គ្រោះថ្នាក់ចរាចរគួរឲ្យរន្ធត់ ឡានកុងតឺន័រកិនប្តីនិងប្រពន្ធមានផ្ទៃពោះបែកក្បាលស្លាប់ ហើយកូនស្រីពីរនាក់ទៀតរបួសធ្ងន់
ក្រុងប៉ោយប៉ែត ៖ គ្រោះថ្នាក់ចរាចរ ដ៏គួរឲ្យរន្ធត់មួយ បង្កឡើងដោយ រថយន្តកុងតឺន័រ បើកបុកម៉ូតូ បណ្តាលឲ្យប្តីប្រពន្ធ រួមនិងកូនក្នុងផ្ទៃ ស្លាប់បាត់បង់ជីវិត យ៉ាងអាណោចអាធ័ម ខណៈដែលកូនតូចៗ ២ នាក់ទៀត រងរបួសធ្ងន់កាលពីវេលាម៉ោង ២និង៤៥ នាទីរសៀលថ្ងៃទី១២ ខែតុលា ឆ្នាំ២០១៣នេះ នៅលើកំណាត់ផ្លូវជាតិលេខ៥ ក្នុងសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
ជនរងគ្រោះជាប្តី មានឈ្មោះ ឈូក ហង អាយុ ៣១ ឆ្នាំ និងភរិយាឈ្មោះ បារាំង អាយុ ២៦ឆ្នាំ រស់នៅភូមិផ្សារកណ្តាល ក្រោយវត្ត ផ្សារកណ្តាល ក្រុងប៉ោយប៉ែត ហើយកូនស្រី ២ នាក់ទៀតដែលរងរបួស មានឈ្មោះ សុខ ជា អាយុ ៦ ឆ្នាំ និងឈ្មោះ សុខ ស្រីអូន អាយុ ៣ ឆ្នាំរបួសធ្ងន់ ត្រូវបានសមត្ថកិច្ចបញ្ជូនទៅសង្គ្រោះបន្ទាន់ នៅមន្ទីរពេទ្យ។
មុនពេលកើតហេតុ រថយន្ដនិងម៉ូតូបើកស្របទិសគ្នា ក្នុងទិសដៅពីលិចទៅកើត ពេលនោះម៉ូតូជនរងគ្រោះ ដែលជិះឌុបគ្នា ៤ នាក់ បានបើកជែងរថយន្ដកុងតឺន័រ របស់ក្រុមហ៊ុនស៊ូភើហ្គាស ពីខាងមុខ ខណៈជែងមិនទាន់ផុតផង ក៏មានរថយន្ដម៉ាកឡិចស៊ីស មួយគ្រឿងទៀតបើកជែងម៉ូតូ និងរថយន្ដកុងតឺន័រ បណ្ដាលឱ្យប៉ះចង្កូតម៉ូតូដួលខ្ទាត ចូលក្រោមរថយន្ដកុងតឺន័រ កិនស្លាប់ និងរបួសយ៉ាងរន្ធត់តែម្ដង ៕
0 comments:
Post a Comment