UEFA Champions League នឹងវិលត្រលប់មកបម្រើខ្សែចក្ខុប្រិយមិត្តបាល់ទាត់វិញហើយ។ ក្រុមចំនួន១៦ ត្រូវជា៨គូ មកពីពូល៤ផ្សេងគ្នា នឹងត្រូវប្រជែងគ្នាក្នុងសប្ដាហ៍ដំបូងនៃវគ្គសន្សំពិន្ទុតាមពូលនៅយប់នេះ។ តែមុននឹងមើលគូប្រកួតយប់នេះយើងខ្ញុំសូមនិយាយត្រួសៗទាក់ទងនឹងពានរង្វាន់ធំបំផុតរបស់ទ្វីបអឺរ៉ុបមួយនេះបន្តិចសិន។
ក្លិបមកពីប្រទេសទាំងឡាយនៅអឺរ៉ុប បានជួបតទល់គ្នាដណ្ដើមពានរង្វាន់ប្រចាំទ្វីបនេះ អស់រយៈពេល៥៨ឆ្នាំមកហើយ ដែលក្នុងនោះ២១លើកចុងក្រោយ បានប្រើឈ្មោះថាជាពាន UEFA Champions League។
Bayern Munich លើកពានរដូវកាលមុន
នៅយប់នេះវានឹងឈានចូលសប្ដាហ៍នៃរដូវកាលថ្មី ដែលក្រុមមកពីអាល្លឺម៉ង់ និងអេស្ប៉ាញ រំពឹងថាអាចអុកឡុកពានរង្វាន់នេះដូចកាលពីរដូវកាលមុនទៀត ខណៈក្រុមមកពីអង់គ្លេសក៏កំពុងត្រៀមស្រង់ដើមឡើងវិញផងដែរ ក្រោយបាក់មុខរដូវកាលមុន។
ក្រុមការពារជើងឯក Bayern Munich កំពុងចិញ្ចឹមចិត្តចង់ក្លាយជាក្រុមទី១ដែលអាចការពារពាននេះបាន (គិតត្រឹមឆ្នាំ១៩៩២មក) រីឯ Real Madrid ក៏កំពុងលេបទឹកមាត់ចង់ភ្លក់រសជាតិពាននេះជាលើកទី១០ផងដែរ ក្រោយខកខានតាំងពីឆ្នាំ ២០០២មក។
កាលបរិច្ឆេទប្រកួត
៦សប្ដាហ៍នៃវគ្គសន្សំពិន្ទុតាមពូល នឹងចាប់ផ្ដើមពីចាប់ពីយប់ថ្ងៃទី១៧ ខែកញ្ញានេះ ដល់ថ្ងៃទី១១ ខែធ្នូ ២០១៣ ដោយក្រុមកំពូលទាំង២ក្នុងពូលទាំង៨ នឹងត្រូវឡើងទៅវគ្គ១៦ក្រុមចុងក្រោយ ដែលប្រកួតចាប់ពីថ្ងៃទី១៨ ដល់២៥ ខែកុម្ភៈ ២០១៤។ សម្រាប់វគ្គ៨ក្រុមចុងក្រោយនឹងត្រូវធ្វើចាប់ពីថ្ងៃទី១ ដល់ទី៨ ខែមេសា ខណៈវគ្គពាក់កណ្ដាលផ្ដាច់ព្រ័ត្រ គឺចាប់ពីថ្ងៃទី២២ ដល់២៩ ខែដដែល។ ការប្រកួតផ្ដាច់ព្រ័ត្រ នឹងត្រូវធ្វើឡើងនៅកីឡាដ្ឋាន Estadio da Luz នៅទីក្រុង Lisbon ប្រទេសព័រទុយហ្គាល់ នាថ្ងៃទី២៤ ខែឧសភា ២០១៤។
សមាសភាពក្រុម
ក្រុមចំនួន២១កាលពីរដូវកាលមុន បានត្រលប់មកវិញនៅរដូវកាលថ្មីនេះ ដែលក្នុងនោះក្រុមចំនួន៧ ជាក្រុមដែលឡើងដល់វគ្គ៨ក្រុមចុងក្រោយ ពោលគឺមានតែ Malaga តែមួយគត់ដែលឡើងដល់វគ្គ៨ក្រុមរដូវកាលមុន តែបាត់មុខរដូវកាលនេះ។ ក្រុមបង្ហាញខ្លួនលើកដំបូងបំផុតគឺមានតែមួយគត់ក្នុងចំណោមក្រុមទាំង៣២ នោះគឺក្រុម Austria Vienna ខណៈក្លិប១០ផ្សេងទៀតសុទ្ធតែធ្លាប់មានមុខក្នុងការប្រកួតឆ្នាំកន្លងទៅ ទោះមិនបានលេងរដូវកាលមុនក៏ដោយ។
ក្រុមទាំង៣២នៃ Champions League រដូវកាលនេះ (រូបភាព footballandfutbol)
គ្រូបង្វឹក
គ្រូបង្វឹកក្នុងក្លិបធំមួយចំនួនត្រូវបានផ្លាស់ប្ដូរសម្រាប់រដូវកាលនេះ បូករួមទាំងក្រុមយក្ស៣ដែលឡើងដល់វគ្គពាក់កណ្ដាលផ្ដាច់ព្រ័ត្ររដូវកាលមុនផងដែរ។
Pep Guardiola នឹងត្រូវដឹកនាំក្រុមជើងឯកចាស់ Bayern Munich ជំនួសលោក Jupp Heynckes ខណៈ Jose Mourinho វិលរកទ្រនំចាស់ Chelsea វិញ ក្រោយចាកចេញពី Real Madrid។ Carlo Ancelotti ជាអ្នកស្នង Mourinho នៅ Real Madrid ខណៈកៅអីរបស់លោកនៅ Paris Saint Germain នឹងត្រូវអង្គុយជំនួសដោយ Laurent Blanc។
