សាកសពលោក យុង សំ អ្នកបើកបរយន្តហោះជនជាតិខ្មែរ ដែលបានស្លាប់ ក្នុងឧបទ្ទវហេតុធ្លាក់យន្តហោះ ក្នុងប្រទេសឡាវ នឹងត្រូវដឹកជញ្ជូនតាមជើងយន្តហោះមកដល់ប្រទេសកម្ពុជានៅវេលាម៉ោង ១ រសៀលថ្ងៃទី ១៩ ខែតុលា ឆ្នាំ២០១៣។នេះបើយោងតាមប្រសាសន៍ របស់ លោក ហ៊ឹម សារុន នាយខុទ្ទកាល័យ រដ្ឋលេខាធិការដ្ឋាន អាកាសចរណ៍ស៊ីវិល។
អគ្គបញ្ជាការដ្ឋានកងទ័ពជើងអាកាស នៅក្បែរព្រលានយន្តហោះអន្តរជាតិភ្នំពេញ នឹងធ្វើពិធីគោរពវិញ្ញាណ លោក យុង សំ ដោយមានការចូលរួមពីក្រុមគ្រួសាររបស់លោកផងដែរ នៅរសៀលនេះ។លោក យុង សំ អាយុជាង៥០ឆ្នាំ ត្រូវបានរកឃើញនៅម៉ោងជាង៣រសៀល កាលពីថ្ងៃសុក្រម្សិលមិញ។
រដ្ឋាភិបាលឡាវ បានប្រកាសថា អ្នកដំណើរ៤៩នាក់ បានស្លាប់ ក្នុងឧបទ្ទវហេតុធ្លាក់យន្តហោះមួយគ្រឿង នៅដងទន្លេមេគង្គ នៅភាគខាងត្បូងប្រទេស ខណៈយន្តហោះនេះ កំពុងហោះហើយ រៀបចុះចតជួបមេឃចុះអាប់យ៉ាងខ្លាំង កាលពីរសៀលថ្ងៃពុធ ទី១៦ខែតុលា ។យន្តហោះនេះជារបស់ក្រុមហ៊ុនឡាវ Airline ប្រភេទថ្មី (ATR ៧២-៦០០) ទើបតែហោះហើរបានតែជាង៦ខែប៉ុណ្ណោះ។
អត្ថបទ៖មៃ សុខលីម
0 comments:
Post a Comment