Lionel Messi អាចធ្វើបានហ៊ែតទ្រីកជាថ្មីនៅ Champions League ពោលគឺស៊ុតបញ្ចូលទីបាន៣គ្រាប់ ជួយឲ្យ Barcelona ឈ្នះ Ajax ៤-០ នៅថ្ងៃបើកឆាកពូល H នៅកីឡដ្ឋាន Nou Camp យប់មិញនេះ។ នេះជាហ៊ែតទ្រីកលើកទី៤សម្រាប់កីឡាករវ័យ២៦ឆ្នាំរូបនេះប្រចាំពានរង្វាន់នេះ លើសកីឡាករដទៃផ្សេងទៀតក្នុងប្រវត្តិសាស្រ្ដ ហើយក៏ជាគ្រាប់ទី៦២ផងដែរ ដោយនៅចាញ់តែ Raul ម្នាក់ប៉ុណ្ណោះ (៧១គ្រាប់)។
ខ្សែប្រយុទ្ធអន្តរជាតិអាហ្សង់ទីនរូបនេះ បានស៊ុតហ្រ្វីឃីកបញ្ចូលទីគ្រាប់ទី១នៅនាទី២២ មុនបន្ថែម២គ្រាប់ទៀតនៅតង់ទី២ ក្នុងនាទី៥៥ និង៧៥ ខណៈ១គ្រាប់ទៀតរបស់ក្រុមជើងឯកអេស្ប៉ាញមួយនេះ គឺធ្វើបានដោយការតែតរបស់ខ្សែការពារ Gerard Pique នៅនាទី៦៩។
អាចនិយាយលេងបានថា ការធ្វើបានហ៊ែតទ្រីកនេះគឺមានការជំរុញពី Cristiano Ronaldo ដែលធ្វើបានហ៊ែតទ្រីកដូចគ្នានេះដែរកាលពីយប់ម្សិលមិញ ពេល Real Madrid ស៊ី Galatasaray ៦-១។ យ៉ាងណាក្ដី នេះគ្រាន់តែជាការយកមកប្រៀបធៀបលេងរបស់ក្រុមអ្នកគាំទ្រកីឡាករទាំងពីរប៉ុណ្ណោះ។
នៅក្នុងការប្រកួតយប់មិញនេះដែរ Neymar បានបង្ហាញខ្លួនលើកដំបូងនៅក្នុងពានរង្វាន់កំពូលទ្វីបអឺរ៉ុបនេះ ដោយអាចលេងបាន៧២នាទី។ កីឡាករប្រេស៊ីល បានព្យាយាមទម្លុះរបាំងការពាររបស់ក្រុមភ្ញៀវដែរ ប៉ុន្តែមិនអាចបំប៉ោងសំណាញ់ទីបាននោះទេ។
Neymar សោកស្ដាយក្រោយភ្លាត់ឱកាសស៊ុតបញ្ចូលទី
ងាកទៅមើលគូផ្សេងទៀតវិញ ក្រុមតោខៀវ Chelsea បានចាញ់ក្រុម Basel របស់ស្វីស ២-១ លើដីខ្លួនឯង នៅក្នុងពូល E។ Oscar បានជួយឲ្យក្រុមលោក Jose Mourinho នាំមុខមុននៅចុងតង់ទី១ ប៉ុន្តែត្រូវក្រុមភ្ញៀវវាយបកវិញ២គ្រាប់នៅតង់ទី២ ដោយកីឡាករ Mohamed Salah (នាទី៧១) និង Marco Streller។ លទ្ធផល១គូទៀតក្នុងពូលដូចគ្នានេះ គឺ Schalke បំបាក់ Steaua Bucuresti ៣-០ ដែលធ្វើឲ្យក្រុមមកពីអាល្លឺម៉ង់ឡើងឈរលើគេក្នុងពូល។
ចំណូលពូល F ដែលត្រូវបានគេចាត់ទុកថាជាពូលមរណៈវិញនោះ ក្រុមកាំភ្លើងធំ Arsenal បានស៊ីក្រុមម្ចាស់ផ្ទះ Marseille ២-១។ ២គ្រាប់របស់ក្រុមលោក Arsene Wenger ធ្វើបានដោយ Theo Walcott (នាទី៦៥) និង Aaron Ramsey (នាទី៨៤) ខណៈ Jordan Ayew ស៊ុត១គ្រាប់ឲ្យ Marseille។ ជ័យជម្នះនេះគឺជាកំណត់ត្រាថ្មីរបស់ក្លិបដែលមានមូលដ្ឋាននៅទីក្រុងឡុងដុងមួយនេះ ដោយអាចយកឈ្នះការប្រកួតក្រៅដីដល់ទៅ១០ប្រកួតជាប់គ្នា។
Ozil លេងឲ្យ Arsenal នៅ Champions League លើកដំបូង
ចំណែកក្រុមមិនទាន់ចាញ់នៅក្នុងលីកអាល្លឺម៉ង់ Borussia Dortmund បានចាញ់ក្រុមកំពុងឡើងជើងខ្លាំង Napoli ២-១។ ក្រុមម្ចាស់ផ្ទះ Napoli របស់លោក Rafael Benitez បាននាំមុខ២គ្រាប់មុននៅនាទី២៩ និង៦៧ ឯ១គ្រាប់សងវិញរបស់ក្រុមភ្ញៀវកើតឡើងដោយសារការធ្វើឲ្យចូលទីខ្លួនឯងរបស់កីឡាករ Juan Camilo Zuniga។
រីឯពូល G ឯណោះវិញ ក្រុម Atletico Madrid របស់អេស្ប៉ាញ បានបំបាក់ក្រុមភ្ញៀវមកពីរុស្សី Zenit Petersburg ៣-១ ខណៈ FC Porto យកឈ្នះម្ចាស់ផ្ទះ Austria Wien ១-០។ ចំណែក១គូចុងក្រោយក្នុងពូល H ជាមួយ Barca និង Ajax ដែរនោះ គឺ AC Milan យកឈ្នះ Celtic ២-០។
ព័ត៌មានផ្សេងទៀតទាក់ទងនឹង Champions League សូមចុចត្រង់នេះ។
ប្រែសម្រួល៖ សុខ សុវត្ថិ
ប្រភព៖ dailymail
0 comments:
Post a Comment