លោក ប៊ូយ ដារី គ្រូបង្វឹកថ្នាលយុវជនប្រចាំក្លិបភ្នំពេញក្រោន នឹងដឹកនាំកីឡាករបាល់ទាត់ ១៧ នាក់ដើម្បីទៅចូលរួមប្រកួតក្នុងព្រឹត្តិការណ៍ 2013 Asian Youth Football Festa នៅព្រឹកថ្ងៃស្អែក ដែលរៀបចំឡើងនៅប្រទេស កូរ៉េខាងត្បូង។
ក្រុមកុមារកម្ពុជាត្រៀមចេញដំណើរ
តាមលោក ដារី ថាការប្រកួតក្នុងកម្មវិធីខាងលើមានប្រទេសចូលរួមប្រមាណជា ៤២ ប្រទេស ក្នុងគោលបំណងបង្កើនទំនាក់ទំនង ក៏ដូចជា ចែករំលែកបទពិសោធន៍ និង វប្បធម៌ គ្នាទៅមករវាងក្មេងៗ របស់ប្រទេសនីមួយៗ ដោយមិនផ្ដោតលើចាញ់ឈ្នះនោះទេ។ ចំណែកឯវិញ្ញាសាដាក់ឱ្យប្រកួតវិញមានដូចជា ការប្រកួតកុមារក្រោមអាយុ ៦ – ៧ ឆ្នាំ ក្រោមអាយុ ៨ – ៩ ឆ្នាំ និង កុមារក្រោមអាយុ ១១ – ១២ ឆ្នាំ។ សម្រាប់ កម្ពុជា ទៅចូលរួមប្រកួតតែក្នុងវិញ្ញាសា កុមារក្រោមអាយុ ១១ – ១២ ឆ្នាំ តែប៉ុណ្ណោះ។
ក្រសួងអប់រំយុវជននិងកីឡា បានស្នើទៅសហព័ន្ធកីឡាបាល់ទាត់កម្ពុជា ហើយសហព័ន្ធ បានផ្ដល់ឱកាសឱ្យក្លិបភ្នំពេញក្រោន ជាអ្នកធ្វើការជ្រើសរើសកីឡាករ។ លោក ប៊ូយ ដារី ថាកីឡាករទាំងអស់បានហ្វឹកហាត់ជុំគ្នាក្នុងរយៈពេលប្រហែល ៣ សប្ដាហ៍តែប៉ុណ្ណោះ មុនចេញដំណើរស្អែកនេះ។ ក្នុងចំណោមកីឡាករទាំងអស់បានជ្រើសចេញពី យុវជនថ្នាលក្លិបស្វាយរៀង យុវជនថ្នាលភ្នំពេញក្រោន និង យុវជនមកពីខេត្តបាត់ដំបង ជាដើម។
យោងតាមលិខិតឧទ្ទេសនាមលេខ ៥៣១៣ អយកឧទន ចេញដោយក្រសួងអប់រំយុវជននិងកីឡា បានតែងតាំងលោក ហ៊ុន សាមុត ប្រធាននាយកដ្ឋានអប់រំកាយនិងកីឡា ជាប្រធានប្រតិភូក្រុមកីឡាករកម្ពុជាទៅចូលរួម ខណៈព្រឹត្តិការណ៍ 2013 Asian Youth Football Festa រៀបចំចាប់ពីថ្ងៃទី ៣ ដល់ ៦ តុលា ២០១៣ នៅក្រុង Inchoen ប្រទេសកូរ៉េខាងត្បូង៕
0 comments:
Post a Comment