វត្តមានពេលហ្វឹកហាត់ក្នុងឈុត U23 ជម្រើសជាតិ របស់ខ្សែប្រយុទ្ធកូនកាត់ខ្មែរ-អាល្លឺម៉ង់ Chhunly Pagenburg ធ្វើឲ្យមានការភ្ញាក់ផ្អើល និងរីករាយមិនតិចទេ សម្រាប់អ្នកគាំទ្របាល់ទាត់កម្ពុជា។ ទន្ទឹមនឹងនេះ ក៏លេចចេញជាចម្ងល់យ៉ាងច្រើន ពីការបង្ហាញខ្លួនលើកដំបូង និងអាថ៌កំបាំងនៅពីក្រោយអវត្តមានកាលស៊ីហ្គេមនៅ ឥណ្ឌូណេស៊ី កាលឆ្នាំ២០១១។
ក្នុងទឹកមុខស្រស់ស្រាយជានិច្ច Chhunly ប្រាប់អ្នកយកព័ត៌មាន Sabay ថា តាមពិតកាលឆ្នាំ២០១១ ខ្លួនពិតជាចង់មកចូលរួមជាមួយក្រុមជម្រើសជាតិណាស់ តែដោយសារបញ្ហារបួសជាច្រើនតាមញាំញី ធ្វើឲ្យបាត់បង់ឱកាសដ៏ល្អនេះ។ នាពេលនោះ មិនត្រឹមតែមិនបានមកលេងនៅកម្ពុជាទេ តែកីឡាករកម្ពស់១.៧៨ម៉ែត្ររូបនេះ ត្រូវរសាត់អណ្ដែតរហូតដល់លីកលំដាប់ទី៤ ត្បិតបញ្ហារបួសធ្វើឲ្យទម្រង់លេងធ្លាក់ចុះយ៉ាងខ្លាំង។ ប៉ុន្តែបច្ចុប្បន្ន ខ្សែប្រយុទ្ធពាក់លេខ១១ម្នាក់នេះ បានឡើងមកលេងនៅក្លិប FSV Frankfurt ក្នុងលីកលំដាប់ទីពីរវិញហើយ។
Chhunly ពេល ធ្វើ តេស្ត ម្សិលមិញ (រូបថត៖ Kem Sovanna)
កីឡាករដដែលរំឭកថា ខ្លួនបានឃើញរាល់ E-mail ពីសហព័ន្ធ ពីអ្នកសារព័ត៌មាន និងអ្នកគាំទ្រទាំងអស់តាមរយៈ Facebook ហៅឲ្យទៅលេងនៅកម្ពុជាកាលឆ្នាំ២០១១ ហើយវាជារឿងគួរឲ្យរំភើប និងជារឿងសោកស្ដាយផងដែរ ដែលមិនអាចធ្វើតាមសំណើទាំងនោះបាន។ ទោះជាយ៉ាងណា Chhunly នៅតែបង្ហាញពីមហិច្ឆតារបស់ខ្លួន ក្នុងដំណើររួមចំណែកជួយដល់ក្រុមបាល់ទាត់កម្ពុជា ក៏ដូចជាចង់មកលេងក្នុងក្លិបណាមួយ របស់លីកកំពូលកម្ពុជាទៀតផង នាថ្ងៃអនាគត។
ការមកចូលរួមសាកល្បងសមត្ថភាពលើកនេះ កើតឡើងក្រោមការស្វះស្វែងរបស់សហព័ន្ធកីឡាបាល់ទាត់កម្ពុជា ដែលក្នុងនោះលោកអគ្គលេខាធិការរង ម៉ៃ តុលា គឺជាតួអង្គសំខាន់ក្នុងការទាក់ទងឲ្យ យុវជនមានម្ដាយជាជនជាតិខ្មែរមកជាន់វាលស្មៅពហុកីឡដ្ឋានជាតិ ជាលើកទីមួយ។ ក្នុងការប្រកួតសមជើងរវាង U23 ទល់នឹងក្លិបស្វាយរៀងកាលពីព្រឹកមិញ លោក Lee Tae Hoon បានផ្ដល់ឱកាសឲ្យកីឡាករកូនកាត់ខ្មែរ-អាល្លឺម៉ង់រូបនេះលេងបាន៤៥នាទី ខណៈទម្រង់លេង បម្លាស់ទី បច្ចេកទេស និងកម្លាំងជើងរបស់គេគួរឲ្យសរសើរ ស័ក្តិសមជាកីឡាករក្នុងលីកលំដាប់ពីររបស់អាល្លឺម៉ង់មែនៗ។
យ៉ាងណាក្ដី ខ្សែប្រយុទ្ធវ័យ២៦ឆ្នាំម្នាក់នេះ នឹងត្រូវចាកចេញពីកម្ពុជាវិញនៅ៤-៥ថ្ងៃបន្ទាប់ ដើម្បីចូលលេងឲ្យក្លិប ដែលខ្លួននៅសល់កុងត្រាពីរឆ្នាំទៀតជាធម្មតាវិញ។ ស្របជាមួយនឹងដំណើរត្រឡប់ទៅស្រុកកំណើតនេះដែរ Chhunly ត្រូវចរចាជាមួយអ្នកគ្រប់គ្រងក្លិប សុំការអនុញ្ញាតមកលេងឲ្យជម្រើសជាតិកម្ពុជា។ ប្រសិនបើ FSV Frankfurt យល់ព្រមតាមការស្នើសុំ ច្បាស់ណាស់ថា អតីតកីឡាករឈុត U19 និង U20 អាល្លឺម៉ង់ម្នាក់នេះ នឹងបានបង្ហាញខ្លួនឲ្យកម្ពុជាជាលើកដំបូងក្នុងពានរង្វាន់ BIDC Cup 2013 ចំណែកការចូលរួមក្នុងស៊ីហ្គេមនាខែធ្នូខាងមុខ ហាក់ស្រពេចស្រពិលនៅឡើយ ព្រោះលើសអាយុ។
Chhunly Pagenburg មានកម្ពស់១,៧៨ម៉ែត្រ កើតនៅថ្ងៃទី១៩ វិច្ឆិកា ឆ្នាំ១៩៨៦ នៅក្រុង Nuremberg ប្រទេសអាល្លឺម៉ង់ ដែលមានម្ដាយជាជនជាតិកម្ពុជា ឯឪពុកជាជនជាតិអាល្លឺម៉ង់។ កាលពីឆ្នាំ២០០៤-២០០៥ Chhunly បានបង្ហាញខ្លួន៥លើកនិងស៊ុតបញ្ចូលទីបាន១គ្រាប់ឲ្យ U19 អាល្លឺម៉ង់ និងលេងបានមួយប្រកួត ក្នុងឈុត U20 អាល្លឺម៉ង់ ជាមួយអ្នកចាំទីឆ្នើម Manuel Neuer របស់ Bayern Munich និង Keven Prince Boateng របស់ Schalke 04៕
0 comments:
Post a Comment