ស្រីតូច ចំណាន ក្លាយជាសេដ្ឋិនីក្នុងកណ្តាប់ដៃឧកញ៉ា
ភ្នំពេញៈ អតីតតារាសម្តែងល្បីឈ្មោះ នាង ស្រីតូច ចំណាន មានឈ្មោះពិតថា ម៉ៅ សុចំណាន ត្រូវគេសង្កេតឃើញថា ប្រជាប្រិយភាពរបស់នាងនៅតែមានសម្រាប់មហាជននៅឡើយ។ ជាក់ស្តែងនៅក្នុងថ្ងៃរៀបអាពាហ៍ពិពាហ៍របស់ពិធីការិនី គង់ សុជាតិ និង ជា វិបុល មានទស្សនិកជនមិនតិចទេបានចោមរោមសួរសុខទុក្ខតារារូបនេះ និងសុំថតរូបជាមួយនាង ខណៈនៅពេលនេះនាងបានក្លាយជាសេដ្ឋិនីម្នាក់ទៅហើយនោះ។
នៅក្នុង អំឡុងពេលនៃការប្រាស្រ័យជីវិតនៅលើថ្នាលសិល្បៈ អតីតតារាសម្តែងដែលរបូតរ៉ូបលើឆាកតន្ត្រីលេចដើមទ្រូងមូលក្បំ ផ្អើលអស់មួយស្រុកខ្មែរ ធ្វើឲ្យគេចាំមិនភ្លេចនាង ស្រីតូច ចំណាន ហាក់មានជីវភាពមិនធូរធារប៉ុន្មានទេ តែនៅពេលនេះ ចំណាន បានប្រែមុខមាត់ថ្មី ខណៈគេគ្រប់គ្នាបានដឹងថា តារារូបនេះបានក្លាយជាសេដ្ឋិនីម្នាក់ មានប្រាក់រាប់លានកាន់ក្នុងដៃបាត់ទៅហើយ។
ភាពមានបានរបស់អតីត តារាស្រីដែលគេល្បីថា មានដើមទ្រូងសិចស៊ីមូលក្បំពីធម្មជាតិរូបនោះ បានកើតឡើងនៅក្រោយពេលដែលនាងបានដកខ្លួនចេញពីសិល្បៈក្នុងអំឡុង ឆ្នាំ២០០២-២០០៣ ក្រោយមកទើបគេដឹងថា នាងបានសាងស្នេហ៍យ៉ាងផ្អែមត្រជាក់ជាមួយនឹងឧកញ៉ាក្មេងស្រុកខ្មែរ ម្នាក់ដែលមានប្រាក់វាល់លានដុល្លារ។ តាមរយៈការស្រឡាញ់ និងទុកចិត្ត ស្របពេលដែល ស្រីតូច ចំណាន មានគំនិតទុកដាក់ និងរហ័សរហួនផងនោះ ទើបធ្វើឲ្យបុរសមានឋានៈជាឧកញ៉ាក្មេងម្ចាស់ជំនួញធំៗនៅស្រុក ខ្មែរកាន់តែទន់ចិត្តអាណិតស្រឡាញ់ ចំណាន ខ្លាំងឡើង និងបានចែករំលែករបររកស៊ីធំៗឲ្យនាងគ្រប់គ្រងទៀតផង។
រំលង អស់រយៈពេលជាច្រើនឆ្នាំ នៅពេលនេះ ស្រីតូច ចំណាន ត្រូវបានគេដឹងថា នាងបានក្លាយជាសេដ្ឋិនីម្នាក់ មានប្រាក់ និងមុខជំនួញធំៗតម្លៃរាប់លាននៅក្នុងដៃ។ បើយោងតាមសារព័ត៌មានក្នុងស្រុកកន្លងមក គេបានដឹងថា ក្នុងចំណោមទ្រព្យដែលគេដឹង ស្រីតូច ចំណាន ត្រូវបានលោកឧកញ៉ាប្រគល់សិទ្ធិឲ្យនាងក្លាយជាម្ចាស់សណ្ឋាគារ និងកាស៊ីណូ ដ៏ធំនៅក្រុងបាវិត ខេត្តស្វាយរៀង និងមានមុខជំនួញមួយចំនួនបន្ថែមទៀត។ ក្រៅពីនោះ គេបានដឹងថា ស្រីតូច ចំណាន បានទិញផ្ទះវីឡាតម្លៃមិនតិចទេនៅឯបរទេស ដែលគេដឹងថា នៅប្រទេសស៊ីវិល័យ សិង្ហបុរី ហើយលើសពីនេះនាងជាម្ចាស់អចលនទ្រព្យតម្លៃរាប់លាននៅរាជធានី ភ្នំពេញផងដែរ។
