ឥណ្ឌូណេស៊ី និងថៃ នឹងឡើងប៉ះគ្នាវគ្គផ្ដាច់ព្រ័ត្រវិញ្ញាសាបាល់ទាត់បុរស ប្រចាំព្រឹត្តិការណ៍កីឡាស៊ីហ្គេមលើកទី២៧ នៅប្រទេសមីយ៉ាន់ម៉ា នាថ្ងៃសៅរ៍ ទី២១ ខែធ្នូស្អែកនេះ ក្រោយបំបាក់គូប្រកួតរៀងខ្លួនក្នុងវគ្គពាក់កណ្ដាលផ្ដាច់ព្រ័ត្រកាលពីម្សិលមិញ។
កីឡាករឥណ្ឌូណេស៊ី (ក្រហម) ប្រជែងយកបាល់ជាមួយម៉ាឡេស៊ី
ឥណ្ឌូណេស៊ីដែលឈ្នះកម្ពុជា ១-០ ទាំងចម្រូងចម្រាស់ក្នុងវគ្គសន្សំពិន្ទុតាមពូល បានយកឈ្នះម្ចាស់មេដាយមាសចាស់ម៉ាឡេស៊ី ៤-៣ ដោយបាល់ប៉េណាល់ទីកាត់សេចក្ដី ក្រោយស្មើគ្នា ១-១ ក្នុងម៉ោងធម្មតា និងម៉ោងបន្ថែម១៥នាទីពីរដង។ ១គ្រាប់របស់ឥណ្ឌូណេស៊ី ធ្វើបានដោយ Bayu Gatra រីឯមួយគ្រាប់របស់ម៉ាឡេស៊ីធ្វើបានដោយ Thamil Arasu។ ចំណែកគ្រាប់បាល់ប៉េណាល់ទី៤គ្រាប់របស់ឥណ្ឌូណេស៊ីធ្វើបានដោយ Alfin Ismail, M. Diego, Yandi Sofyan និង Ferinando Pahabol ខណៈ៣គ្រាប់របស់ម៉ាឡេស៊ីធ្វើបានដោយ Mohd Nazmi Faiz, Mohd Fadhli Shas និង Rozaimi Abdul Rahman។
លទ្ធផលនេះ គឺជាការសងសឹកយ៉ាងល្អបំផុតមួយសម្រាប់ឥណ្ឌូណេស៊ី ត្បិតអីក្រុមនេះធ្លាប់ចាញ់គូប្រជែងអ្នកជិតខាងម៉ាឡេស៊ីដោយបាល់ប៉េណាល់ទីក្នុងលទ្ធផលដូចគ្នានេះក្នុងវគ្គផ្ដាច់ព្រ័ត្រលើដីខ្លួនឯងកាលពីស៊ីហ្គេម២ឆ្នាំមុន។
ងាកទៅមើលជំនួបពាក់កណ្ដាលផ្ដាច់ព្រ័ត្រមួយគូទៀតវិញ គឺក្រុមថៃដែលស្មើកម្ពុជា ០-០ ក្នុងវគ្គជម្រុះតាមពូល បានយកឈ្នះសិង្ហបុរី ១-០។ ១គ្រាប់ដែលជួយឲ្យថៃឡើងដណ្ដើមមេដាយមាសជាមួយឥណ្ឌូណេស៊ីនេះ ធ្វើបានដោយការស៊ុតបាល់ពិន័យ១១ម៉ែត្រ Praweenwat Boonyong នៅនាទី២៣ ក្រោយ Madhu Mohana បង្កកំហុសលើ Charyl Chappuis។
កីឡាករក្រុម U-23 ថៃ អបអរក្រោយស៊ុតបញ្ចូលទី
ការប្រកួតវគ្គផ្ដាច់ព្រ័ត្រដណ្ដើមមេដាយមាសរវាងឥណ្ឌូណេស៊ី និងថៃ នឹងធ្វើឡើងនៅម៉ោង៨នាទីយប់ថ្ងៃសៅរ៍ស្អែកនេះ នៅកីឡដ្ឋាន Zayar Thiri Stadium ក្នុងទីក្រុងថ្មីរបស់មីយ៉ាន់ម៉ា Nay Pyi Taw។ ចំណែកម៉ាឡេស៊ី និងសិង្ហបុរី នឹងត្រូវប្រកួតដណ្ដើមមេដាយសំរឹទ្ធវេលាម៉ោង៤:៣០ល្ងាចក្នុងកីឡដ្ឋានដដែលនោះ។
តើប្រិយមិត្តគិតថា ថៃ ឬ ឥណ្ឌណេស៊ី នឹងដណ្ដើមបានមេដាយមាសបាល់ទាត់បុរសនៅស៊ីហ្គេមឆ្នាំនេះ?
0 comments:
Post a Comment