ថ្វីបើ អ្នកនាង ខាត់ សុឃីម និង លោក អ៊ិន សុបញ្ញា ហៅ ផាណូ បានរៀបអាពាហ៍ពិពាហ៍ត្រឹមត្រូវតាមប្រពៃណី និងរហូតមានកូនហើយយ៉ាងណាក្ដី ប៉ុន្ដែគ្រួសារមួយនេះ នៅតែរុំរឹតដោយព័ត៌មានរង្គោះរង្គើលពីទំនាក់ទំនងគ្រួសារ។
ដំណឹងមិនល្អទាំងនោះ ហាក់ជាស្រមោលអន្ទោតាមប្រាណ ដែលធ្វើឲ្យគូស្វាមី ភរិយា ទាំងពីរ មានការធុញទ្រាន់ និង បានចាត់ទុកថា ពួកគេកំពុងច្រណែន និងចង់បំបែកបំបាក់ទំនាក់ទំនងមួយនេះ ខណៈអ្នកនាង និងស្វាមី រួមទាំងកូនៗ កំពុងរស់នៅមានសុភមង្គល។
សូមចុចអាន៖ ខាត់ សុឃីម ទៅច្រៀងតាមរោងការទាំងប្រថុយ
មុននេះបន្តិច សាមីខ្លួនផ្ទាល់ គឺតារាសម្ដែងពហុជំនាញ អ្នកនាង ខាត់ សុឃីម បានចេញមុខទម្លាយពីបច្ចុប្បន្នភាព នៃចំណងស្នេហ៍របស់ពូកគេ និងបកស្រាយចំពោះពាក្យ មិនចុះសម្រុងគ្នានេះថា មិនដូចអ្វីដែលបានលើកឡើងនោះទេ។ អ្នកទាំងពីស្រលាញ់គ្នាណាស់ បន្ទាប់ពីការស្វែងយល់ចិត្តគ្នាអស់រយៈពេលយូរគ្រាន់បើដែរ ទោះបីជារងពាក្យរង្គោះរង្គើ និងបន្តលងបន្លាចនៅឡើយក្ដី។
“តាំងពីពូកយើងចាប់ផ្ដើមស្រលាញ់គ្នាមកម្ល៉េះមានព័ត៌មានមិនល្អរហូត ហើយក្រោយពេលរៀបការមានកូនក៏នៅតែមានព័ត៌មានមិនល្អនិយាយពីម្នាក់ទៅម្នាក់ដែរ”។ អ្នកនាងចង់យកពេលវេលានេះ ប្រាប់ទៅមហាជនថា នេះជាការញុះញង់ធ្វើឲ្យគ្រួសាររបស់នាងមានការរង្គោះរង្គើ ដែលអាចកើតចេញពីការច្រណែន និងមិនចង់ឃើញសុភមង្គលរបស់ពូកគេប៉ុណ្ណោះ។ ស្វាមីស្រលាញ់អ្នកនាង ពេលខ្លះស្ទើរតែមិនឲ្យធ្វើអ្វីផង សូម្បីដើរកាត់សក់តាមរោងការជាដើម។
“អ្នកខ្លះទៅគេនិយាយដូចដឹងថា ប្ដីខ្ញុំស្អប់កូនប្រុសខ្ញុំអាច្បងណាស់ (អាស្កាយ) សូម្បីតែមើលមុខក៏អត់ដែរ” ។ អ្នកនាងអះអាងថា ការលើកឡើងបែបនេះក៏ផ្ទុយពីការពិតទាំងស្រុង ហើយលោក ផាណូ ជាប្ដីវិញមិនមែនជាមនុស្សដូច្នេះទេ ហើយមិនដែលចាត់ទុកកូនប្រុសម្នាក់នេះជាអ្នកដទៃឡើយ ដោយជួយណែនាំបង្ហាត់បង្រៀនជារៀងរាល់ថ្ងៃ ឬធ្វើសកម្មភាពល្អៗជាច្រើន។ និយាយដល់ចំណុចនេះ អ្នកនាង ខាត់ សុឃីម បានប្រែពីសំឡេងលះច្បាស់ជំនួសដោយសំឡេងអួលដើមក បញ្ជាក់ពីអារម្មណ៍រំភើបរបស់ខ្លួនចំពោះប្ដី។
សូមចុចអាន៖ ខាត់ សុឃីម សម្រាលបានកូនស្រី
“ខ្ញុំមានមោទនភាពខ្លាំងណាស់ចំពោះអ្វី ដែលមាននាពេលនេះ និងមិននឹកស្មានថា បានជួបបុរសល្អដូចជាស្វាមី គឺជាសំណាងធំបំផុតក្នុងជីវិតរបស់ខ្ញុំហើយ”។ ដោយឡែកនៅលើបណ្ដាញសង្គមវិញ គេសង្កេតឃើញមានរូបថតជាច្រើននៃគ្រួសារអ្នកទាំងពីរបង្ហាញពីភាពស្និទ្ធស្នាល និងសប្បាយរីករាយបានបង្ហោះជាបន្តបន្ទាប់ ដែលមិនសមទំនងជាគ្រួសារមានភាពរកាំរកូសនោះទេ។
អ្នកនាង ខាត់ សុឃីម និងលោក អ៊ិន សុបញ្ញា បានរៀបអាពាហ៍ពិពាហ៍តាមច្បាប់ និងប្រពៃណីកាលពីចុងឆ្នាំ២០១២កន្លងទៅក្រោមការចូលរួមយ៉ាងកុះករពីញាតិមិត្ត និងអ្នករួមអាជីព ហើយក៏មានការចូលរួមផ្ដិតយករូបភាព ឬចុះផ្សាយយ៉ាងច្រើន។ ខាត់ សុឃីម បន្ថែមទៀតថា ប្ដីប្រពន្ធអ្នកទាំងពីរមានសុភមង្គលណាស់។ ហើយនេះក៏ប្រហែលជាការបញ្ជាក់ចុងក្រោយចំពោះការលើកឡើងពាក់ព័ន្ធទៅនឹងរឿងរ៉ាវរង្គោះរង្គើក្នុងគ្រួសាររបស់នាងដែរ៕
អត្ថបទ៖ សំ ជំនាញ
0 comments:
Post a Comment