “។
លោកសង្ឃឹមថាថ្ងៃខាងមុខនឹងមានលក់លើទីផ្សារកម្ពុជាយើង ហើយអ្នកប្រើប្រាស់ទាំងអស់នឹងបានសាកល្បងប្រើប្រាស់ទាំងអស់គ្នា ដើម្បីចង់ដឹងថាមានអ្វីដែលប្លែកលើសពី Smartphone ដទៃទៀតនោះ។
បច្ចុប្បន្ននេះទូរសព្ទ Firefox ចំនួនពីរម៉ូដែលគឺ Keon និង Peak បានចរាចរនៅលើទីផ្សារប្រទេសមួយចំនួនហើយនៅអឺរ៉ុប និងអាមេរិកខាងត្បូង និងក៏ទទួលបានការគាំទ្រយ៉ាងខ្លាំងសម្បើមផងដែរ។
អត្ថបទ៖ ដារ៉ាឆានី
0 comments:
Post a Comment