ស្ទាវ២ក្រុមបើកឆាកប្រយុទ្ធដណ្តើមស្រីស្នេហ៍ក្នុងក្លឹប(ថបហ្គោល) វាយគ្នាប្រាវបែកក្បាលម្នាក់
ភ្នំពេញ ៖ យុវជនម្នាក់ត្រូវរងរបួសបែកក្បាលហូរឈាមរហាមដោយសារតែពួកគេនិងមិត្តភក្ដិ ចូលទៅផឹកស៊ីរាំរែកកម្សាន្តនៅក្នុងក្លឹបមួយកន្លែងដែលតែងតែកើតរឿងហេតុញឹកញាប់យីហោ(ថបហ្គោល)ហើយត្រូវភាគីម្ខាងទៀតដែលចូលរាំកម្សាន្តក្នុងក្លឹបជាមួយគ្នាព្រួតវាយដោយសាររឿងទំនាស់ដណ្តើមស្រីស្នេហ៍។
ហេតុការណ៍ទំនាស់វាយតប់គ្នាផ្អើលពេញក្លឹបរាត្រីនោះបានកើតឡើងកាលពីវេលាម៉ោង ១២និង៤០នាទីយប់រំលងអាធ្រាត្រឈាន ចូលថ្ងៃទី៤ ខែវិច្ឆិកា ឆ្នាំ២០១៣ ស្ថិតនៅចំណុចក្លឹបយីហោ(ថបហ្គោល)ស្ថិតជាប់ខាងលិចផ្សារធំថ្មី តាមបណ្តោយផ្លូវ កម្ពុជាក្រោម ក្នុងសង្កាត់ផ្សារថ្មីទី២ ខណ្ឌដូនពេញ។យុវជនរងរបួសឈ្មោះ ស៊ុន សុធារិទ្ធ អាយុ២២ឆ្នាំ ស្នាក់នៅសង្កាត់ស្ទឹងមានជ័យ ខណ្ឌមានជ័យបានរបួសបែកក្បាល។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុយុវជន ឈ្មោះ ស៊ុន សុធារិទ្ធ និងមិត្តភក្ដិ ៥នាក់ផ្សេងទៀតបាននាំគ្នាជិះម៉ូតូ៣គ្រឿងមកចូលរាំរែកផឹកស៊ីកម្សាន្តក្នុងក្លឹបនោះតាំងពីម៉ោង២៣យប់រហូតដល់ស្រវឹងរាងៗខ្លួនដោយមានគូសង្សាររៀងៗខ្លួន លុះមួយសន្ទុះក្រោយមក ក៏មានភាគីម្ខាងទៀត សុទ្ធតែជាក្មេងស្ទាវដូចគ្នាបានមករាំឱបស្រីជាដៃគូរាំក្នុងក្លឹបរបស់ភាគីក្រុម ឈ្មោះ ស៊ុន សុធារិទ្ធ បណ្តាលឲ្យកើតជាទំនាស់ពាក្យសម្តីគ្នារហូតផ្ទុះហិង្សាវាយតប់គ្នាទៅវិញទៅមកផ្អើលពេញក្លឹបនោះបណ្តាលអោយឈ្មោះ ស៊ុន សុធារិទ្ធ ត្រូវរបួសបែកក្បាលហូរឈាមស្រោចខ្លួន ដោយសារភាគីម្ខាងទៀតវាយក្បាលនឹងថូប៊ីយ៊ែហើយក្នុងហេតុការណ៍នោះដែរក៏ត្រូវបានកម្លាំងកងរាជអាវុធហត្ថខណ្ឌដូនពេញដែលចុះមកអន្តរាគមន៍ចាប់បំបែកអោយពួកបែកផ្លូវគ្នាទៅផ្ទះវិញរាងៗខ្លួនផងដែរ។ប្រភពព័ត៌មានបានបន្តទៀតនៅក្លឹបយីហោ(ថបហ្គោល)សម្បូរទៅដោយក្រុមស្ទាវប្រុសស្រីមកចូលរាំរែកផឹកស៊ីស្រវឹងឡូនិងឧស្សាហ៍កើតរឿឈ្លោះប្រកែកដេញវាយតប់គ្នាកើតឡើងញឹកញាប់ណាស់មកហើយបង្កអោយមានការរំខានដល់ប្រជាពលរដ្ឋរស់នៅជិតស្ទើរតែរាល់យប់ដេកពួនមិនបាន ដូច្នេះហើយប្រជាពលរដ្ឋជិតខាងបានសំណូមពរអោយអាជ្ញាធរខណ្ឌដូនពេញគួរមានវិធានការទប់ស្កាត់ចំពោះបញ្ហានេះផង៕
រស្មី
0 comments:
Post a Comment