សាលាបាល់ទាត់ជាតិ បង្កើតឡើងដោយសហព័ន្ធកីឡាបាល់ទាត់កម្ពុជា (FFC)មានទីតាំងនៅ មជ្ឈមណ្ឌលកីឡាបាល់ទាត់ជាតិបាទី គ្រោងនឹងចម្រាញ់យកយុវជនក្រោមអាយុ ១៣ ឆ្នាំ ចំនួន ២០ នាក់ ដើម្បីចូលសិក្សានៅទីនោះ នៅខែ តុលា ខាងមុខ។
ក្រុម U13 ក្នុងទិវាបាល់ទាត់យុវជនក្រោមអាយុ ១៣ ឆ្នាំនាពេលកន្លងទៅ
លោក ម៉ៃ តុលា អគ្គលេខាធិការរងសហព័ន្ធកីឡាបាល់ទាត់កម្ពុជា បានប្រាប់ថា FFC គ្រោងនឹងជម្រុះកីឡាករ U13 ដែលរើសបានប្រមាណជា ១១៦ នាក់កាលពី ប្រកួតទិវាបាល់ទាត់កុមារជាតិ យុវជនក្រោមអាយុ ១៣ ឆ្នាំ ដែលរៀបចំឡើងកាលពី ខែ កក្កដា កន្លងទៅ ឱ្យសល់តែ ២០ នាក់តែម្ដង។
តាមការគ្រោងទុកការជម្រុះនឹងធ្វើឡើងរយៈពេល ៣ ថ្ងៃ គឺនៅថ្ងៃទី ១៦ ដល់ ១៩ ខែ តុលា ដោយនឹងកោះហៅកីឡាករដែលមានឈ្មោះទាំងអស់ ទៅបោះជុំរុំ ស្នាក់នៅរួមគ្នា។ ការដាក់ពិន្ទុចំពោះកីឡាករម្នាក់ៗ នឹងស្ថិតក្រោមការត្រួតពិនិត្យវាយតម្លៃម៉ត់ចត់ពីគ្រូបង្វឹកមកពីជប៉ុនម្នាក់ និង គ្រូបង្វឹកជនជាតិខ្មែរ មួយចំនួនទៀត និងថែមទាំងមានការផ្ដល់មតិយោបល់ពី មន្រ្តី FIFA ថែមទៀតផង ដើម្បីធានាការចម្រាញ់បានក្មេងមានទេពកោសល្យច្បាស់លាស់។
ទីលានមជ្ឃមណ្ឌលកីឡាបាល់ទាត់ជាតិ ទន្លេបាទី
នៅពេលជ្រើសរើសបានកីឡាករទាំង ២០ រូប រួចរាល់ គម្រោងសាលាបាល់ទាត់នេះនឹងដំណើរការនៅមជ្ឈមណ្ឌលកីឡាបាល់ទាត់ជាតិបាទី ក្នុងខេត្តតាកែវ ក្នុងរយៈពេល៤ ឆ្នាំនៃគម្រោងលើកទី១ ក្រោមការដឹកនាំដោយសហព័ន្ធកីឡាបាល់ទាត់កម្ពុជា។ ក្នុងនោះមានដៃគូគម្រោងមួយចំនួនដូចជា ក្រសួងអប់រំយុវជន និង កីឡា នាយកដ្ឋានកីឡាសិស្សនិងនិស្សិត នាយកដ្ឋានអប់រំកាយនិងកីឡា គណៈកម្មាធិការជាតិអូឡាំពិកកម្ពុជា សមាជិកសហព័ន្ធកីឡាបាល់ទាត់កម្ពុជា និង សហព័ន្ធកីឡាបាល់ទាត់អន្តរជាតិ។
កន្លងមក ឯកឧត្ដម សៅ សុខា ប្រធានសហព័ន្ធកីឡាបាល់ទាត់កម្ពុជា ធ្លាប់មានប្រសាសន៍សង្កត់ធ្ងន់ពីសាលាបាល់ទាត់ជាតិនេះថា៖ “យើងគិត ហើយយើងធ្វើ…។ បើគ្មានសាលាបាល់ទាត់នេះទេ ខ្ញុំគ្មានជំនឿថា បាល់ទាត់យើងមានឱកាសយកពានមកស្រុកនោះទេ”។
ការបង្កើត សាលាបាល់ទាត់ជាតិ របស់ FFC គឺជាជំហាននៃការពង្រឹងបណ្ដុះបណ្ដាលថ្នាលយុវជន និង ជាផ្នែកមួយដើម្បីត្រៀមខ្លួនពេលកម្ពុជាធ្វើជាម្ចាស់ផ្ទះ ស៊ីហ្គេម ឆ្នាំ ២០២៣ ខាងមុខ។ នេះជាលើកដំបូងដែរដែល FFC ចាប់ផ្ដើមយុទ្ធនាការបណ្ដុះបណ្ដាលយុវជនថ្នាលរបស់ខ្លួនសំដៅការអភិវឌ្ឍន៍សន្ទុះបាល់ទាត់ជាតិ ខណៈមហាជនក៏កំពុងសាទរនឹងចំណាត់ការដ៏ថ្មីសន្លាងមួយនេះផងដែរនោះ៕
អត្ថបទ៖ ម៉ឺន រស្មី
0 comments:
Post a Comment