កម្ពស់ទឹកនៅភ្នំពេញ ឡើងជិតដល់កម្រិតប្រកាសឲ្យប្រុងប្រយ័ត្ន
ភ្នំពេញ: ទឹកទន្លេមេគង្គនៅតែបន្តជន់ឡើង អាចនឹងឡើងដល់កម្រិតកម្ពស់ ដែលត្រូវប្រកាសឲ្យមានការប្រយ័ត្ន សម្រាប់រាជធានីភ្នំពេញ។ ឯនៅតំបន់សមុទ្រវិញ នឹងមានខ្យល់បក់បោកខ្លាំងៗ និងរលកសមុទ្រខ្ពស់ពីថ្ងៃទី២៩កញ្ញា ដល់ថ្ងៃទី២ ខែតុលា។
លោក ចាន់ យុត្ថា អ្នកនាំពាក្យ និងជានាយកខុទ្ទកាល័យក្រសួងធនធានទឹក និងឧតុនិយម បាននិយាយនៅថ្ងៃទី២៨ ខែកញ្ញា ឆ្នាំ២០១៣ ថា ទឹកទន្លេមេគង្គ នៅខេត្តស្ទឹងត្រែង និងខេត្តក្រចេះ បានស្រកចុះបន្តិច តែនៅខេត្តកំពង់ចាម និងស្ថានីយជលសាស្ត្រ នៅទន្លេមេគង្គក្រោម ទន្លេបាសាក់ និងទន្លេសាប នៅភ្នំពេញ បន្តជន់ឡើងថែមទៀត។
មន្ត្រីអ្នកនាំពាក្យខាងលើ បញ្ជាក់ថា ទឹកទន្លេមេគង្គ នៅភាគខាងលើ នឹងហក់ឡើងវិញ ពេលព្យុះទី២១ ឈ្មោះ វូទីព មានឥទ្ធិពលដល់អាងទន្លេមេគង្គលើ ក្នុងពេលប៉ុន្មានថ្ងៃខាងមុខនេះ។ ព្រមពេលជាមួយនេះ នៅតំបន់មាត់សមុទ្រ នឹងមានខ្យល់បកបោកខ្លាំង និងមានរលកសមុទ្រខ្ពស់ៗ ចាប់ពីថ្ងៃទី២៩ ខែកញ្ញា ដល់ថ្ងៃទី២ ខែតុលា។
លោកបានអំពាវនាវ សូមបងប្អូនប្រជានេសាទសមុទ្រត្រូវផ្អាកការនេសាទ និងផ្អាកការធ្វើដំណើរតាមសមុទ្រ ដូចដែលក្រសួងធនធានទឹក បានជូនដំណឹងកាលពីថ្ងៃទី២៧ ខែកញ្ញា ឆ្នាំ២០១៣។
នៅថ្ងៃទី២៨ ខែកញ្ញានេះ លោក ចាន់ យុត្ថា បញ្ជាក់ថា ថ្នាក់ដឹកនាំនិងមន្ត្រីជំនាញរបស់ក្រសួងធនធានទឹក បានចេញដំណើរទៅតាមមូលដ្ឋាន ដែលមានជំនន់ទឹកភ្លៀង អស់ហើយ ដើម្បីជួយអន្តរាគមន៍ ដោយមានទាំងគ្រឿងចក្រជាច្រើនគ្រឿង បានត្រៀមរួចជាស្រេច តែខេត្ត ដែលរងគ្រោះដោយជំនន់ទឹកទន្លេ មិនអាចជួយអ្វីបានក្រៅពីការជម្លៀសនោះទេ។
ការព្យាករណ៍របស់នាយកដ្ឋានជលសាស្ត្រ នៅថ្ងែទី២៨ ខែកញ្ញា ឆ្នាំ២០១៣ បង្ហាញឲ្យឃើញថា នៅស្ថានីយជលសាស្ត្រ ខេត្តស្ទឹងត្រែង ទឹកមានកម្ពស់ ១១,០២ ម៉ែត្រ ទាបជាងថ្ងៃទី២៧ ខែកញ្ញា ០,៣១ ម៉ែត្រ។ ស្ថានីយជលសាស្ត្រខេត្តក្រចេះ ទឹកមានកម្ពស់ ២២,៦៤ ម៉ែត្រ ទាបជាងថ្ងៃទី២៧ ខែកញ្ញា ០,០៥ ម៉ែត្រ។ នៅស្ថានីយជលសាស្ត្រ ខេត្តកំពង់ចាម ទឹកមានកម្ពស់ ១៥,៩៧ ម៉ែត្រ ខ្ពស់ជាងថ្ងៃទី២៧ ខែកញ្ញា ០,០៦ ម៉ែត្រ។ នៅស្ថានីយជលសាស្ត្រទន្លេបាសាក់-ចតុមុខ ទឹកមានកម្ពស់ ១០,១១ ម៉ែត្រ ខ្ពស់ជាងថ្ងៃទី២៧ ខែកញ្ញា ០,១៣ ម៉ែត្រ។ នៅស្ថានីយជលសាស្ត្រអ្នកលឿង ៧, ៤២ ម៉ែត្រ ខ្ពស់ជាងថ្ងៃទី២៧ ខែកញ្ញា ០,១៤ ម៉ែត្រ និងនៅស្ថានីយទឹកមានកម្ពស់ ៧,៧២ ម៉ែត្រ ខ្ពស់ជាងថ្ងៃទី២៧ ខែកញ្ញា ០,០៥ ម៉ែត្រ។ កម្ពស់ទឹកនៅបឹងទន្លេសាប នៅស្ថានីយជលសាស្ត្រ កំពង់ហ្លូង មានកម្ពស់ ៧,៨១ ម៉ែត្រ។
រំលឹកឲ្យដឹងថា នៅរាជធានីភ្នំពេញ នឹងត្រូវប្រកាសឲ្យមានការប្រុងប្រយត្ន័អំពីគ្រោះទឹកជំនន់ នៅពេលទឹកទន្លេមេគង្គនៅស្ថានីយជលសាស្ត្រ ទន្លេបាសាក់-ចតុមុខ ឡើងដល់កម្រិតកម្ពស់ ១០,៥០ ម៉ែត្រ នៅថ្ងៃទី២៨ខែកញ្ញានេះ ទឹកបានឡើងដល់កម្ពស់ ១០,១១ ម៉ែត្រ បានន័យថា នៅខ្វះ ០,៤០ ម៉ែត្រទៀត គឺឡើងដល់កម្រិតកម្ពស់ ត្រូវប្រកាសឲ្យមានការប្រុងប្រយ័ត្នហើយ៕
ប្រភពពី៖ www.khmer-note.com
0 comments:
Post a Comment