ប្រិយមិត្តដឹងហើយថា កន្លងទៅនេះ Google កំពុងរៀបចំដំណើរការថតទិដ្ឋភាពទាំងឡាយនៃប្រទេសកម្ពុជា យកទៅបង្ហាញនៅលើ Google Map ដោយជ្រើសរើសយករាជធានីភ្នំពេញ និងខេត្តសៀមរាបជាគោលដៅ។
រថយន្ត Google ដែលបង្ហាញខ្លួនគួរឲ្យសង្ស័យនៅខេត្តសៀម រាប
ដោយឡែកស្រាប់តែថ្មីៗនេះ គេឃើញរថយន្ត Google បានបង្ហាញខ្លួនយ៉ាងភ្ញាក់ផ្អើលនៅតំបន់ទេសចរដ៏ល្បីល្បាញឯខេត្តសៀមរាប ដែលធ្វើឲ្យពលរដ្ឋមានការសង្ស័យនិងភ្ញាក់ផ្អើលជាខ្លាំង។
យ៉ាងណាប្រភពមិនបានបញ្ជាក់ថា ការបង្ហាញខ្លួនរបស់រថយន្ត Google គឺក្នុងដំណើរចាប់ផ្ដើមការងារនៅទីនោះ ដូចតាមគម្រោងការដំបូងរបស់ខ្លួនឬយ៉ាងម៉េចនោះទេ។
កម្ពុជាជាប្រទេសទី ៥១ នៅលើពិភពលោក និងជាប្រទេសទី ៥ ក្នុងតំបន់អាស៊ាន ដែល Google បានបើកសេវាមើលរូបភាពតាមដងផ្លូវតាមអ៊ីនធឺណិត។ រថយន្តដែលមានភ្ជាប់ជាមួយម៉ាស៊ីនថតដ៏ពិសេស នឹងចាប់ផ្តើមប្រតិបត្តិការប្រមូលរូបភាពតាមតំបន់ជាគោលដៅដោយផ្តិតនៅ ផ្លូវ, សំណង់, តំបន់រមណីយដ្ឋាន តំបន់ប្រាសាទបុរាណផ្សេងៗ និងអគារពាណិជ្ជកម្មធំៗក្នុងប្រទេស ដើម្បីបង្ហាញដល់ពិភពលោក។
គេជឿជាក់ថា នាពេលឆាប់ៗខាងមុខ ប្រជាជននៅគ្រប់ទិសទីនឹងអាចទស្សនាទិដ្ឋភាពពិតៗនៅតាមដង ផ្លូវសាធារណៈនៅកម្ពុជា រួមទាំងតំបន់ប្រវត្តិសាស្រ្តដូចជាតំបន់រមណីយដ្ឋានអង្គរតាមប្រព័ន្ធអ៊ីនធឺណិត បន្ទាប់ពីក្រុមហ៊ុន Google ចាប់ផ្តើមអនុវត្តសេវាបង្ហាញរូបភាពក្នុងប្រព័ន្ធផែនទី Google Map នៅកម្ពុជា។ ជាមួយគ្នានេះគេរំពឹងថា ការងារទាំងនេះនឹងជួយជំរុញការអភិវឌ្ឍវិស័យទេសចរណ៍នៅប្រទេសកម្ពុជា ជាពិសេសធ្វើឲ្យពិភពលោកទាំងមូលស្គាល់កម្ពុជាកាន់តែច្បាស់ តាមរយៈរូបភាពដែលបង្ហាញនៅលើបណ្តាញអ៊ីនធឺណិត។
ក្រៅពីប្រទេសកម្ពុជា Google បានដំណើរការនៅតាមប្រទេសចំនួន ៥0 ទៀតដែលអាចបើកមើល Street Views បានមានដូចជា៖ Åland Islands, Isle of Man, San Marino, អង់ដូរ៉ា, អង់តាកទិច, អូស្ត្រាលី, អូទ្រីស, បែលហ្សិក, ប្រេស៊ីល, កាណាដា, ឈីលី, ក្រូអាត, សាធារណរដ្ឋឆែក, ដាណឺម៉ាក, អេស្តូនី, បារាំង, ហ្វាំងឡង់, អាល្លឺម៉ង់, ក្រិក, ហុងកុង, ឥណ្ឌា, អ៊ីរ៉ាក់, អៀរឡង់, អ៊ីតាលី, អ៊ីស្រាអែល, ជប៉ុន, ជេស៊ី, ឡេតូនី, ម៉ាកាវ, ម៉ិកស៊ីកូ, ម៉ូណាកូ, ហុឡង់ដ៍, ន័រវែស, នូវែលហ្សេឡង់, ប៉ូឡូញ, ព័រទុយហ្គាល់, កាតារ, រូម៉ានី, រុស្សី, សិង្ហបុរី, អាហ្វ្រិកខាងត្បូង, កូរ៉េខាងត្បូង, អេស្ប៉ាញ, ស៊ុយអែត, ស្វីស, ថៃ, តៃវ៉ាន់, អ៊ុយក្រែន, ចក្រភពអង់គ្លេស និង សហរដ្ឋអាមេរិក។
Sabay នឹងព្យាយាមស្វែងរកព័ត៌មានពីដំណើរការការងាររបស់រថយន្ត Google នៅក្នុងប្រទេសកម្ពុជា ដើម្បីផ្សាយជូនព័ត៌មាននៅលើក្រោយទៀត។
យល់ដឹងពីរបៀបដៅផែនទីលើ Google Map សូមចុចទីនេះ។
អត្ថបទ៖ ប៊ុណ្ណារ៉ា
ប្រភព៖ siemreap.net
0 comments:
Post a Comment