មិនខុសពី Bayern, Chelsea, Real និង PSG នោះទេ ក្រុម Barcelona ក៏មានមុខគ្រូថ្មីនោះដែរ គឺ Gerardo Martino ដែលចូលជំនួស Tito Vilanova។ ងាកទៅមើលបិសាចក្រហម Manchester United វិញ នឹងត្រូវស្ថិតក្រោមការដឹកនាំរបស់ David Moyes ក្រោយលោក Sir Alex Ferguson ចូលនិវត្តន៍។
ក្រុមសង្ឃឹមលើកពាន
ប្រសិនបើឲ្យទាយថាក្រុមណានឹងលើកពាន ចម្លើយគឺគ្មានអ្វីគួរឲ្យសង្ស័យនោះទេ ថាជាក្រុមមកពីអាល្លឺម៉ង់ ឬ អេស្ប៉ាញ ខណៈក្រុមមកពីអង់គ្លេសអាចចូលជម្រើសដែរតែទំនងមិនសូវច្រើន ក្រោយបង្ហាញលទ្ធផលមិនល្អរដូវកាលមុន។ ក្រៅពីក្រុមប្រទេសទាំង៣នេះ ក្រុម Juventus របស់លោក Antonio Conte មកពីអ៊ីតាលី និងក្រុម PSG មកពីបារាំង ក៏មិនអាចមើលរំលងបានដែរ។
ក្នុងចំណោមក្រុមទាំង៣២ គឺមានមកពី១៨ប្រទេសផ្សេងគ្នា ដែលក្នុងនោះ អង់គ្លេស អេស្ប៉ាញ និងអាល្លឺម៉ង់ មានច្រើនក្រុមជាងគេ ពោលគឺចំនួន៤ក្រុមរៀងខ្លួន។ ពូលទាំង៨ មានដូចខាងក្រោម៖
ងាកមើលមើលការប្រកួតយប់នេះវិញ។ ក្រុមជើងឯកចាស់ Bayern Munich នឹងត្រូវបើកទ្វារផ្ទះស្វាគមន៍ក្រុមមកពីរុស្សី CSKA Moscow ក្នុងពូល D។ ចំណែកពូល B ឯណោះវិញ ក្រុមម្ចាស់ជើងឯកច្រើនជំនាន់ជាងគេ (៩ដង) Real Madrid នឹងត្រូវធ្វើដំណើរទៅជួប Galatasaray នៅទួរគី ខណៈ PSG ធ្វើដំណើរទៅក្រិកដើម្បីសួរសុខទុក្ខ Olympiakos ក្នុងពូល C។ ប៉ុន្តែមួយគូទៀតដែលយើងខ្ញុំសូមលើកមកព្យាករណ៍ គឺជំនួបរវាង Manchester United និង Leverkusen ដោយសារតែគូនេះ ប្រិយមិត្តកម្ពុជាអាចមើលការផ្សាយបន្តផ្ទាល់បាន តាមកញ្ចក់ទូរទស្សន៍ហង្សមាស។
អ្នកចាត់ការ Man Utd លោក David Moyes (ស្ដាំ) និងខ្សែការពារ Ferdinand និយាយមុនប្រកួតយប់នេះ
ក្រុមជើងឯកអង់គ្លេស ជួបបញ្ហារបួសកីឡាករសំខាន់២រូប គឺខ្សែប្រយុទ្ធ Danny Welbeck (របួសជង្គង់) និងខ្សែការពារ Phil Jones (របួសកជើង)។ កីឡាករសញ្ជាតិអង់គ្លេសទាំងពីរ មិនអាចចូលហ្វឹកហាត់បានទេកាលពីថ្ងៃចន្ទម្សិលមិញនេះ។ ជាមួយគ្នានេះដែរ Wayne Rooney នឹងបន្តលេងដោយពាក់ប្រដាប់ការពារក្បាល ខណៈ Shinji Kagawa ទំនងជាជាប់ជម្រើស David Moyes វិញ។
ងាកទៅមើល Leverkusen វិញ មិនមានបញ្ហារបួសជាដុំកំភួននោះទេ ប៉ុន្តែក្រុមអាល្លឺម៉ង់មួយនេះ មិនទាន់ប្រាកដពីវត្តមានខ្សែបម្រើ Lars Bender ដែលជួបបញ្ហាត្រគាកនៅឡើយទេ។
ប្រវត្តិជួបគ្នា៤ដងចុងក្រោយនៃក្រុមទាំងពីរនៅ Champions League គឺ Man Utd មិនដែលចាញ់នោះទេ ដោយឈ្នះ២ដង និងស្មើ២ដង (លទ្ធផលដូចតារាងខាងក្រោម)។
គូទាំង៨ ដែលត្រូវប្រកួតម៉ោង ១:៤៥នាទីរំលងអាធ្រាត្រយប់នេះ (ពូល A, B, C, D)៖
ព្យាករណ៍របស់យើងខ្ញុំ៖ Man Utd ឈ្នះ Leverkusen ២-១ ។ ចុះចំណែកប្រិយមិត្តវិញទាយលទ្ធផលយ៉ាងណាដែរ? ក្រៅពីគូនេះ ប្រិយមិត្តក៏អាចបញ្ចេញយោបល់ទាក់ទងនឹងគូ៧ផ្សេងទៀតបានផងដែរ ក្នុងប្រអប់ Comment ខាងក្រោម៕
ដោយ៖ សុខ សុវត្ថិ
ប្រភព៖ fifa, soccerway, bbc
0 comments:
Post a Comment