បើកសម្ពោធ វិមានព្រះបរមរូប សម្តេចព្រះ នរោត្តម សីហនុ
ភ្នំពេញ: នៅព្រឹកថ្ងៃសុក្រ ទី១១ ខែតុលា ឆ្នាំ២០១៣ វិមានព្រះបរមរូប ព្រះបរមរតនកោដ្ឋ សម្តេចព្រះ នរោត្តម សីហនុ នឹងត្រូវបើកសម្ពោធ ក្រោមព្រះរាជាធិបតីភាពដ៏ខ្ពង់ខ្ពស់របស់ព្រះមហាក្សត្រ សម្តេចព្រះបរមនាថ នរោត្តម សីហមុនី និងសម្តេចម៉ែ មុនីនាថ សីហនុ ព្រមទាំងថ្នាក់ដឹកនាំកំពូលៗរបស់ប្រទេសកម្ពុជា។
ព្រះរាជពិធីសម្ពោធវិមានព្រះបរមរូប សម្តេចព្រះ នរោត្តម សីហនុ នៅព្រឹកថ្ងៃសុក្រនេះ នឹងមានការផ្សាយផ្ទាល់ តាមរយៈទូរទស្សន៍ជាតិកម្ពុជា។
ព្រះបរមរូប សម្តេចព្រះ នរោត្តម សីហនុ ធ្វើអំពីស្ពាន់ មានកម្ពស់ ៤,៥ ម៉ែត្រ ទ្រង់ឈរមួយជំហរ ក្នុងសម្លៀកបំពាក់ខោអាវធំ មិនមែនទ្រង់គ្រឿងជាព្រះរាជា តាមប្រពៃណីទេ។ ព្រះអង្គអោបដៃសំយុងមកមុខ តម្កល់លើព្រះផ្នែន មានកម្ពស់ ២,៧ ម៉ែត្រ សាងសង់ នៅលើខឿនរាងចតុកោណកែង មានបណ្តោយ ៥៤ ម៉ែត្រ និងទទឹង ២៧ ម៉ែត្រ។ ព្រះបរមរូបព្រះករុណា ព្រះបរមរតនកោដ្ឋ ត្រូវបានតម្កល់ ដោយបែរព្រះភ័ក្ត្រ ទៅទិសខាងកើត បែរខ្នង ទៅវិមានឯករាជ្យ។
ជាការកត់សម្គាល់ បន្ទាប់ពីព្រះរាជពិធីសម្ពោធវិមានព្រះបរមរូប នៅថ្ងៃនេះរួចហើយ គឺនៅថ្ងៃទី១៥តុលា រាជរដ្ឋាភិបាល នឹងប្រារព្ធពិធីគោរពព្រះវិញ្ញាណក្ខន្ធ ព្រះបរមរតនកោដ្ឋ គម្រប់ខួប ១ ឆ្នាំ នៅវិមានព្រះបរមរូប នាព្រឹកថ្ងៃទី១៥តុលា។
ដោយឡែកគណបក្សសង្គ្រោះជាតិ ក៏បានចេញប្រកាស កាលពីថ្ងៃទី១០តុលាថា នៅព្រឹកថ្ងៃចន្ទ ទី១៤តុលា គណបក្សសង្គ្រោះជាតិ នឹងរៀបចំពិធីបង្សុកូល គោរពព្រះវិញ្ញាណក្ខន្ធ ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ នៅទីស្នាក់ការគណបក្ស នៅខណ្ឌទួលគោក រាជធានីភ្នំពេញ ហើយនៅវេលាម៉ោង ២ រសៀល ថ្ងៃទី១៤តុលា ថ្ងៃដដែល លោក កឹម សុខា ប្រធានស្តីទីគណបក្សសង្គ្រោះជាតិ នឹងដឹកនាំបេក្ខជនជាប់ឆ្នោតតំណាងរាស្ត្រ នីតិកាលទី៥ និងថ្នាក់ដឹកនាំដទៃទៀត ទៅគោរពព្រះវិញ្ញាណក្ខន្ធ នៅទីតម្កល់ ព្រះបរមរូប ព្រះបរមរតនកោដ្ឋ នៅសួនច្បារខាងកើត វិមានឯករាជ្យ៕
វិមានព្រះបរមរូប សម្តេចព្រះ នរោត្តម សីហនុ នៅលើសួនច្បារ ខាងកើតវិមានឯករាជ្យ ដែលរៀបចំព្រះរាជពិធីសម្ពោធ នៅព្រឹកថ្ងៃទី១១តុលា ( រូបថត៖ ស៊ីវ ចាន់ណា )
0 comments:
Post a Comment