គេហទំព័រអន្តរជាតិធំៗបានចុះផ្សាយព្រោងព្រាតកាលពីពេលថ្មីៗនេះថា កំពូលតារាសម្ដែងហូលីវូដសញ្ជាតិពីរអាមេរិក-ខ្មែរ Angelina Jolie បានទម្លាយរឿងដ៏សោកសៅថា នាងប្រហែលជាអាចរស់បានបីឆ្នាំទៀតប៉ុណ្ណោះ។
បើយោងតាមគេហទំព័រ National Enquirer និង Asia Town បានឱ្យដឹងថា Brad Pitt និងអ្នកម្ដាយកូនប្រាំមួយនាក់បានទម្លាយរឿងដ៏សោកសៅថា Jolie អាចរស់បានតិចជាងបីឆ្នាំទៀតប៉ុណ្ណោះ។
កាលពីបួនខែមុន តារាសម្ដែងចិត្តធម៌ Angelina Jolie បាន ទម្លាយអាថ៌កំបាំង ដែលធ្វើឲ្យមនុស្សគ្រប់គ្នាមានការភ្ញាក់ផ្អើល និងសោកសៅយ៉ាងខ្លាំង គឺនាងបានសម្រេចចិត្តវះកាត់សុដន់ទាំងសងខាងចោលបន្ទាប់ពីពិនិត្យឃើញថា នាងអាចប្រឈមនឹងជំងឺមហារីកសុដន់។
Angelina Jolie បាននិយាយប្រាប់កាសែត New York Time កាលនោះថា នាងអាចប្រឈមមុខកើតជំងឺមហារីកសុដន់ដល់ទៅ ៨៧% និងអាចមានជំងឺមហារីកអូវែ ៥០%។ ដូច្នេះជម្រើសដែលនាងមានតែមួយគត់ គឺព្យាបាលដោយវះកាត់យកសុដន់ទាំងសងខាងនេះចេញ។ គ្រូពេទ្យបាននិយាយថា ទោះបីជាវះកាត់បានដោយជោគជ័យហើយក៏ដោយ ក៏លទ្ធភាពកើតជំងឺមហារីកសុដន់នៅតែមានដដែល ពោលគឺនាងនៅតែប្រឈម ៥% ខណៈដែលមិនទាន់វះកាត់មានប្រមាណ ៨៧%។
រឿងដ៏សោកសៅមួយទៀតនោះ គឺបន្ទាប់នាងប្រកាសថាវះកាត់បាន ២សប្ដាហ៍ប៉ុណ្ណោះ ម្ដាយមីងរបស់នាងក៏បានស្លាប់ដោយមហារីកសុដន់ ដែលមានជំងឺដូចនាងដែរ ដែលធ្វើឱ្យបាក់ទឹកចិត្តយ៉ាងខ្លាំង។
ប្រភពស្និទ្ធនឹង Brad និង Angelina បានអះអាងថា ៖ “Angelina កំពុងតែព្យាយាមរស់ឱ្យបានច្រើនជាងនេះ ព្រោះថានាងដឹងខ្លួនថា មិនអាចរស់នៅបានយូរទៀតទេ”។ ប្រភពបន្តទៀតថា ៖”នាងនឹងធ្វើអ្វីៗគ្រប់យ៉ាងតាមតែអាចធ្វើទៅបានដើម្បីពន្យារអាយុរបស់របស់នាង ប៉ុន្តែនាងមានជំនឿថា នាងមិនអាចរស់នៅបានដល់អាយុ ៤៥ឆ្នាំនោះឡើយ”។
កំពូលតារាសម្ដែងវ័យ ៣៨ឆ្នាំរូបនេះ បានទម្លាយរឿងដ៏សោកសៅបែបនេះ ដោយសារសមាជិកមួយចំនួននៃគ្រួសាររបស់នាង សុទ្ធតែមានអាយុខ្លី ដោយសារតែកើតជំងឺមហារីក។ ជាក់ស្ដែង ម្ដាយបង្កើតរបស់ Jolie គឺអ្នកស្រី Marcheline Bertrand បានស្លាប់នៅអាយុ ៥៦ឆ្នាំដោយសារតែជំងឺមហារីកអូវែ ខណៈដែលជីតា យាយ និងអំ ខាងម្ដាយសុទ្ធតែស្លាប់ដោយសារជំងឺមហារីក។
ប្រភពផ្សេងទៀតបានបង្ហើបថា នេះអាចជាហេតុផលមួយដែល Jolie និង Brad Pit ប្រញាប់រៀបការឱ្យបានឆាប់ ព្រោះបើនាងម៉េចៗទៅ ចំណងអាពាហ៍ពិពាហ៍របស់នាង នឹងអាចជួយថែរក្សាកូនទាំង៦របស់នាងឱ្យបានល្អប្រសើរ៕
0 comments:
Post a Comment