រឿងរ៉ាវអាថ៌កំបាំងនៅពីក្រោយករណីស្ត្រីបម្រើការងារតាមផ្ទះម្នាក់លេបថ្នាំសម្លាប់ខ្លួនក្នុងផ្ទះរបស់មន្ត្រីគយ
ខេត្តព្រះសីហនុ ៖ នារីវ័យក្មេងម្នាក់ ដែលជាអ្នកបម្រើការងារតាមផ្ទះ បានសម្រេចចិត្តលេបថ្នាំសម្លាប់ខ្លួនកាលពីរសៀលថ្ងៃទី១៦ ខែកញ្ញា ឆ្នាំ២០១៣ នៅត្រង់ចំណុចផ្ទះរបស់មន្ត្រីគយម្នាក់ ដែលនាងរស់នៅជាមួយ ស្ថិតនៅក្នុងភូមិលេខ៣ សង្កាត់លេខ៣ ក្រុងព្រះសីហនុ ដោយពុំដឹងមូលហេតុច្បាស់លាស់។
ប្រភពព័ត៌មានពីខេត្តព្រះសីហនុ បានឲ្យដឹងថា នារីវ័យក្មេងដែលលេបថ្នាំប៉ងសម្លាប់ខ្លួនខាងលើនេះមានឈ្មោះ ហឹត គឹមស៊ន់ អាយុ ២៣ឆ្នាំ មានស្រុកកំណើត ភូមិជ្រុំជ្រី ឃុំចំការអណ្តូង ស្រុកចំការលើ ខេត្តកំពង់ចាម។ សព្វថ្ងៃបម្រើការងារនៅក្នុងផ្ទះរបស់មន្ត្រីគយម្នាក់ឈ្មោះ អាត កនិដ្ឋា ដែលមានទីតាំងនៅចំណុចកើតហេតុខាងលើ។
បើតាមប្រភពពីម្ចាស់ផ្ទះដែលស្ត្រីរងគ្រោះរស់នៅបានឲ្យដឹងថា នៅថ្ងៃកើតហេតុជនរងគ្រោះបានលេបថ្នាំងងុយគេង អស់ប្រមាណជាង២០គ្រាប់ ដើម្បីសម្លាប់ខ្លួន ប៉ុន្តែសំណាងល្អត្រូវបានគេប្រទះឃើញទាន់ ក៏បានបញ្ជូនជនរងគ្រោះមកធ្វើការសង្គ្រោះនៅមន្ទីរពេទ្យបង្អែកខេត្តព្រះសីហនុ។ ទាក់ទិននឹងការសម្លាប់ខ្លួនខាងលើនេះ ត្រូវបានម្ចាស់ផ្ទះឲ្យដឹងថា កន្លងមកស្ត្រីរងគ្រោះតែងតែរអ៊ូរទាំ តូចចិត្តនឹងវាសនាដែលកើតមកមានជីវភាពក្រីក្រ ដើរស៊ីឈ្នួលធ្វើការតាមផ្ទះឲ្យគេ ទើបនាងសម្រេចចិត្តសម្លាប់ខ្លួនបែបនេះ។
ប៉ុន្តែបើតាមប្រភពមួយចំនួនបានឲ្យដឹងថា ប្រាកដជាបញ្ហាអ្វីផ្សេងទៀតនៅពីក្រោយករណីសម្លាប់ខ្លួននេះ ព្រោះខណៈពេលដែលជនរងគ្រោះសម្រាកព្យាបាលនៅមន្ទីរពេទ្យបានតែមួយសន្ទុះ ក៏ត្រូវភាគីម្ចាស់ផ្ទះដឹកបញ្ជូនចេញពីមន្ទីរពេទ្យយកត្រឡប់មកផ្ទះវិញ ដែលទង្វើបែបនេះធ្វើឲ្យគេសង្ស័យថា ប្រហែលជាម្ចាស់ផ្ទះមានបំណងបិទបាំងរឿងអ្វីមួយ ទើបមិនទុកឲ្យជនរងគ្រោះសម្រាកព្យាបាលនៅមន្ទីរពេទ្យបែបនេះ ព្រោះខ្លាចត្រូវក្រុមកាសែតសាកសួរដឹងរឿងរ៉ាវអ្វីផ្សេង៕
ប្រភពពី៖ www.watphnom-news.com
0 comments:
Post a Comment