អ្នកប្រហែលជាកំពុងតែពិបាកចិត្តរឿងដុះក្បាលពោះទាំងវ័យក្មេង ចង់ស្លៀកសំលៀកបំពាក់រឹបរាងនឹងគេក៏មិនហ៊ានស្លៀក ជាហេតុធ្វើឲ្យបាត់បងភាពទាក់ទាញអស់មួយកម្រិត។ តើមានវិធីណាដើម្បីសម្រកក្បាលពោះឲ្យរាបស្មើស្អាត?
លោក ហ៊ី ឌីណារិន្ទ ប្រធានក្លឹបហាត់ប្រាណគីងកុង បានប្រាប់ឲ្យដឹងថា មូលហេតុដែលធ្វើឲ្យដុះក្បាលពោះខូចរាងរៅឆាប់រហ័សបែបនេះ ដោយសារតែមិត្តនារីៗមើលរំលងការធ្វើលំហាត់ប្រាណប្រចាំថ្ងៃ។ លោកបានបន្តទៀតថា អ្នកខ្លះគិតតែពីញុំាហើយគេង ការញុំាមិនតបចំណី មិនបានបញ្ចេញសកម្មភាពកីឡា ឬហាត់ប្រាណដើម្បីបណ្ដេញជាតិខ្លាញ់ចេញពីក្នុងខ្លួន សុទ្ធតែជាមូលហេតុនាំឱ្យដុះក្បាលពោះ។
ដោយឡែក មិនមែនដុះតែក្បាលពោះទេ សូម្បីតែនៅខ្នង ដៃ ជើង និងជាពិសេសនៅត្រគាកក៏ប្រែប្រួលធំជាងមុនដែរ។ ប្រធានក្លឹប រូបនេះបានលើកឡើងថា ៖ “ពោះនិងត្រគាកគឺឆាប់ដុះខ្លាញ់លឿនជាងគេ។ ចំពោះនារីដែលចង់សម្រកខ្លាញ់ទាំងនោះត្រូវជ្រើសរើសយកការធ្វើលំហាត់ប្រាណ និងការតមចំណីអាហារដែលជាកត្តាចំាបាច់”។
មិត្តៗសុភាពនារីអាចអនុវត្តក្បាច់ចលនាសម្រកក្បាលពោះដូចជាទីមួយ ដេកឲ្យរាបស្មើ បញ្ឈរជង្គង់ ហើយងើបខ្លួនចុះឡើង។ ក្បាច់ទី២ ដេកឲ្យរាបស្មើហើយ បោះជើងឡើងលើចុះក្រោម។ សម្រាប់ចលនាសម្រកខ្លាញ់ត្រគាកវិញ អ្នកត្រូវលុតជង្គង់ ហើយឱនខ្លួនចុះក្រោម ច្រតដៃទាំងពីរ បន្ទាប់មកធ្វើចលនាបោះជើងទៅក្រោយឡើងលើចុះក្រោម។
ក្រៅពីនេះ អ្នកអាចជ្រើសរើសការធ្វើលំហាត់ប្រាណដោយអនុវត្តចលនាងាយៗ ដូចជា រត់ ធាក់កង់ ដើរ លោតអន្ទាក់ជាដើម។ ប្រធានក្លឹបរូបនេះ ក៏បានបន្តទៀតថា កាលហាត់ប្រាណជាមធ្យមរយៈពេល ៣០នាទីនៅពេលព្រឹកគឺមានប្រសិទ្ធភាពក្នុងការបញ្ឆេះ ដុតបំផ្លាញជាតិខ្លាញ់ក្នុងខ្លួនបានល្អ។ “ពេលព្រឹកគួរហាត់មុនពេលញុំាអាហារពេលព្រឹក ព្រោះអាចបំផ្លាញជាតិពុលដែលបន្សល់ពីអាហារកាលពីយប់ក្នុងខ្លួន”។ លោកបានបន្ថែមដូច្នេះ។
សម្រាប់អាហារដែលមានគុណប្រយោជន៍សម្រាប់ដុតបំផ្លាញជាតិខ្លាញ់រួមមាន ផ្លែឈើ បន្លែ សាច់ត្រី សាច់មាន់។ លោក ឌីណារិន្ទ បញ្ជាក់បន្ថែមទៀតថា ៖ “យ៉ាងណាមិញ បើចង់ស្រកខ្លាញ់នោះគួរ កាត់បន្ថយការញុំាអាហារណាដែលសំបូរដោយជាតិកាបូអ៊ីដ្រាត (carbohydrate) ហើយយកល្អកាត់បន្ថយការញុំាបាយពេលល្ងាច”៕
ចង់ដឹង ម៉េចក៏ប្រុសស្រីកើតស្រែងកន្លែងសំងាត់?
0 comments:
Post a Comment