ក្រុមបាល់ទាត់ជម្រើសជាតិយុវជនក្រោមអាយុ ២៣ ឆ្នាំរបស់ ម៉ាឡេស៊ី ដែលជាឈុតត្រៀមទៅប្រកួតក្នុងពានរង្វាន់ ស៊ីហ្គេម ២០១៣ នៅប្រទេសមីយ៉ាន់ម៉ា ខាងមុខ បានក្លាយជាជើងឯកក្នុងពានរង្វាន់ Pestabola Merdeka 2013 ក្នុងឋានៈជាម្ចាស់ផ្ទះ កាលពីពេលថ្មីៗ។
ពានរង្វាន់ Pestabola Merdeka Cup លើកទី៤១ខាងលើនេះ បានរៀបចំឡើងចាប់ពីថ្ងៃទី ៧ ដល់ ១៤ កញ្ញា ដោយមានក្រុមចូលរួមចំនួន ៤ គឺ U23 សិង្ហបុរី, Thailand Selected Team, U23 មីយ៉ាន់ម៉ា (ជំនួសក្រុម U23 ហ្សកដានី) និងក្រុមម្ចាស់ផ្ទះគឺ U23 ម៉ាឡេស៊ី។ ការប្រកួតប្រើប្រាស់កីឡដ្ឋាន ២ គឺ Darul Makmur Stadium និង Temerloh Mini Stadium។
ក្រុម U23 របស់ ម៉ាឡេស៊ី
ការប្រកួតតម្រូវឱ្យក្រុមទាំង ៣ ប្រកួតគ្នា សន្សំពិន្ទុ។ ក្រុមមានពិន្ទុច្រើនជាងគេ ២ក្រុមឡើងទៅប៉ះគ្នានៅវគ្គផ្ដាច់ព្រ័ត្រ ចំណែក២ ក្រុមពិន្ទុតិចជាងគេ ប្រកួតគ្នាដណ្ដើមចំណាត់ថ្នាក់លេខ ៣។ ជាផ្លូវការ U23 ម៉ាឡេស៊ី លើកពាន តែម្ដងបន្ទាប់ពីយកឈ្នះ U23 មីយ៉ាន់ម៉ា ក្នុងលទ្ធផល ២ – ០ ខណៈក្រុម U23 សឹង្ហបុរី ជាក្រុមលេខ ៣ ក្រោយយកឈ្នះ Thailand Selected Team ២ – ១។
ដំណាលគ្នានោះ កីឡាករ Wan Zack Haikal Wan Noor ខ្សែប្រយុទ្ធរបស់ U23 ម៉ាឡេស៊ី ជាប់ជាកីឡាករល្អប្រចាំពានរង្វាន់ ខណៈដែល មិត្តរួមជាតិគេ គឺ ខ្សែប្រយុទ្ធ Rozaimi Abdul Rahman ទទួលបានស្បែកជើងមាស។
ក្រុម U23 ម៉ាឡេស៊ី លើកពាន
បើងាកមកមើលអតីតកាលវិញ ក្រុមជម្រើសជាតិ កម្ពុជា ធ្លាប់ទៅលេងក្នុងពានរង្វាន់នេះចំនួន ៣ លើកដែរ គឺ លើកទី១ ក្នុងឆ្នាំ ១៩៥៧។ កាលនោះមានប្រទេសចូលរួមចំនួន ៨ ។ ប្រកួតក្នុងជុំជម្រុះដំបូង កម្ពុជា ចាញ់ ហុងកុង ៦ – ២។ ក្រុមកម្ពុជាស្ថិតក្នុងពូលជាមួយក្រុមចាញ់ផ្សេងទៀតដូចជា សឹង្ហបុរី, ភូមា និង ថៃ។ ជាលទ្ធផលនៃវគ្គជម្រុះតាមពូល កម្ពុជា នៅបាតតារាងក្រោយ ប្រកួត ចាញ់ ថៃ ៣ – ១ ចាញ់ភូមា ២ – ១ និង ស្មើ សឹង្ហបុរី ១ – ១។ ឆ្នាំដំបូងនោះ ហុងកុង ជាក្រុមជើងឯក។
