ត្រូវផ្លៃព្រួញ មានងៀងមុខពីរដោតជាប់ពោះ មកដល់ពេទ្យស្លាប់
រាជធានីភ្នំពេញ ៖ បុរសម្នាក់ ដែលជាប់ផ្លែព្រួញ នៅនឹងពោះឆ្កឹងដកមិនរួច ដោយសារក្រុមជនមិនស្គាល់មុខ លបបាញ់ប៉ងធ្វើឃាត ពេលចេញពីរាំធុងបាស់ ក្នុងភូមិរបស់ខ្លួន ត្រូវបានក្រុមគ្រួសារបញ្ជូន មកពីខេត្តក្រចេះ ដើម្បីសង្គ្រោះ នៅមន្ទីរពេទ្យកាល់ម៉ែត្រ តែជាអកុសល គ្រូពេទ្យមិនអាចជួយសង្គ្រោះបាន ក៏ត្រូវស្លាប់បាត់បង់ជីវិត កាលពីរសៀលថ្ងៃទី១ ខែតុលា ឆ្នាំ២០១៣។
ជនរងគ្រោះមានឈ្មោះ ឆាន សិទ្ធ អាយុ ១៩ឆ្នាំ ត្រូវក្រុមគ្រូពេទ្យ នៃមន្ទីរពេទ្យកាល់ម៉ែត ជួយធ្វើការវះកាត់ យកផ្លែព្រួញចេញរួចហើយ ក៏ត្រូវស្លាប់តែម្តង។ ជនរងគ្រោះ ត្រូវជនមិនស្គាល់មុខ លួចបាញ់មួយផ្លែព្រួញ ចំពោះជាប់ឆ្កឹង ខណៈដែលដើរចេញពីវង់រាំធុងបាស់ នៅវត្តក្នុងភូមិរបស់ខ្លួន កាលពីវេលាម៉ោង ២២ យប់ ថ្ងៃទី២៩ ខែកញ្ញា ឆ្នាំ២០១៣ ស្ថិតក្នុងភូមិត្នោត ឃុំថ្មី ស្រុកចិត្របុរី ខេត្តក្រចេះ។
ក្រុមគ្រួសារបានបញ្ជូនមកសង្គ្រោះ នៅមន្ទីរពេទ្យកាល់ម៉ែត បន្ទាប់ពីឈ្មោះ ឆាន សិទ្ធ ត្រូវផ្លែព្រួញមុតដោតឆ្កឹងចំពោះ ដកមិនរួចព្រោះផ្លែព្រួញនោះ មានងៀងមុខពីរ។ មុនដំបូងក្រុមគ្រួសារ ក៏បានបញ្ជូនឈ្មោះ ឆាន សិទ្ធ ទៅពេទ្យបង្អែកខេត្តដែរ តែដោយសារ ក្រុមគ្រូពេទ្យនៅទីនោះ មិនអាចជួយសង្គ្រោះបាន ក៏បាននាំមកសង្គ្រោះ នៅមន្ទីរពេទ្យកាល់ម៉ែត ដោយបានធ្វើការវះកាត់ យកផ្លែព្រួញចេញហើយ តែជាអកុសល មិនអាចសង្គ្រោះអាយុជីវិតបាន៕
0 comments:
Post a Comment