ជាមួយនឹងជីវិតឧត្តុង្គឧត្តមខ្ពង់ខ្ពស់នេះ ស្រីតូច ចំណាន ក៏បានសង់ភូមិគ្រឹះតម្លៃ១លានដុល្លារនៅម្តុំផ្សារដើមថ្កូវ សម្រាប់ជាទីជម្រកប្រចាំថ្ងៃផងដែរ ដែលគេបានដឹងថា ភូមិគ្រឹះនោះត្រូវបានរៀបចំការសាងសង់ និងតុបតែងលម្អយ៉ាងផ្ចិតផ្ចង់បំផុតជាមួយនឹងគ្រឿងសង្ហារិមប្រណីតៗ។ ភូមិគ្រឹះនោះត្រូវបានអ្នករស់នៅម្តុំផ្សារដើមថ្កូវ ប្រាប់ឲ្យដឹងថា បានសង់ឡើងរយៈពេល៣ឆ្នាំ ទម្រាំតែលេចចេញជារូបរាងដ៏ធំស្កឹមស្កៃដាច់គេនៅម្តុំនោះ ហើយក៏បានធ្វើការសម្ពោធជាផ្លូវការកាលពីចុងឆ្នាំ២០១២ រួចហើយដែរ។
លើសពីនោះទៅទៀត គេបានសម្តែងការសង្ស័យថា តារារូបនេះបានទិញយន្តហោះជិះផ្ទាល់ខ្លួនទៀតផង ខណៈកន្លងមកនៅពេលនាងទៅណាមកណា នាងតែងជិះយន្តហោះឯកជនដាច់ដោយឡែកសម្រាប់តែក្រុមគ្រួសារនោះ។ តែយ៉ាងណាពាក់ព័ន្ធនឹងព័ត៌មាននេះ បុរសជំនិតម្នាក់របស់នាងបានធ្វើការបដិសេធចំពោះការទិញយន្តហោះ ឯកជននេះ។ពាក់ព័ន្ធនឹងការលើកឡើងខាងលើ ភ្នំពេញ ប៉ុស្តិ៍ មិនអាចទាក់សុំការបកស្រាយរបស់សេដ្ឋិនីមានប្រភពពីសិល្បៈម្នាក់ នេះបានទេ។
ដោយឡែកពាក់ព័ន្ធនឹងជីវិតគ្រួសារវិញ គេបានដឹងផងដែរថា អតីតតារាសម្តែងលេចធ្លោក្នុងអំឡុងឆ្នាំ២០០១-២០០២ រូបនេះ ទទួលបានភាពកក់ក្តៅបំផុតដូចស្ពាយសម្ពាយបុណ្យពីជាតិមុន ដោយសារតែលោកឧកញ៉ាសម្បូរទ្រព្យមានកេរ្តិ៍ឈ្មោះល្បីទាំងថ្នាក់ ជាតិ និងលើឆាកអន្តរជាតិ បានផ្តល់តម្លៃឲ្យនាងយ៉ាងខ្ពស់ និងស្រឡាញ់ថ្នាក់ថ្នមនាងយ៉ាងខ្លាំង។
ទន្ទឹមនឹងស្នេហាផ្អែមល្ហែម មកទល់នឹងពេលនេះ គេបានដឹងថា ស្រីតូច ចំណាន និងលោកឧកញ៉ាក្មេង បានផ្ដល់កំណើតកូនចំនួន៤នាក់ ក្នុងនោះស្រីពីរនាក់ និងប្រុសពីរនាក់។
ទោះបីជាបានឃ្លាតឆ្ងាយ ពីពិភពសិល្បៈអស់រយៈពេលជាច្រើនឆ្នាំក្តី តែតារាស្រីដែលមានឆ្អឹងអណ្តែតពីអ្នកសិល្បៈរូបនេះ នៅចាំមិនភ្លេចពីប្រភពដើមរបស់ខ្លួនឡើយ។ ជារឿយៗនាងតែងចំណាយពេលទៅចូលរួមការអញ្ជើញចូលរួមក្នុងសកម្មភាពសិល្បៈរបស់សិល្បករមួយចំនួនមិនដែលអាក់ខានឡើយ ហើយនៅពេលវត្តមាននាងទៅដល់ម្តងៗ រមែងទទួលបានការស្វាគមន៍យ៉ាងកក់ក្តៅពីម្ចាស់កម្មវិធី និងមហាជននៅក្នុងពិធីនោះ។
ជាក់ស្តែងដូចជា ការបង្ហាញវត្តមានរបស់នាងនៅក្នុងពិធីមង្គលការរបស់ពិធីការិនី នាង គង់ សុជាតិ និងជា វិបុល អ៊ីចឹង អ្នកសិល្បៈ និងមហាជនជាច្រើនបានស្វាគមន៍នាងយ៉ាងខ្លាំង និងបានសុំនាងថតរូបយ៉ាងវក់វីទៀតផង។ ទាំងនេះ ស្តែងឲ្យឃើញថា កេរ្តិ៍ឈ្មោះរបស់នាងនៅតែស្ថិតក្នុងបេះដូងរបស់មហាជននៅឡើយ៕
0 comments:
Post a Comment