លោក Igor Stimac ត្រូវសហព័ន្ធបណ្ដេញចេញពីតំណែងគ្រូបង្វឹកក្រុមបាល់ទាត់ជម្រើសជាតិក្រូអាតហើយ ក្រោយចាញ់ស្កុតឡែន ២-០ ក្នុងជំនួបចុងក្រោយនៃការជម្រុះ World Cup តំបន់អឺរ៉ុប។ លទ្ធផលនេះមិនបានប៉ះពាល់ដល់ចំណាត់ថ្នាក់លេខ២ក្នុងពូល A សម្រាប់កៅអីប្រកួត play-off នោះទេ ប៉ុន្តែជាលទ្ធផលដែលក្រុមនេះមិនអាចទទួលយកបាន។
ក្រោយការប្រកួតកាលពីថ្ងៃអង្គារនោះ លោក Stimac បាននិយាយថាលោកនឹងដាក់ពាក្យលាលែង ប៉ុន្តែប្រធានសហព័ន្ធកីឡាបាល់ទាត់ក្រូអាត លោក Davor Suker បានបញ្ជាក់ថាលោកមិនបានឃើញលិខិតលាយលក្ខណ៍អក្សរ ឬការលាលែងផ្ទាល់មាត់ពីលោក Stimac នោះទេ ដូច្នេះសហព័ន្ធបានសម្រេចបណ្ដេញចេញតែម្ដង។
លោក Stimac ឈរបញ្ជាកូនក្រុមកន្លងមក
ក្រោយការដកតំណែងនេះ លោក Niko Kovac គ្រូបង្វឹកក្រុម U-21 ក្រូអាត នឹងធ្វើជាអ្នកមើលការខុសត្រូវក្រុមឈុតធំនេះបណ្ដោះអាសន្ន ជាពិសេសគឺសម្រាប់ការប្រកួត play-off នាពេលខាងមុខ។ ប្រសិនបើក្រូអាតអាចជាប់ទៅ World Cup ឆ្នាំក្រោយ នោះ Kovac អាចផ្ដល់កិច្ចសន្យារយៈពេលវែងដល់គ្រូបង្វឹកកំពុងស្ថិតក្នុងស្ថានភាពទីទ័លStimac ជាបន្ត។
លោក Stimac បានចូលដឹកនាំក្រូអាតជំនួសលោក Slaven Bilic កាលពីខែកក្កដា ឆ្នាំ២០១២។ លោកបានដឹកនាំក្រុមអតីតយូហ្គោស្លាវីមួយនេះ ឲ្យឈរកំពូលតារាងជាមួយបែលហ្សិកក្រោយប្រកួតជម្រុះ៥ប្រកួតដំបូង ប៉ុន្តែបានចាញ់ដល់ទៅ៣ប្រកួត និងស្មើ១ នាប្រកួតបន្ទាប់ រហូតរបូតកៅអីកំពូលតារាង មកត្រឹមលេខ២វិញ។ ក្រុម៧ផ្សេងទៀតដែលជាប់ play-off ដូចក្រូអាតដែរ រួមមាន បារាំង ព័រទុយហ្គាល់ ស៊ុយអែត ក្រិក អ៊ុយក្រែន រ៉ូម៉ានី និងអ៊ីស្លង់។
ចាំមើលថាតើគ្រូបង្វឹកបណ្ដោះអាសន្នថ្មី អាចជួយឲ្យក្រូអាតឡើង World Cup ជាលើកទី៤បានដែរឬទេ?
អត្ថបទទាក់ទង៖ ប្រទេសជាប់ទៅ World Cup រកឃើញ២១ហើយ នៅសល់តែ១១ទៀតប៉ុណ្ណោះ
ចុចអានការជម្រុះតំបន់អឺរ៉ុប៖ អង់គ្លេស រុស្សី បូស្នី អេស្ប៉ាញ ជាប់ទៅ World Cup ខណៈក្រុមជាប់ Play-off ក៏រកឃើញដែរ
អត្ថបទផ្សេងទៀតទាក់ទងនឹង FIFA World Cup សូមចុចអានត្រង់នេះ៕
0 comments:
Post a Comment