គិតត្រឹមថ្ងៃនេះ ប្រទេសចំនួន២១ហើយដែលមានឈ្មោះទៅលេងពានរង្វាន់បាល់ទាត់ពិភពលោក FIFA World Cup 2014 ពោលគឺនៅសល់តែ១១ប្រទេសទៀតប៉ុណ្ណោះ។
ប្រទេសដែលជាប់ទាំង២១នោះ (គិតទាំងម្ចាស់ផ្ទះប្រេស៊ីល) មាន៩ប្រទេសមកពីតំបន់អឺរ៉ុប, ៥ប្រទេសមកពីតំបន់អាមេរិកខាងត្បូង, ៤ប្រទេសមកពីតំបន់អាស៊ី និង៣ប្រទេសមកពីតំបន់ CONCACAF (អាមេរិកកណ្ដាល, អាមេរិកខាងជើង និងការីប៊ៀន)។
ចង់ដឹងថាមានប្រទេសណាខ្លះ សូមមើលតារាងខាងក្រោមនេះ (តាមលំដាប់ក្រុមជាប់មុន ជាប់ក្រោយ)៖
លេខរៀង | ប្រទេស | តំបន់ប្រកួតជម្រុះ | បង្ហាញខ្លួន (គិតទាំង២០១៤) | បង្ហាញខ្លួនចុងក្រោយ | លទ្ធផលល្អបំផុត |
១ | ប្រេស៊ីល (ម្ចាស់ផ្ទះ) | អាមេរិកខាងត្បូង (មិនបាច់ជម្រុះ) | ២០ដង | ឆ្នាំ២០១០ | ជើងឯក (១៩៥៨, ១៩៦២, ១៩៧០, ១៩៩៤, ២០០២) |
២ | ជប៉ុន | អាស៊ី | ៥ដង | ២០១០ | ជុំ១៦ក្រុមចុងក្រោយ (២០០២, ២០១០) |
៣ | អូស្ត្រាលី | អាស៊ី | ៤ដង | ២០១០ | ជុំ១៦ក្រុមចុងក្រោយ (២០០៦) |
៤ | អ៊ីរ៉ង់ | អាស៊ី | ៤ដង | ២០០៦ | មិនធ្លាប់ឆ្លងផុតពូល |
៥ | កូរ៉េខាងត្បូង | អាស៊ី | ៩ដង | ២០១០ | លេខ៤ (២០០២) |
៦ | ហុល្លង់ | អឺរ៉ុប | ១០ដង | ២០១០ | លេខ២ (១៩៧៤, ១៩៧៨, ២០១០) |
៧ | អ៊ីតាលី | អឺរ៉ុប | ១៨ដង | ២០១០ | ជើងឯក (១៩៣៤, ១៩៣៨, ១៩៨២, ២០០៦) |
៨ | សហរដ្ឋអាមេរិក | CONCACAF | ១០ដង | ២០១០ | លេខ៣ (១៩៣០) |
៩ | កូស្តារីកា | CONCACAF | ៤ដង | ២០០៦ | ជុំ១៦ក្រុមចុងក្រោយ (១៩៩០) |
១០ | អាហ្សង់ទីន | អាមេរិកខាងត្បូង | ១៦ដង | ២០១០ | ជើងឯក (១៩៧៨, ១៩៨៦) |
១១ | បែលហ្ស៊ិក | អឺរ៉ុប | ១២ដង | ២០០២ | លេខ៤ (១៩៨៦) |
១២ | ស្វីស | អឺរ៉ុប | ១០ដង | ២០១០ | ជុំ៨ក្រុមចុងក្រោយ (១៩៣៤, ១៩៣៨, ១៩៥៤) |
១៣ | អាល្លឺម៉ង់ | អឺរ៉ុប | ១៨ដង | ២០១០ | ជើងឯក (១៩៥៤, ១៩៧៤, ១៩៩០) |
១៤ | កូឡុំប៊ី | អាមេរិកខាងត្បូង | ៥ដង | ១៩៩៨ | ជុំ១៦ក្រុមចុងក្រោយ (១៩៩០) |
១៥ | រុស្សី | អឺរ៉ុប | ១០ដង (គិតទាំងសហភាពសូវៀត) | ២០០២ | លេខ៤ (១៩៦៦) |
១៦ | បូស្នី-ហឺហ្ស៊េហ្គោវីណា | អឺរ៉ុប | ១ | ||
១៧ | អង់គ្លេស | អឺរ៉ុប | ១៤ដង | ២០១០ | ជើងឯក (១៩៦៦) |
១៨ | អេស្ប៉ាញ | អឺរ៉ុប | ១៤ដង | ២០១០ | ជើងឯក (២០១០) |
១៩ | ឈីលី | អាមេរិកខាងត្បូង | ៩ដង | ២០១០ | លេខ៣ (១៩៦២) |
២០ | អេក្វាឌ័រ | អាមេរិកខាងត្បូង | ៣ដង | ២០០៦ | ជុំ១៦ក្រុមចុងក្រោយ (២០០៦) |
២១ | ហុងឌុយរ៉ាស់ | CONCACAF | ៣ដង | ២០១០ | មិនដែលឆ្លងផុតពូល |
ចុះចំណែកកៅអីទំនេរទាំង១១ផ្សេងទៀតវិញ ប្រទេសណាខ្លះដែលនៅមានសិទ្ធិដណ្ដើមយក?
