កំពូលអ្នកប្រយុទ្ធក្បាច់គុនបុរាណខ្មែរ ឃីម ឌីម៉ាបានផ្តួលជើងឯកវូស៊ូពិភពលោកពីរសម័យ Rene Catalan ឲ្យលោកអាជ្ញាកណ្តាលបញ្ឈប់ទឹកទីពីរនៅសង្វៀនប្រទេសសិង្ហបុរីកាលពីយប់មិញ។
នៅចំពោះមហាជនរាប់សិបនាក់ក្នុងសង្វៀនកីឡដ្ឋាន Singapore Indoor Stadium ប្រទេសសិង្ហបុរីកាលពីយប់មិញ ឃីម ឌីម៉ា បង្ហាញមុខមុនគេសម្រាប់គូផ្លូវការជាមួយនឹងយកទងជាតិខ្មែរគ្រប់ពីលើខ្លួន ខណៈអេក្រង់ខាងក្រោយខ្នងបង្ហាញឡើងទងជាតិខ្មែរ ប្រាសាទអង្គរវត្ត និងបទចម្រៀងមោទនភាពជាតិខ្មែរ។
អ្នកលេងគុនខ្មែរ ឃីម ឌីម៉ាដែលដើរឆ្ពោះទៅសង្វៀនដោយភាពអង់អាច ទឹកមុខមុះមុត និងពោរពេញដោយភាពក្លាហាន។ ខណៈពេលដៃគូរបស់គេបង្ហាញខ្លួនហាក់មានជំនឿជាក់១០០ភាគរយដោយបង្ហាញចេញក្បាច់ប្រយុទ្ធពិសេសប្រៀបដូចជាក្បាច់ដែលយើងធ្លាប់ឃើញក្នុងរឿងភាគចិន។
បន្ទាប់ពីបង្ហាញសមាសភាព និងស្តាប់សេចក្តីណែនាំរបស់លោកអាជ្ញាកណ្ដាល អ្នកពីរចាប់ផ្ដើមវាយសម្រុកគ្នាតែម្តង។ ទឹកទីមួយអ្នកលេងក្បាច់គុនវូស៊ូពិភពលោករបស់ហ្វីលីពីនបានចូលចម្រុះដោយគ្មានការស្ទាប់ស្ទង់លើបច្ចេកទេសគូប្រយុទ្ធឡើយ។ ក្នុងទឹកនេះ Rene បានចូលអោបផ្នែកខាងក្រោម និងលើកឃីម ឌីម៉ាផ្តូលដោយស្ថិតនៅពីលើ ខណៈឌីម៉ាបានយកដៃស្តាំអោបកាចកចុះក្រោមដើម្បីកុំឲ្យគូប្រយុទ្ធធ្វើអ្វីតាមអំពើចិត្ត។
សកម្មភាពឃីម ឌីម៉ា ប្រកួត យប់ មិញ
បន្ទាប់ពីរះបម្រះគ្នាដោយបច្ចេកទេសសុទ្ធសាធ Rene ហាក់មានល្បិចល្អជាងដោយបានចាប់កាច់ដៃរបស់ឃីម ឌីម៉ាដល់ទៅពីរដងដោយអ្នកទស្សនា ជាពិសេសអ្នកទស្សនានៅកម្ពុជាស្ទើរតែគិតទាំងស្រុងថា ឌីម៉ាមិនអាចឆ្លងផុតទឹកទីមួយឬទីពីរឡើយ។ ប៉ុន្តែឃីម ឌីម៉ាបានរើបម្រះដោះចេញពីការកាច់ដៃរបស់គូបដិបក្ខបានយ៉ាងល្អនិងបានស្ទុះឡើងលើវិញផងដែរ។
ចូលទឹកទីពីរ ឃីម ឌីម៉ា បានប្រុងប្រៀប និងផ្លាស់ប្តូរជំហរប្រយុទ្ធយ៉ាងល្អខណៈរូបគេបានទាត់ជើងក្រោម និងវាយកែង។ មួយនាទីចុងក្រោយនៃទឹកពីរ ឌីម៉ា បានវាយចូលមួយកែងបណ្ដាលឲ្យRene លូតជង្គង់ចុះបណ្ដាលឲ្យឌីម៉ាមានប្រៀបនៅពីលើ និងបានវាយកែវពីរទៅបីចូលសៀតផ្ការបស់គូប្រជែងបណ្ដាលឲ្យអ្នកលេងហ្វីលីពីនស្ទើរបាត់បង់ស្មារតីមិនអាចតដៃជាមួយឌីម៉ាបានឡើយ ខណៈឌីម៉ាបានវាយសន្ធាប់ផ្ទួនៗបណ្ដាលឲ្យអាជ្ញាកណ្ដាលបញ្ឈប់តែម្ដង។ ឌីម៉ាបានវាយចំកន្លែងហាមឃាតពោលគឺពីក្រោយ ប៉ុន្តែអាជ្ញាកណ្ដាលបានប្រាប់។
នេះជាការប្រកួតឡើងទីមួយរបស់ឃីម ឌីម៉ាដោយទទួលបានជ័យជម្នះ ខណៈអ្នកលេងហ្វីលីពីនបានប្រកួតពីរដងចាញ់ទាំងពីរដង។
ជ័យជម្នះរបស់ឃីម ឌីម៉ាបានចារឈ្មោះក្នុងប្រវត្តិសាស្ត្រកម្ពុជាសម្រាប់ការប្រកួតក្បាច់គុនចម្រុះ(MMA)នៅក្រៅប្រទេស ខណៈកាលពីដើមឆ្នាំនេះកីឡាករ តក់ សោភណ្ឌបានយកឈ្នះកីឡាករអង់គ្លេសនៅសង្វៀនស៊ីធីអិន៕
0 comments:
Post a Comment