ព្រះមហាក្សត្រមិនព្រមពន្យារពេលកិច្ចប្រជុំសភាដំបូង តាមសំណើបក្សប្រឆាំងទេ
![](https://blogger.googleusercontent.com/img/b/R29vZ2xl/AVvXsEhQuQ63WcBjqsXrlr2ojt-aFDdhhDFosw9TiazjhLNbPtsfXQeGWc6z7RD8ixL25w-6ZxBFvs04LCzSah32vthW6wWvYspK8nq9OZqYe2nnEJJhdkgQiO2ybXDQ_t7u1Kls6uhyphenhypheniLKJ7xc/s250/1.jpg)
វិទ្យុបារាំងអន្តរជាតិ៖ ព្រះមហាក្សត្រសម្តេចព្រះបរមនាថ នរោត្តម សីហមុនី មិនបានយល់ព្រមតាមសំណើរបស់តំណាងរាស្ត្រគណបក្សសង្គ្រោះជាតិដែលសុំ ពន្យារពេលកិច្ចប្រជុំសភាដំបូងនោះទេ។
ការបដិសេធមិនព្រមពន្យារពេលកិច្ចប្រជុំនេះ បានធ្វើឡើងតាមរយៈ ព្រះរាជសារ នៅថ្ងៃពុធទី១៨កញ្ញានេះ ផ្ញើជូនអ្នកតំណាងរាស្ត្រ គណបក្សប្រឆាំង។ ព្រះអង្គនៅតែរក្សាជំហរគោរពតាមរដ្ឋធម្មនុញ្ញមាត្រា៨២ ដែលតម្រូវឲ្យព្រះមហាក្សត្រកោះប្រជុំសភាដំបូង ៦០ថ្ងៃយ៉ាងយូរក្រោយ ការបោះឆ្នោត។
សំណើរបស់តំណាងរាស្ត្រគណបក្សសង្គ្រោះជាតិដែលសុំឲ្យ ព្រះមហាក្សត្រពន្យារពេលកិច្ចប្រជុំសភាដំបូងនោះ មិនបានសម្រេចទេ។ តាមរយៈព្រះរាជសារចុះថ្ងៃទី ១៨ កញ្ញានេះ សម្តេចព្រះបរមនាថ នរោត្តម សីហមុនី បានបញ្ជាក់ថា ព្រះអង្គនឹងយាងជាព្រះរាជអធិបតីក្នុងពិធីបើកសម័យប្រជុំសភាដំបូង នៅថ្ងៃទី២៣ កញ្ញា ទៅតាមការគ្រោងទុក។
ព្រះរាជសារនេះគឺជាការឆ្លើយតបទៅនឹងលិខិតរបស់អ្នកតំណាងរាស្ត្រ គណបក្សសង្គ្រោះជាតិដែលបានទូលថ្វាយព្រះអង្គអំពីបញ្ហាជុំវិញ ការបោះឆ្នោត និងបានសុំឲ្យព្រះអង្គពន្យារពេលការកោះប្រជុំសភាដំបូង។ ប៉ុន្តែ ដោយសម្អាងលើមាត្រា ៨២ នៃរដ្ឋធម្មនុញ្ញ ព្រះមហាក្សត្របានបញ្ជាក់ថា ព្រះអង្គនឹងនៅតែរក្សាការកោះប្រជុំនេះ ព្រមទាំងចូលរួមធ្វើជាអធិបតីនៃកិច្ចប្រជុំនេះដដែល។
សូមបញ្ជាក់ថា មាត្រា ៨២ថ្មីនៃរដ្ឋធម្មនុញ្ញចែងថា រដ្ឋសភាបើកកិច្ចប្រជុំដំបូង ៦០ថ្ងៃយ៉ាងយូរក្រោយការបោះឆ្នោត តាមការកោះប្រជុំរបស់ព្រះមហាក្សត្រ។ ក្នុងន័យនេះ ព្រះអង្គក៏បានស្នើសុំជាថ្មីទៀតឲ្យអ្នកតំណាងរាស្ត្រជាប់ឆ្នោតទាំង អស់ ចូលរួមក្នុងសម័យប្រជុំដំបូងនៃរដ្ឋសភាដើម្បីបង្ហាញនូវ ការរួបរួម និងឯកភាពជាតិ។
កាលពីថ្ងៃទី១៤ កញ្ញា ព្រះមហាក្សត្រ សម្តេចព្រះបរមនាថ នរោត្តម សីហមុនី បានប្រគល់លិខិតកោះអញ្ជើញតំណាងរាស្ត្រជាប់ឆ្នោតទាំង ១២៣ នាក់ ឲ្យទៅគណបក្សទាំងពីរ ក្នុងនោះមានតំណាងរាស្ត្រគណបក្សប្រជាជន កម្ពុជា ៦៨ នាក់ និងគណបក្សសង្គ្រោះជាតិ ៥៥ នាក់។ ព្រះអង្គបានអំពាវនាវឲ្យតំណាងរាស្ត្រជាប់ឆ្នោតទាំងអស់ចូលរួមប្រជុំ សភាដំបូងនេះផងដែរ។
ប៉ុន្តែ ភ្លាមៗក្រោយពីទទួលបានលិខិតកោះអញ្ជើញ គណបក្សសង្គ្រោះជាតិបានកោះប្រជុំអ្នកតំណាងរាស្ត្រជាប់ឆ្នោតរបស់ ខ្លួន និងបានសម្រេចថា ពួកគេនឹងមិនចូលប្រជុំឡើយប្រសិនបើគ្មានដំណោះស្រាយនៃការបោះឆ្នោត។ តំណាងរាស្ត្រគណបក្សសង្គ្រោះជាតិក៏បានផ្ញើលិខិតថ្វាយព្រះមហាក្សត្រ វិញនៅថ្ងៃដដែលនោះ ដោយសុំឲ្យព្រះអង្គពន្យារពេលកិច្ចប្រជុំនេះ សិន។ ប៉ុន្តែ សំណើនេះមិនត្រូវបានព្រះមហាក្សត្រយល់ស្របទេ។
អគ្គលេខាធិការដ្ឋានរដ្ឋសភាបានជូនដំណឹង នៅថ្ងៃអង្គារទី១៧កញ្ញា ថាកិច្ចប្រជុំសភាដំបូងនៅថ្ងៃទី២៣ កញ្ញា នឹងធ្វើឡើងក្រោមព្រះរាជាធិបតីភាពរបស់ព្រះមហាក្សត្រ និងត្រូវផ្សាយបន្តផ្ទាល់តាមកញ្ចក់ទូរទស្សន៍ និងវិទ្យុជាតិទៀតផង៕
-----------
ដោយ ប៉ែន បូណា
ប្រភពពីៈ នាវា
0 comments:
Post a Comment