ប្រទេសជាច្រើនបានធ្លាក់បាត់អស់ទៅហើយ ប៉ុន្តែនៅមានប្រទេស២២ទៀតដែលនៅមានដង្ហើមដកក្នុងវគ្គជម្រុះនេះ។ ប្រទេសនៅតំបន់អាហ្វ្រិកដែលនៅសល់ចំនួន១០ នឹងប្រជែងយកកៅអី៥ ខណៈប្រទេសអឺរ៉ុប៨ នឹងត្រូវប្រកួត play-off ដណ្ដើមយកកៅអី៤។ ចំណែកកៅអី២ទៀត នឹងរកឃើញម្ចាស់ក្រោយការប្រកួត play-off ឆ្លងទ្វីប៤ គឺ អាស៊ី, អាមេរិកខាងត្បូង, CONCACAF និងអូសេអានី។
ប្រទេសអាហ្វ្រិកទាំង១០ ដែលបានប្រកួតចប់ជើងទី១ហើយនោះ នឹងត្រូវប្រកួតជើងទី២ នៅខែវិច្ឆិកាក្រោយនេះ ដើម្បីសម្រេចសេចក្ដីថាក្រុម៥ណានឹងជាប់ទៅប្រេស៊ីល។ លទ្ធផលជើងទី១កន្លងមក គឺ៖ កូឌីវ័រ ឈ្នះ សេណេហ្គាល់ ៣-១, អេត្យូពី ចាញ់ នីហ្សេរីយ៉ា ១-២, ទុយណេស៊ី ស្មើ កាមេរ៉ូន ០-០, ហ្គាណា បំបាក់ អេហ្ស៊ីប ៦-១ និង ប៊ូគីណាហ្វាសូ ឈ្នះ អាល់ហ្សេរី ៣-២។
ចំណែកប្រទេសអឺរ៉ុប៨ដែលត្រូវប្រជែងយកកៅអី៤ទៀត រួមមានដូចជា៖ ក្រូអាត, ស៊ុយអែត, រ៉ូម៉ានី, អ៊ីស្លង់, ព័រទុយហ្គាល់, ក្រិក, អ៊ុយក្រែន និងបារាំង។ ក្រុមទាំង៨នេះ នឹងត្រូវចាប់គូប្រកួតនាសប្ដាហ៍ក្រោយ ហើយក្រុមដែលឈ្នះក្នុងការប្រកួត play-off ២ជើង នឹងជាប់ទៅជុំផ្ដាច់ព្រ័ត្រនៅប្រេស៊ីលឆ្នាំក្រោយ។
រីឯ២គូ play-off ឆ្លងទ្វីបឯណោះវិញ គឺក្រុម ហ្សកដានី (អាស៊ី) ប៉ះ អ៊ុយរុយហ្គាយ (អាមេរិកខាងត្បូង) ខណៈ ម៉ិកស៊ីកូ (CONCACAF) ជួប នូវែលហ្សេឡង់ (អូសេអានី) នៅថ្ងៃទី១៣ និង២០ ខែវិច្ឆិកា។
ក្រោយរកឃើញទាំង៣២ក្រុមហើយនោះ ការចាប់ឆ្នោតជ្រើសរើសពូលទាំង៨សម្រាប់ប្រកួត FIFA World Cup លើកទី២០ ឆ្នាំ២០១៤ នឹងត្រូវធ្វើឡើងនៅថ្ងៃទី៦ ខែធ្នូ ឆ្នាំ២០១៣ នៅរដ្ឋ Bahia ប្រទេសប្រេស៊ីល។
ប្រិយមិត្តសាកទាយលមើល៍ ថាតើក្រុម១១ផ្សេងទៀតដែលឡើងទៅបង្រ្គប់ជើងនៅ World Cup ឆ្នាំក្រោយ មានប្រទេសណាខ្លះ?
0 comments:
Post a Comment