ព្រះបរមរូបសម្តេចព្រះ នរោត្តម សីហនុ ត្រូវបានដង្ហែ ទៅតម្កល់ នៅស្តូប ជិតវិមានឯករាជ្យ
ភ្នំពេញ: ព្រះបរមរូបរបស់សម្តេចព្រះ នរោត្តម សីហនុ ត្រូវបានគេដង្ហែ យកទៅតម្កល់នៅស្តូប លើសួនច្បារ ខាងកើតវិមានឯករាជ្យហើយ នាព្រឹកថ្ងៃទី២តុលានេះ។ ព្រះបរមរូប សម្តេចព្រះ នរោត្តម សីហនុ ធ្វើអំពីស្ពាន់ មានកម្ពស់ ៤,៥ ម៉ែត្រ ទ្រង់ឈរលើព្រះផ្នែនមានកម្ពស់ ២,៧ ម៉ែត្រ សាងសង់ នៅលើខឿនរាងចតុកោណកែង មានបណ្តោយ ៥៤ ម៉ែត្រ ទទឹង ២៧ ម៉ែត្រ។
ស្តូបព្រះបរមរូប ព្រះបរមរតនកោដ្ឋ ស្ថិតនៅសួនច្បារ ខាងកើតវិមានឯករាជ្យ ត្រូវបានបញ្ចុះបឋមសិលាសាងសង់ កាលពីថ្ងៃទី២២ ខែកុម្ភៈ ឆ្នាំ២០១៣ ក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី ហ៊ុន សែន និងលោកជំទាវ។
ស្តូបនោះ រចនាតាមទម្រង់បុស្បុក មានកម្ពស់សរុប ២៧ ម៉ែត្រ គិតពីបាតខាងក្រោមដល់កំពូល។ ស្តូបតម្កល់ព្រះបរមរូបព្រះមហាក្សត្រ នឹងត្រូវបើកសម្ពោធ នាថ្ងៃទី១១ ខែតុលា ឆ្នាំ២០១៣ ក្រោមព្រះរាជាធិបតីភាពរបស់ព្រះមហាក្សត្រ សម្តេចម៉ែ សម្តេចហ៊ុនសែន លោកជំទាវ រួមទាំងមន្ត្រីរាជរដ្ឋាភិបាលជាច្រើននាក់ផ្សេងទៀត។
ព្រះមហាវីរក្សត្រ ព្រះបាទ សម្តេចព្រះ នរោត្តម សីហនុ ព្រះបរមរតនកោដ្ឋ បានយាងចូលព្រះទិវង្គត កាលពីថ្ងៃទី១៥ ខែតុលា ឆ្នាំ២០១២ នៅទីក្រុងប៉េកាំង សាធារណរដ្ឋប្រជាមានិតចិន ក្នុងព្រះជន្មាយុ ៩០ ព្រះវស្សា ដោយព្រះរោគគាពាធ។
សម្តេចហ៊ុនសែន បានប្រកាសសាងសង់ព្រះបរមរូបព្រះអង្គ ដើម្បីទុកជានិម្មិត្តរូប ការដឹងព្រះគុណ និងការចងចាំ ព្រះអង្គ ក្នុងប្រវត្តិសាស្ត្រកម្ពុជា ជារៀងរហូត។
ជាមួយគ្នានោះ សម្តេចនាយករដ្ឋមន្ត្រី ហ៊ុន សែន ប្រមុខរាជរដ្ឋាភិបាល ដែលទើបឡើងកាន់តំណែងសាជាថ្មី ក៏បានចេញសារាចរ ណែនាំមួយ ស្តីពី ការប្រារព្ធពិធីគោរពព្រះវិញ្ញាណក្ខន្ធ ព្រះករុណា ព្រះបាទ សម្តេចព្រះ នរោត្តម សីហនុ ព្រះបរមរតនកោដ្ឋ គម្រប់ខួប ១ ឆ្នាំ នាថ្ងៃទី១៥ ខែតុលា ឆ្នាំ២០១៣។
ក្នុងសារាចរ ចុះថ្ងៃទី២៥ ខែកញ្ញា ឆ្នាំ២០១៣ រាជរដ្ឋាភិបាល បានប្រកាសពីការកំណត់យកថ្ងៃទី១៥តុលា ជារៀងរាល់ឆ្នាំ ជាទិវាប្រារព្ធពិធីគោរពព្រះវិញ្ញាណក្ខន្ធ ព្រះករុណា សម្តេចព្រះ នរោត្តម សីហនុ។
ដើម្បីឲ្យការប្រារព្ធពិធីគោរពព្រះវិញ្ញាណក្ខន្ធរបស់ព្រះអង្គ គម្រប់ខួប ១ ឆ្នាំ ប្រព្រឹត្តទៅប្រកបដោយភាពឧត្តុង្គឧត្តម សម្តេចប្រមុខរាជរដ្ឋាភិបាល បានណែនាំដល់គ្រប់ក្រសួង ស្ថាប័ន និងគ្រឹះស្ថានសាធារណៈ និងឯកជន ត្រូវរៀបចំប្រារព្ធពិធីគោរពព្រះវិញ្ញាណក្ខន្ធគម្រប់ខួប ១ ឆ្នាំ នៅថ្ងៃទី១៥ ខែតុលា ឆ្នាំ២០១៣ ឲ្យបានឧត្តុង្គឧត្តម ហើយស្ថាប័នរដ្ឋ ត្រូវចាត់តាំងប្រតិភូ ចូលរួមគោរពព្រះវិញ្ញាណក្ខន្ធ ព្រះករុណា នៅស្តូបព្រះបរមរូប ព្រះអង្គ នៅជិតវិមានឯករាជ្យ។ គ្រប់ស្ថានអគ្គរាជទូត និងស្ថានកុងស៊ុល កម្ពុជា ប្រចាំនៅបរទេស ក៏ត្រូវរៀបចំប្រារព្ធពិធីនេះផងដែរ។
ដោយឡែក រដ្ឋបាលថ្នាក់ក្រោមជាតិគ្រប់លំដាប់ថ្នាក់ ពីថ្នាក់ខេត្តរាជធានី ដល់ថ្នាក់ឃុំសង្កាត់ ព្រមទាំងវត្តអារាម រហូតដល់ប្រជាពលរដ្ឋតាមមូលដ្ឋាន ត្រូវរៀបចំប្រារព្ធពិធីគោរពព្រះវិញ្ញាណក្ខន្ធ គម្រប់ខួប ១ ឆ្នាំ ថ្វាយព្រះករុណាព្រះមហាវីរក្សត្រផងដែរ។
រីឯក្រសួងព័ត៌មាន ក៏ត្រូវចាត់តាំងរៀបចំកម្មវិធីផ្សព្វផ្សាយតាមវិទ្យុ ទូរទស្សន៍ជាតិ ឯកជន អំពីព្រះរាជជីវប្រវត្តិ ព្រះរាជសកម្មភាព និងស្នាព្រះហស្ថរបស់ព្រះករុណា សម្តេចព្រះ នរោត្តម សីហនុ ចំពោះប្រទេសជាតិ និងចំពោះប្រជារាស្ត្រ ឲ្យបានទូលំទូលាយ៕
0 comments:
Post a Comment