វិធីការពារកុំឱ្យកើតមុនខ្សាច់
ការទទួលទានអាហារមួយចំនួនដែលសម្បូរទៅដោយសារធាតុដែលមានជាតិខ្លាញ់ ជាតិផ្អែម ឬគ្រឿងផ្អាប់ ជាពិសេស មិនបានលុបលាងសម្អាតផ្ទៃមុខជាប្រចាំផង វាអាចបង្កជាជម្ងឺ ឬរោគផ្សេងៗដោយមិនដឹងខ្លួន ជាក់ស្ដែងដូចជាមុនខ្សាច់នេះជាដើម។
រូបភាពទស្សនាវដ្ដីសុខភាពយើង
ទស្សនាវដ្ដី សុខភាពយើង បានធ្វើកិច្ចសម្ភាសន៍ជាមួយអ្នកស្រី សុខ ហៀង ម្ចាស់ហាងកែសម្ផស្ស សុខហៀង នឹងធ្វើការបកស្រាយអំពីវិធីការពារកុំឱ្យកើតមុនខ្សាច់ ដើម្បីឱ្យលោកអ្នកនាងកញ្ញាបានជ្រាប និងយល់កាន់តែច្បាស់អំពីបញ្ហានេះ។
មុនខ្សាច់ជាអ្វី?
មុនខ្សាច់គឺជាមុនដែលមានគ្រាប់តូចៗដែលធ្វើឱ្យរលាកគល់រោម ហើយរ៉ាំរ៉ៃ រួចបង្កទៅជាមុនខ្សាច់។ មូលហេតុដែល បណ្ដាលឱ្យកើតមុនខ្សាច់នេះ ដោយសារតែការស្ទះក្រពេញខ្លាញ់ក្រោមស្បែកទើបមានមុនខ្សាច់នេះ។ ក្រោយពេលដែលកើតមុនខ្សាច់ វាបង្កឱ្យមានផលប៉ះពាល់ទៅដល់ស្បែកមុខមានសភាពគ្រើម ឬស្បែករលាកក្រហម និងខ្ទុះជាដើម។
វិធីព្យាបាលការកើតមុនខ្សាច់
- កុំព្យាយាមតុបតែងមុខ ឬលាបម្សៅក្រាស់ពេក ក្នុងពេលដែលមុខរបស់លោកអ្នកកំពុងចេញមុន ក៏ដូចជាមុនខ្សាច់។
- ក្នុងករណីកើតមុនអង្កាមល្អិតៗ ចូរយកស៊ុតសលាបមុខប្រមាណ១៥នាទី រួចចាំលាងសម្អាតចេញ ព្រោះការធ្វើបែបនេះ ដើម្បីកាត់បន្ថយការកើតមុន។
- លាបក្រែម ឬឡេព្យាបាល ដែលផ្សំពីអាស៊ីដសាលីសាយលិក។
វិធីការពារកុំឱ្យកើតមុនខ្សាច់
- ត្រូវសម្អាតស្បែកឱ្យបានស្អាត និងត្រឹមត្រូវ ហើយលាបថ្នាំ ឬលេបថ្នាំដែលមានជាតិរ៉េទីណុល (វីតាមីនអា)។
- ត្រូវលាងសម្អាតមុខ មុនពេលទទួលទានដំណេក។
- ថែរក្សាស្បែកមុខឱ្យស្អាតជាប្រចាំ។
- លុបលាងមុខមួយថ្ងៃ២ទៅ៣ដង។ លោកអ្នកត្រូវដឹងថា ការមិនលុបលាងសម្អាតផ្ទៃមុខ គឺធ្វើឱ្យស្បែកមុខខ្វះអនាម័យ ហើយធ្វើឱ្យស្បែកមុខស្ងួត និងប្រតិកម្មទៀតផង។
- កុំតឹងតែងធុញថប់អារម្មណ៍ ព្រោះការតានតឹង តប់ប្រមល់ គឺជាដើមហេតុនៃការកើតមុន។
- កាត់បន្ថយអាហារមានជាតិខ្លាញ់ ជាតិផ្អែម និងគ្រឿងផ្អាប់។
- កុំញេច ឬក្ដិច ព្រោះធ្វើបែបនេះវាបង្កឱ្យស្បែកមុខរលាកផ្នែកខាងក្នុង។
ដំបូន្មានរបស់អ្នកជំនាញ
លោកអ្នកកុំព្យាយាមប្រើគ្រឿងសម្អាងប្រភេទណាដែលមានជាតិប្រេងច្រើន និងកុំឧស្សាហ៍ញេចឬក្ដិច ព្រោះធ្វើបែបនេះ វាបង្កឱ្យស្បែកមុខរលាក។ ចំពោះការទទួលទានអាហារដែលមានជាតិខ្លាញ់ ជាតិផ្អែម និងគ្រឿងផ្អាប់ ត្រូវកាត់បន្ថយផងដែរ។
ប្រភព ៖ ទស្សនាវដ្តី សុខភាពយើង លេខ០៦៩ ខែតុលា ឆ្នាំ២០១១
0 comments:
Post a Comment