CR7 ស៊ុត២គ្រាប់ឲ្យ Real បន្តដេញប្រកៀក Barca និង Atletico

ការស៊ុតបញ្ចូលទី២គ្រាប់របស់ Cristiano Ronaldo បានជួយឲ្យ Real Madrid ទទួលបាន៣ពិន្ទុពេញ ដើម្បីបន្តដេញប្រកៀកក្រុមគូប្រជែង Barcelona និង Atletico Madrid។ ៣ពិន្ទុបន្ថែមនេះ ជួយឲ្យក្រុមស្ដេចសកើនដល់១៦ពិន្ទុក្នុង៦ប្រកួត តិចជាង Barca និង Atletico តែ២ពិន្ទុប៉ុណ្ណោះ។

Ronaldo អបអរក្រោយស៊ុតបញ្ចូលទី

យ៉ាងណាក្ដី នៅក្នុងជំនួបទល់នឹងក្រុមបាតតារាង Elche នេះ ក្រុមរបស់លោក Carlo Ancelotti ធ្វើមិនសូវបានល្អនោះទេ ខណៈគ្រាប់ទី២ក្នុងជ័យជម្នះ ២-១ នោះ គឺកើតចេញពីការស៊ុតបាល់ពិន័យ១១ម៉ែត្រដ៏ចម្រូងចម្រាស ដោយសារកីឡាករក្រុម Elche បានតវ៉ានឹងការសម្រេចចិត្តរបស់អាជ្ញាកណ្ដាល។

ជាក់ស្ដែងលោក Ancelotti ក៏បានទទួលស្គាល់ថាក្រុមលោកលេងមិនល្អនោះដែរ។ គ្រូបង្វឹកសញ្ជាតិអ៊ីតាលីរូបនេះបាននិយាយក្រោយការប្រកួតថា៖ “ខ្ញុំមិនសប្បាយចិត្តនោះទេ។ លទ្ធផលនេះគឺមិនគ្រប់គ្រាន់ឡើយ ហើយយើងត្រូវលេងឲ្យល្អជាងនេះ។ ប្រសិនបើយើងនៅតែលេងដូចយប់នេះទៀត យើងនឹងមិនឈ្នះការប្រកួត derby នោះទេ (លេងជាមួយក្រុមរួមទីក្រុងម៉ាឌ្រីត Atletico Madrid)”។

Ronaldo បានស៊ុតបាល់ហ្រ្វីឃីកបញ្ចូលទីឲ្យ Real Madrid នាំមុខមុននៅ៦នាទីដើមតង់ទី២ ប៉ុន្តែ Richmond Boakye បានតែតបញ្ចូលទីឲ្យក្រុមម្ចាស់ផ្ទះតាមស្មើវិញនៅនាទី ៩០+១។ ខណៈដែលសំឡេងកញ្ចែមិនទាន់បន្លឺឡើងក្រោយការថែម៣នាទីហួសបន្តិចទៅហើយនោះ Real មានឱកាសទាត់បាល់ចេញពីជ្រុង ចំពេល Pepe ត្រូវខ្សែការពារ Elche ធ្វើឲ្យដួលក្នុងប្រអប់គ្រោះថ្នាក់។ អាជ្ញាកណ្ដាលបានចង្អុលចំណុលប៉េណាល់ទីដែលធ្វើឲ្យក្រុមកីឡាកររបស់ Elche តវ៉ាការសម្រេចចិត្តនោះរហូតទទួលកាតលឿង៣នាក់ ដែលជាកាតលឿងទី១១សម្រាប់ការប្រកួតនោះ (Elche ៩នាក់ Real ២នាក់)។ យ៉ាងណាក្ដី Ronaldo បានស៊ុតបញ្ចូលទីបាល់ពិន័យ១១ម៉ែត្រនោះនៅនាទី ៩០+៦ ដើម្បីទទួលបាន៣ពិន្ទុទាំងត្រដាបត្រដួស។