ការប្រកួតប្រជែងថតរូប ពីសម្រស់របស់ប្រទេសកម្ពុជាដ៏ធំពុំធ្លាប់មាន នឹងចាប់ផ្ដើមនៅប្រទេសកម្ពុជា ដោយបើកចំហដល់អ្នកថតរូបជាតិ និងអន្តរជាតិទាំងអស់ចូលរួមប្រកួតដោយសេរី។
កម្មវិធី “Imagine Cambodia 2013 photo competition” រៀបចំដោយសណ្ឋាគារ Shinta Mani នៅក្រុងសៀមរាប និងគាំទ្រដោយកម្មវិធីពិព័រណ៍រូបថតប្រចាំឆ្នាំ Angkor Photo Festival បានប្រកាសបើកកម្មវិធីប្រកួតប្រជែងរូបថតពីថ្ងៃនេះទៅហើយ។
បុគ្គលិករបស់សណ្ឋាគារ Shinta Mani លោក កុយ កុល បានឲ្យដឹងថា គោលបំណងនៃការបង្កើតកម្មវិធីនេះគឺដើម្បីទាក់ទាញអ្នកថតរូបទូទាំងពិភពលោក ងាកមកផ្ដិតយកទិដ្ឋភាពស្រស់ស្អាតជាច្រើនរបស់ប្រទេសកម្ពុជា ដើម្បីពិភពលោកបានឃើញផង។
លោកបន្ថែមថា៖ “យើងចង់ឲ្យពិភពលោកបានឃើញនូវភាពស្រស់ស្អាតរបស់កម្ពុជាតាមរយៈរូបភាពរបស់គេ ដែលបានថតពីស្រុកយើង។ យើងយកតែរូបដែលទាក់ទងនឹងសម្រស់របស់កម្ពុជា ប៉ុន្តែ មិនមែនរូបបាតុកម្មទេ។ ខ្ញុំគិតថា ស្រុកយើងមានប្រាសាទបុរាណជាច្រើន និងធម្មជាតិផ្សេងទៀត ដូច្នេះរូបភាពស្អាតៗមិនខ្វះទេ។ យើងមានគោលបំណងចង់ទាក់ទាញមនុស្សបានទស្សនាពីទិដ្ឋភាពដ៏ស្រស់ស្អាតរបស់កម្ពុជាពី៨ទៅ១០លាននាក់ឯណោះ”។
លោកបន្តទៀតថា សម្រាប់លក្ខខណ្ឌនៃការប្រកួតវិញ អ្នកណាក៏អាចចូលរួមបានដែរ ដោយមិនប្រកាន់អាយុ ឬសញ្ជាតិឡើយ។ រូបថតរបស់គេនឹងធ្វើការជ្រើសរើសដោយគណៈកម្មការ ដែលជាអ្នកថតរូបអាជីព និងមានការពិភាក្សាជាមួយនឹង Angkor Photo Festival ផងដែរ។
លក្ខខណ្ឌចូលរួម៖
@ ការបញ្ជូនរូបថតមកប្រកួតប្រជែង អ្នកយល់ព្រមថា អ្នកគឺជាម្ចាស់ និងជាអ្នកបង្កើតរូបនោះ។
@ សណ្ឋាគារ Shinta Mani និង Angkor Photo Festivalនឹងមិនទទួលខុសត្រូវចំពោះការលួចកម្មសិទ្ធិណាមួយឡើយ ប៉ុន្តែនឹងធ្វើការដករូបនោះចេញបើមានការតវ៉ាពីម្ចាស់កម្ម សិទ្ធិ។
@ រូបថតទាំងអស់ដែលបញ្ជូនមកចូលរួមប្រកួត គួរតែមានរក្សាទុកនៅម្ចាស់ដើមផង។ សណ្ឋាគារShinta Mani និង Angkor Photo Festival មានសិទ្ធិបង្ហោះរូបថតទាំងនោះជាលក្ខណៈផ្សព្វផ្សាយអំពីកម្មវិធី ប្រកួតប្រជែង “Imagine Cambodia 2013 photo competition” តែប៉ុណ្ណោះ ហើយផ្សព្វផ្សាយរូបទាំងនេះជាមួយនឹងឈ្មោះនៃម្ចាស់រូបថត។
ពានរង្វាន់៖
@ រូបថតដែលល្បីជាងគេដោយទទួលបានការចុច Likesលើ Facebookច្រើន នឹងឈ្នះរង្វាន់ស្នាក់នៅ៣ថ្ងៃ នៅ Shinta Mani Club, អាហារពេលល្ងាចសម្រាប់មនុស្សពីរនាក់ នៅភោជនីយដ្ឋាន AHA restaurant, ការម៉ាស្សានៅ Shinta Mani Spa, និងខិត្តប័ណ្ណបញ្ចុះតម្លៃទិញកាមេរ៉ាជាង៥០០ដុល្លារ។
@ រូបថតកំពូលៗទាំង១០ដែលត្រូវបានជ្រើសរើសដោយចៅក្រម នឹងត្រូវបានពិព័រណ៍នៅក្នុងពិព័រណ៍ប្រចាំឆ្នាំលើកទី៩ Angkor Photo Festival។
អ្នកថតរូបទាំងអស់ មិនថាខ្មែរ ឬបរទេស អ្នកថតរូបអាជីព ឬមិនអាជីពទេ សុទ្ធតែអាចចូលរួមប្រកួតប្រជែងបាន ដោយរូបថតរបស់គេត្រូវ៖
@ ផ្ញើទៅកាន់ imaginecambodia@shintamani.com។
@ បញ្ជាក់ឈ្មោះFacebookរបស់អ្នកឲ្យបានច្បាស់លាស់ ដូច្នេះគេនឹងTagរូបទាំងនោះទៅកាន់អ្នក!
@ រូបថតនឹងធ្វើការបង្ហោះលើ Facebook ជាប្រចាំថ្ងៃតែម្ដង។
@ កាលបរិច្ឆេទឈប់ទទួលរូបថតប្រកួតប្រជែងចុងក្រោយ គឺនៅថ្ងៃទី១៥ ខែវិច្ឆិកា ឆ្នាំ២០១៣នេះ។
ព័ត៌មានលម្អិត សូមចុចត្រង់នេះ
0 comments:
Post a Comment