ផលិតកម្មថោនបង្ហើបសញ្ញានិពន្ធបទភ្លេងដោយខ្លួនឯង
បន្ទាប់ពីផលិតកម្មល្បីៗក្នុងស្រុកខ្មែរមួយចំនួន ត្រូវយុវវ័យកម្ពុជាសម្ដែងនូវការមិនពេញចិត្តចំពោះបទចម្រៀងខ្មែរ ដែលស្ទើរតែ ៨០% ចម្លងទំនុកភ្លេង និងកាយវិការពីបទបរទេសរួចមក ផលិតកម្មថោនបានផ្ដើមបង្ហើបសញ្ញានិពន្ធបទភ្លេងថ្មី ដើម្បីប៉ះប៉ូវបញ្ហាដែលត្រូវបានគេរិះកាលពីពេលថ្មីៗនេះ។
តាមរយៈទំព័រហ្វេសបុករបស់អ្នកនិពន្ធប្រចាំផលិតកម្មថោនមួយរូប លោកបានបង្ហាញពី Logo មួយដែលសរសេរបញ្ជាក់ថា៖ “បទថ្មី ភ្លេងថ្មី Original Song From Town Production”។ គ្រាន់តែឃើញ Logo មួយនេះភ្លាម យុវវ័យអ្នកលេង Facebook ជាច្រើនបានចូលទៅ Comment ដើម្បីបញ្ជាក់ពីទឹកចិត្តគាំទ្រស្នាដៃកូនខ្មែរ ដែលខំប្រឹងនិពន្ធបទភ្លេងថ្មីដោយខ្លួនឯង។
រូបភាពដកស្រង់ចេញពីទំព័រហ្វេសបុករបស់លោក Dore Som អ្នកនិពន្ធនៅ Town
ជាក់ស្ដែងថ្មីៗនេះបទចម្រៀងរបស់លោក ខេម មានចំណងជើងថា “សារភាពស្នេហ៍តែអូនមិនស្រលាញ់ ” ផលិតកម្មថោនក៏បានដាក់ Logo មួយនេះនៅពីក្រោមបទចម្រៀងនេះដែរ។
លោក សំណាង និស្សិតបញ្ចប់ផ្នែកអក្សរសាស្រ្ដអង់គ្លេស ពីសាកលវិទ្យាល័យបញ្ញាសាស្រ្ដ បានសម្ដែងនូវការគាំទ្រយ៉ាងខ្លាំងចំពោះទឹកចិត្តអ្នកនិពន្ធបទភ្លេង និងទំនុកច្រៀងថ្មីថា ក្នុងនាមលោកជាអ្នកចូលចិត្តស្ដាប់ចម្រៀងមួយរូប លោកពេញចិត្តយ៉ាងខ្លាំងនៅពេលដែលផលិតកម្មក្នុងស្រុកមួយចំនួន ចាប់ផ្ដើមយល់ពីបញ្ហានេះ។
លោកបន្តថា “ក្មេងសម័យនេះឱ្យតែបទនិពន្ធដោយខ្មែរផ្ទាល់ គឺគេគាំទ្រណាស់មិនថាគេឬក៏ខ្ញុំទេ តែបើដឹងថាចម្លងគេហើយ ហើយដាក់ឈ្មោះនិពន្ធដោយខ្លួនឯងនោះ គឺគេរឹតតែស្អប់លើសដើម ”។
ចំណែកឯកញ្ញា គីមលី និស្សិតឆ្នាំទី ៣ នៅសាកលវិទ្យាល័យន័រតុន ផ្នែក Business បានលើកឡើងថា ឱ្យតែខ្មែរយើងខំប្រឹងនិពន្ធដោយខ្លួនឯង ថ្ងៃណាមួយសិល្បៈខ្មែរយើងនឹងកាន់តែរីកចម្រើនមួយកម្រិតថែមទៀតហើយ។
យុវតីរូបនេះបន្តថា “តាមខ្ញុំដឹង បទចម្រៀងខ្មែរសម័យនេះ ដូចជាមិនទាន់ឃើញមានបទណាមួយដែលធ្វើឱ្យគេស្គាល់ចម្រៀងខ្មែរនៅឡើយទេ។ ប៉ុន្តែបើផលិតកម្មទាំងអស់ខំប្រឹងនិពន្ធដោយខ្លួនឯង ខ្ញុំជឿជាក់ថាប្រទេសគេ នឹងស្គាល់បទ និងអ្នកចម្រៀងខ្មែរជាមិនខាន ”៕
ចុះ nob70 ទាំងអស់គ្នា មានដឹងថាផលិតកម្មណាទៀត ដែលចាប់ផ្ដើមនិពន្ធបទចម្រៀងដោយខ្លួនឯង?
ដោយ nob70
0 comments:
Post a Comment