ក្រុមបាល់ទាត់ជម្រើសជាតិម៉ិកស៊ីកូ បានក្លាយជាប្រទេសទី៣១ ដែលមានឈ្មោះទៅលេងជុំផ្ដាច់ព្រ័ត្រ FIFA World Cup នៅប្រទេសប្រេស៊ីល ឆ្នាំក្រោយ។
Oribe Peralta (លេខ១៩) អបអរក្រោយស៊ុតបញ្ចូលទីឲ្យម៉ិកស៊ីកូ
ក្រុមមកពីតំបន់ CONCACAF មួយនេះ បានយកឈ្នះម្ចាស់ផ្ទះ នូវែលហ្សេឡង់ ៤-២ នៅក្នុងការប្រកួតជើងទី២ វគ្គ play-off ឆ្លងទ្វីបអម្បាញ់មិញនេះ ដែលធ្វើឲ្យគ្រាប់បាល់សរុបទាំងពីរជើង កើនដល់ ៩-៣ (ជើងទី១ ម៉ិកស៊ីកូ ឈ្នះ ៥-១)។
គ្រាប់បាល់ទាំង៤របស់ម៉ិកស៊ីកូក្នុងជើងទី២នេះ ធ្វើបានដោយកីឡាករវ័យ២៩ឆ្នាំ Oribe Peralta ៣គ្រាប់ម្នាក់ឯង (នាទី១៤, ២៩, ៣៣) និង១គ្រាប់ទៀតធ្វើបានដោយ Carlos Alberto Pena នៅ៤នាទីមុនចប់ការប្រកួត។ ចំណែក២គ្រាប់របស់នូវែលហ្សេឡង់វិញ ធ្វើបានដោយការស៊ុតបាល់ពិន័យ១១ម៉ែត្ររបស់ Chris James នៅនាទី៨០ និងដោយ Rory Fallon នៅ៤នាទីបន្ទាប់។
Oribe Peralta ធ្វើបានហ៊ែតទ្រីកឲ្យម៉ិកស៊ីកូ
ជ័យជម្នះដ៏ផុយៗទាំង២ជើងនេះ នឹងធ្វើឲ្យម៉ិកស៊ីកូ ក្លាយជាក្រុមទី៣១ដែលត្រូវប្រជែងនៅ World Cup 2014 ខណៈកៅអីនៅសល់តែ១ទៀតប៉ុណ្ណោះ។ កៅអីមួយចុងក្រោយនោះ គឺជាការប្រជែងគ្នាយករវាងក្រុមលេខ៥តំបន់អាមេរិកខាងត្បូង អ៊ុយរុយហ្គាយ និងក្រុមលេខ៥ តំបន់អាស៊ី ហ្សកដានី វេលាម៉ោង៦ព្រឹកស្អែកនេះ។ យ៉ាងណាក្ដី អ៊ុយរុយហ្គាយ មានសង្ឃឹមខ្ពស់ណាស់ ត្បិតបានស៊ីក្នុងជើងទៅ១នៅក្រៅដីដល់ទៅ ៥-០ ទៅហើយនោះ។
ម៉ិកស៊ីកូក្លាយជាប្រទេសទី៣១ដែលជាប់ទៅ World Cup៖
| តំបន់ | ប្រទេសដែលជាប់ទៅ World Cup |
| អាស៊ី | ជប៉ុន, កូរ៉េខាងត្បូង, អ៊ីរ៉ង់, អូស្ត្រាលី |
| អឺរ៉ុប | បែលហ្សិក, បូស្នី-ហឺហ្ស៊េហ្គោវីណា, អង់គ្លេស, អាល្លឺម៉ង់, អ៊ីតាលី, ហុល្លង់, ព័រទុយហ្គាល់, រុស្សី, ស្វីស, អេស្ប៉ាញ, ក្រូអាត, បារាំង, ក្រិក |
| អាហ្វ្រិក | កាមេរ៉ូន, ហ្គាណា, កូឌីវ័រ, អាល់ហ្សេរី, នីហ្សេរីយ៉ា |
| អាមេរិកកណ្ដាល, ខាងជើង, ការីប៊ីន (CONCACAF) | កូស្ដារីកា, ហុងឌុយរ៉ាស់, សហរដ្ឋអាមេរិ, ម៉ិកស៊ីកូ |
| អាមេរិកខាងត្បូង | អាហ្សង់ទីន, ប្រេស៊ីល (ម្ចាស់ផ្ទះ), កូឡុំប៊ី, អេក្វាឌ័រ, ឈីលី |
អត្ថបទទាក់ទង៖ Ronaldo ហ៊ែតទ្រីកនាំព័រទុយហ្គាល់ទៅ World Cup ខណៈបារាំង ក្រូអាត ក្រិក ក៏ទៅតាមដែរ
0 comments:
Post a Comment