ការទិញរថយន្តថ្មីប្រើប្រាស់ កាន់តែទទួលបានការពេញនិយម និងមានចំនួនច្រើនឡើងក្នុងចំណោមពលរដ្ឋខ្មែរ ដោយសារការវិវឌ្ឍន៍នៃសង្គម និងកម្រិតជីវភាពរបស់ពលរដ្ឋមានភាពប្រសើរឡើង។ យ៉ាងណាមិញ នៅលើទីផ្សារកម្ពុជាមានរថយន្តច្រើនប្រភេទណាស់ ដែលគេនាំចូលពីបណ្ដាប្រទេសនានា ដែលមួយចំនួនមានការក្លែងបន្លំ និងគ្មានប្រភពច្បាស់លាស់។ ការជ្រើសរើសរថយន្តមិនបានត្រឹមត្រូវនិងខ្វះការពិចារណា អាចនាំឲ្យខាតបង់លុយកាក់ និងពេលវេលាជាពិសេសអាចនាំគ្រោះថ្នាក់ជាយថាហេតុផ្សេងៗ បើសិនមានការសម្រេចចិត្តខុស។
ហេតុនេះ ដើម្បីផ្តល់ជាគន្លឹះខ្លះៗ សម្រាប់ប្រិយមិត្តជ្រើសរើសរថយន្តថ្មីប្រើប្រាស់បានត្រឹមត្រូវ មិនភ័យខ្លាចការខាតបង់ថវិកា និងផ្តល់សុវត្ថិភាពខ្ពស់យើងខ្ញុំបានសាកសួរលោក សុន ពិនិត្យ ប្រធានគ្រប់គ្រងផ្នែកជួសជុលរថយន្តរបស់ក្រុមហ៊ុនហ៊ុងហ៊ាប ជាក្រុមហ៊ុនទទួលសិទ្ធិនាំចូលរថយន្តម៉ាកមែសឺដេស ប្រចាំព្រះរាជាណាចក្រកម្ពុជា។
លោក សុន ពិនិត្យ បានប្រាប់ថា អតិថិជនត្រូវប្រុងប្រយ័ត្ននិងពិចារណាឲ្យបានម៉ត់ចត់នៅពេលត្រូវការចង់ទិញរថយន្តថ្មីណាមួយយកមកប្រើប្រាស់មិនឲ្យខុសបំណង។ រថយន្តមួយចំនួនគេផលិតឡើងតម្រូវតាមស្ថានភាពភូមិសាស្ត្រ និងអាកាសធាតុនៃប្រទេសដែលគេនាំចូលមកលក់ ហើយការប្រើប្រាស់ខុសអាចនាំឲ្យរថយន្តទាំងនោះឆាប់ខូច, គ្មានសុវត្ថិភាពក្នុងការបើកបរ ពិសេសឆាប់ធ្លាក់តម្លៃបើប្រៀបធៀបរថយន្តដែលគេនាំចូល និងផលិតតម្រូវប្រើប្រាស់ទីផ្សារប្រទេសកម្ពុជា។
លោកបញ្ជាក់ថា គ្រប់ការផលិតនៃប្រភេទរថយន្តទាំងអស់ក្នុងពិភពលោក សុទ្ធតែមានលក្ខណៈខុសគ្នាទៅតាមលក្ខខណ្ឌ និងស្ថានភាពនៃទីផ្សាររថយន្តរបស់ប្រទេសនីមួយៗ។ ដូច្នេះហើយ អតិថិជនគួរប្រើប្រាស់រថយន្តទាំងឡាយណា ដែលត្រូវទៅនឹងទីផ្សារនៃប្រទេសរបស់ខ្លួន ដើម្បីចៀសវាងនូវភាពស្មុគស្មាញ, ការខាតបង់ពេលវេលានិងប្រាក់កាស និងធានាបានសុវត្ថិភាពនិងទំនុកចិត្តក្នុងការប្រើប្រាស់បានយូរអង្វែង។
លោកបន្តទៀតថា រថយន្តថ្មីខ្លះត្រូវគេដាក់លក់ដោយគ្មានការធានាផ្ទាល់ពីរោងចក្រ និងគ្មានការត្រួតពិនិត្យតាមដានជាទៀងទាត់ពីរោងចក្រផលិត ហើយនៅពេលអតិថិជនទិញយកទៅប្រើប្រាស់ និងជួបបញ្ហាបច្ចេកទេសផ្សេងៗ គឺមិនមានអ្នកជំនាញច្បាស់លាស់ក្នុងការថែទាំនិងជួសជុលជូននោះឡើយ។
លោកបន្តក្រើនរំលឹកទៀតថា រថយន្តថ្មីខ្លះក៏អាចជាប្រភេទរថយន្តមួយទឹកដែលត្រូវគេប្រើប្រាស់រួច ឬត្រូវគេប្តូរគ្រឿងបន្លាស់ច្រើនដង ហើយដាក់គ្រឿងបន្លាស់ក្លែងក្លាយជំនួស ដើម្បីរក្សាស្ថានភាពរថយន្តឲ្យនៅដូចថ្មី ហើយដាក់លក់ក្នុងតម្លៃដូចជារថយន្តថ្មី ឬមានតម្លៃថោកជាងរថយន្តថ្មីបន្តិចបន្តួច។
អ្វីដែលលោកបារម្ភនិងចង់ពញ្ញាក់ស្មារតីសម្រាប់អ្នកដែលត្រូវការទិញរថយន្តប្រើប្រាស់គឺ រថយន្តមួយចំនួនដែលអាចគេលួចពីប្រទេសផ្សេង រួចធ្វើការនាំចូលមកលក់លើទីផ្សារប្រទេសកម្ពុជាដែលនេះមិនត្រឹមតែបង្កគ្រោះថ្នាក់និងខាតបង់លុយកាក់ ប៉ុន្តែថែមទាំងនាំឲ្យប៉ះពាល់ដល់កិត្តិយសផងដែរ។
អត្ថបទ៖ ប៊ុណ្ណារ៉ា
0 comments:
Post a Comment