ស្លាប់៣នាក់ក្នុង១ថ្ងៃដោយសារលង់ទឹក៣លើកនៅបន្ទាយមានជ័យ
ខេត្តបន្ទាយមានជ័យ៖ ឥទ្ធិពលនៃទឹកជំនន់កំពុងបំផ្លិចបំផ្លាញសមិទ្ធផលសាធារណៈនានា ទ្រព្យសម្បត្តិប្រជាពលរដ្ឋ រហូតជីវិតមនុស្សថែមទៀតផង ជាក់ស្តែងថ្មីៗនេះមានមនុស្សស្លាប់ចំនួន៣នាក់ក្នុង១ថ្ងៃដោយឡែកពីគ្នាដោយសារលង់ទឹកនៅខេត្តបន្ទាយមានជ័យ។ នេះបើតាមគេហទំព័រអគ្គស្នងការដ្ឋាននគរបាលជាតិក្រសួងមហាផ្ទៃកាលពីថ្ងៃសៅរ៍ ម្សិលមិញនេះ។
យោងតាមរបាយការណ៍របស់ស្នងការ ដ្ឋាននគរបាលខេត្តបន្ទាយមានជ័យបានឲ្យដឹងនៅព្រឹកថ្ងៃទី១៩ ខែកញ្ញា ឆ្នាំ២០១៣ នេះថា នៅថ្ងៃទី១៧ ខែកញ្ញា ឆ្នាំ២០១៣ នេះមានមនុស្សស្លាប់រហូតដល់ទៅ៣នាក់ក្នុងរយៈពេលតែ១ថ្ងៃ។
ប្រភពនេះបន្តថា ករណីទី១-នៅវេលាម៉ោង៤និង១០នាទីល្ងាចថ្ងៃទី១៧ ខែកញ្ញា ឆ្នាំ២០១៣ នៅភូមិចុងគោក ឃុំតាឡំ ស្រុកមង្គលបូរី ខេត្តបន្ទាយមានជ័យ មានបុរសចំណាស់ម្នាក់ឈ្មោះ សួ សាន អាយុ៥៥ឆ្នាំត្រូវគេ ប្រទះឃើញសាកសពស្លាប់ដោយសារលង់ទឹកនៅវាលស្រែខាងជើងភូមិចម្ងាយ ១៥០ម៉ែត្រ។តាមការឲ្យដឹងពីនគរបាលស្រុកមង្គឡបូរីបានឲ្យដឹងថា មុនពេលកើតហេតុបុរសចំណាស់បានដើរទៅដោះមងនៅចំណុចកើតហេតុបន្ទាប់ មកក៏មានក្មេងប្រុសម្នាក់បានជិះទូកទៅមើលមងតាមក្រោយពេលទៅដល់កន្លែងដាក់មងស្រាប់តែឃើញមួក និងទ្រុងដាក់ត្រីអណ្តែតមិនឃើញ មនុស្សមានការសង្ស័យក៏ចែវទូកទៅមើលស្រាប់តែឃើញសពបុរសចំណាស់ ស្លាប់ដោយសាច់មងរុំជើងរួចក៏ចែវទូកមកប្រាប់សាច់ញាតិទៅមើល និងយកសពមកធ្វើបុណ្យតាមប្រពៃណី។
ករណីទី២-នៅវេលាម៉ោង២និង៤០នាទីថ្ងៃទី១៧ កញ្ញា ដដែលមានបុរសម្នាក់ឈ្មោះ ហយ ហឿន អាយុ៣០ឆ្នាំនៅភូមិសូភី ឃុំសូភី ស្រុកអូរជ្រៅ ខេត្តបន្ទាយមានជ័យបានស្លាប់ដោយសារលង់ទឹកស្រះនៅខាងក្រោយប៉ុស្តិ៍នគរបាលរដ្ឋបាលសូភីចម្ងាយ៥០ម៉ែត្រ។តាមការឲ្យដឹងពី លោកនាយប៉ុស្ត៏នគរបាលរដ្ឋបាលសូភីបានឲ្យដឹងនៅព្រឹកថ្ងៃទី១៩ កញ្ញានេះផងដែរថា ជនរងគ្រោះជាមនុស្សកើតជំងឺស្កន្ទជាន់។នៅថ្ងៃកើតហេតុ ជនរងគ្រោះបានចុះទៅក្នុងទឹកស្រះដើម្បីបេះព្រលឹតយកមកស្លហូប ចៃដន្យជំងឺស្កន្ទរើឡើងវិញគ្មាននរណាដឹងក៏លង់ទឹកស្លាប់តែម្តង សពត្រូវបានប្រគល់ជូនក្រុមគ្រួសារយកចាត់ចែងធ្វើបុណ្យតាមប្រពៃណី។
ករណី ទី៣-នៅភូមិតាវង ឃុំពន្លៃ ស្រុកភ្នំស្រុក នៅ វេលាម៉ោង៧យប់នាថ្ងៃដដែលនោះដែរមានគេបានប្រទះឃើញសពបុរសចំណាស់ ម្នាក់បានលង់ទឹកប្រឡាយស្លាប់ចម្ងាយពីភូមិ៥០០ម៉ែត្រ។បុរសចំណាស់នោះឈ្មោះ ស៊ុត ញ៉ាញ់ អាយុ៦០ឆ្នាំ នៅភូមិកើតហេតុខាងលើមុនពេលកើតហេតុជនរងគ្រោះស្រវឹងស្រាហើយចុះ ដើរទៅងូតទឹកប្រឡាយតែម្នាក់ឯងក៏លង់ទឹកស្លាប់តែម្តង សពជនរងគ្រោះត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី ហើយផងដែរ៕
0 comments:
Post a Comment