ទីលានបាល់ទាត់សិប្បនិម្មិត The Goal Academy Sports Club & Bar សហការជាមួយអង្គការ Globalteer Sports Project ក្នុងខេត្តសៀមរាប បានផ្ដួចផ្ដើមបង្កើតជាពានរង្វាន់បាល់ទាត់ហ៊្វូតសាល ដែលកម្មវិធីមួយនេះធ្វើឡើងនៅថ្ងៃទីអាទិត្យ ទី០៣ ខែវិច្ឆិកា ក្នុងគោលបំណងរកជំនួយសប្បុរសធម៌ ផ្ដល់ជូនអង្គការជួយជនក្រីក្រនានានៅក្នុងខេត្ត។
អត្ថបទពាក់ព័ន្ធ៖ ប្រាក់ខែកីឡាករបាល់ទាត់ខ្មែរឆ្នាំនេះប៉ុន្មានដែរ?
ពាក់ព័ន្ធនឹងព្រឹត្តិការណ៍ខាងលើ លោក ថោង ច័ន្ទសោភឹម អ្នកគ្រប់គ្រងទីលានបាល់ទាត់ The Goal ឲ្យដឹងថា ដោយមានការសហការយ៉ាងល្អពី Globalteer Sports Project លោកបានប្រកាសជ្រើសរើសក្រុមហ៊្វូតសាលចំនួន១៦ក្រុម ឲ្យចូលរួមក្នុងពានរង្វាន់សប្បុរសធម៌មួយនេះ។ ចំណែកការដាក់ពាក្យចូលរួម ក្រុមនីមួយៗត្រូវបង់វិភាគទានចំនួន១០ម៉ឺនរៀលចំពោះជនជាតិខ្មែរ និង២០ម៉ឺនរៀលសម្រាប់ជនបរទេស។
ប្រភពដដែលបន្តថា ថវិកាដែលទទួលបានពីការដាក់ពាក្យប្រកួតរបស់ក្រុមទាំងអស់ នឹងត្រូវដក២៥ភាគរយទៅចំណាយលើការរៀបចំកម្មវិធី។ ចំណែកថវិកានៅសល់ទាំងប៉ុន្មានត្រូវបានទៅក្រុមជើងឯក ប៉ុន្តែក្រុមមួយនោះត្រូវជ្រើសរើសអង្គការណាមួយ (ក្នុងខេត្តសៀមរាប) ដែលខ្លួនពេញចិត្ត ដើម្បីបរិច្ចាគថវិកាទាំងអស់នោះ ទៅតាមកិច្ចសន្យាបានធ្វើឡើងក្នុងពេលដាក់ពាក្យចូលរួម។
បន្ថែមលើនេះ ជយលាភីលេខ១ ទទួលបានពានរង្វាន់មួយ និងលេងបាល់៣ម៉ោងឥតគិតថ្លៃ ជើងឯករង លេងបាល់២ម៉ោងឥតគិតថ្លៃ និងចំណាត់ថ្នាក់លេខ៣ លេងបាល់១ម៉ោងឥតគិតថ្លៃ។
អត្ថបទពាក់ព័ន្ធ៖ ហេ៎! បានឃើញឯកសណ្ឋានក្រុម U23 កម្ពុជា ត្រៀម BIDC Cup 2013 ហើយនៅ?
កាលពីខែសីហាកន្លងទៅ The Goal និង Globalteer ធ្លាប់បង្កើតព្រឹត្តិការណ៍មួយនេះម្ដងរួចមកហើយ ពេលនោះក្រុម Team DJ ដែលជាជើងឯកទទួលបានថវិកា៣៥០ដុល្លារ និងបានផ្ដល់ជូនដល់កុមារកំព្រាក្នុង សមាគមសិល្បៈជាឱកាស នៃការអភិវឌ្ឍន៍ ទាំងអស់។
ទីលានបាល់ទាត់សិប្បនិម្មិត The Goal Academy Sports Club & Bar មានទីតាំងស្ថិតនៅក្រោយផ្សារសាមគ្គី សង្កាត់ស្លក្រាម ក្រុងសៀមរាប ខេត្តសៀមរាប។ អាចទំនាក់ទំនងបានតាមទូរសព្ទលេខ ០៦០ ៦៦ ៦៦ ០៦ ឬ ០១៧ ២៥ ១៩ ២០ ឬតាមរយៈហ្វេសប៊ុក The Goal Academy – Sports Club & Bar ៕
អត្ថបទ៖ រស់ កាណាល់
0 comments:
Post a Comment