ក្រោយមកទៀតក្នុងអំឡុងឆ្នាំ ១៩៧២ កម្ពុជាបានទៅបង្ហាញមុខក្នុងពានរង្វាន់នេះសាជាថ្មី។ ឆ្នាំនោះមានក្រុមចូលរួមចំនួន ១២ ក្រុម។ កម្ពុជាស្ថិតក្នុងពូល A ជាមួយ ម្ចាស់ផ្ទះម៉ាឡេស៊ី ជប៉ុន ហ្វីលីពីន ភូមា និង ស្រីលង្កា។ លទ្ធផលវគ្គជម្រុះតាមពូល កម្ពុជា ចាញ់ ជប៉ុន ៤ – ១ ចាញ់ ម៉ាឡេស៊ី ៦ – ១ ស្មើ ហ្វីលីពីន ២ – ២ ឈ្នះ ភូមា ២ – ១ និង ឈ្នះស្រីលង្កា ៦ – ១។ កម្ពុជា ជាប់ចំណាត់ថ្នាក់លេខ ៣ ក្នុងពូល ត្រូវទៅប្រកួតដណ្ដើមចំណាត់ថ្នាក់លេខ៥ ជាមួយក្រុមហុងកុង ដែលជាក្រុមចំណាត់ថ្នាក់លេខ ៣ នៅពូល B។ លទ្ធផល កម្ពុជា ជាប់ចំណាត់ថ្នាក់លេខ ៥ ក្រោយយកឈ្នះ ហុងកុង ១ – ០។
មួយឆ្នាំបន្ទាប់ ពោលគឺ ឆ្នាំ ១៩៧៣ កម្ពុជា ទៅចូលរួមជាលើកទី ៣ តែមិនបានលទ្ធផលជាផ្លែផ្កានោះទេ។ ប្រកួតដំបូងមុនឈានដល់វគ្គចែកពូល កម្ពុជា ចាញ់ សឹង្ហបុរី ដោយបាល់ប៉េណាល់ទី។ ឆ្ពោះទៅវគ្គចែកពូល កម្ពុជា បន្តចាញ់ កូរ៉េខាងត្បូង ១ – ០ ចាញ់ ម៉ាឡេស៊ី ១ – ០ ចាញ់ ថៃ ៤ – ១ និង ចាញ់ ឥណ្ឌា ៣ – ០។
Pestabola Merdeka Cup អាច ចាត់ទុកថាជាពានរង្វាន់ចំណាស់មួយក្នុងតំបន់អាស៊ាន ព្រោះប្រទេសម៉ាឡេស៊ី បង្កើតពានរង្វាន់នេះឡើងតាំងពីឆ្នាំ ១៩៥៧ ក្នុងបំណងអបអរថ្ងៃឯករាជ្យជាតិរបស់ខ្លួន។ មិនទៀងទាត់ទេ ឆ្នាំខ្លះ ម៉ាឡេស៊ី រៀបចំឱ្យមានការប្រកួតហើយឆ្នាំខ្លះក៏អាកខាន។ ម្ចាស់ផ្ទះតែងតែអញ្ជើញក្រុមជម្រើសជាតិដទៃមកចូលរួមប្រកួត ខណៈក្រុមម្ចាស់ផ្ទះមួយនេះលើកពាន Pestabola Merdeka Cup បាន ច្រើនជាងគេពោលដល់ទៅ ៩ ដង។ រហូតដល់ឆ្នាំ ២០០៧ ទើប ពានរង្វាន់នេះបានប្ដូរសមាសភាពក្រុមចូលរួមពីជម្រើសជាតិឈុតធំ ទៅជា ឈុតយុវជនក្រោយអាយុ ២៣ ឆ្នាំរហូតដល់សព្វថ្ងៃ។ តាំងពីប្ដូរកម្រិតអាយុនៃក្រុមប្រកួតមក U23 ម៉ាឡេស៊ី បានលើពាននេះ ២ ដងមកហើយ គឺ ឆ្នាំ ២០០៧ និង ២០១៣។
ព័ត៌មានកីឡាបាល់ទាត់ក្នុងតំបន់អាស៊ី សូមចុចទីនេះ…
អត្ថបទ៖ ម៉ឺន រស្មី
ប្រភព៖ rsssf & pestabolamerdeka
រូបថត៖ pestabolamerdeka
0 comments:
Post a Comment