គ្រាន់តែបិណ្ឌមួយចូលមកដល់ បុរសៗចាប់ផ្ដើមលាន់មាត់សរសើរពីសម្រស់នារីខ្មែរដែលស្លៀកសំលៀកបំពាក់ប្រពៃណីអាវប៉ាក់សំពត់ហូលមិនដាច់ពីមាត់សោះ។ តើយុវជនខាងក្រោមលួចសរសើរពីនារីៗយ៉ាងម៉េចខ្លះទៅ? តោះទៅស្ដាប់ទាំងអស់គ្នា!
និស្សិតប្រុស ឡៅ ឈុនហេង សិក្សាជំនាញបច្ចេកទេស ដែលធ្លាប់តែឃើញមិត្តភ័ក្ដិស្រីៗស្លៀកខោខៅប៊យ ពាក់អាវសាមញ្ញ ដល់ពេលបានឃើញនារីៗពាក់អាវប៉ាក់ សំពត់ហូលទៅវត្តកាលពីព្រឹកម្សិលមិញ បានលួចសរសើរពួកនាងថា ស្អាតមិនដាច់ពីម៉ាត់។
និស្សិតរូបនេះបន្តទៀតថា៖ “យូរៗឃើញគេពាក់ម្តង ប្លែកភ្នែកហ្មង មើលទៅរម្យទុំហើយស្អាតទៀត។ ចាំមើលតែបន្តិចទៀតស្រីៗនាំគ្នាថតរូបស្លៀកពាក់អាវប៉ាក់បង្ហោះពេញ Facebook វាល្អដែរដែលគេស្រឡាញ់សំលៀកបំពាក់ប្រពៃណីខ្មែរ“។
ចំណែកឯ លោក សាម អេងលាង វិញរឹតតែពេញចិត្តនឹងសម្រស់មិត្តស្រីរបស់ខ្លួននៅពេលដែលឃើញនាងស្លៀកពាក់អាវប៉ាក់ សំពត់បត់។ អេងលាង បានបញ្ជាក់ថា៖ “ពេលគេស្លៀកពាក់អីចឹងទៅប្លែកមែនទែន គឺប្លែកស្អាត មើលទៅសុភាពរាបសារ ព្រោះវាជាអាវសំពត់ប្រពៃណីខ្មែរយើង បង្ហាញពីភាពសមសួនរបស់នារីខ្មែរ។ ម្យ៉ាងខ្ញុំថា គេស្លៀកបែបនោះទៅវត្ត មិនមែនមានតែខ្ញុំទេពេញចិត្ត អ្នកដទៃ ឬចាស់ៗប្រហែលជាគាត់លួចសរសើរនាងដូចគ្នា”។
លើកឡើងស្រដៀងនឹងសុភាពបុរសទាំងពីរនាក់ខាងលើ សិស្សប្រុស ស៊ូ គឹមឆេង បានប្រាប់ឲ្យដឹងថា គេសឹងតែមើលមិនស្គាល់មិត្តភ័ក្ដិខ្លួនឯងដោយសារតែពួកគេតុបតែងខ្លួនទៅវត្តក្នុងសំលៀកបំពាក់សំពត់ហូល អាវប៉ាក់។ សិស្សវិទ្យាល័យរូបនេះបន្តទៀតថា៖ “ធ្លាប់តែឃើញគេស្លៀកខោអាវសិស្សធម្មតា ដល់ពេលឃើញស្លៀកបែបប្រពៃណីអីចឹង ស្អាតៗហើយគួរឲ្យស្រឡាញ់ទាំងអស់។ ម្យ៉ាងទៀតស្លៀកបែបនោះសមជានារីខ្មែរ ហើយថ្លៃថ្នូរទៀតផង”។
យ៉ាងណាមិញមិនមែនមានតែបុរសទេដែលលួចសរសើរស្រីៗ សូម្បីតែស្រីៗគ្នាឯងក៏លួចសរសើរគ្នាឯងដែរ។ កញ្ញា សេង សោភ័ណ្ឌ ដែលជាគ្រូបង្រៀននៅសាលាឯកជនមួយ ដាក់បិណ្ឌនៅវត្តលង្កាព្រឹកម្សិលមិញនេះ បានលើឡើងថា៖ “ឃើញគេពាក់ម៉ូតស្អាតៗមិនសិចស៊ី ពាក់ចេញមកសមៗ សមទាំងរាង សមទាំងភ្នែកអ្នកផងទៀត។ ស្រីៗគ្រាន់តែពាក់អាវប៉ាក់ សំពត់ហូល លើកឲ្យសម្រស់កាន់តែស្អាតថែមមួយកម្រិត រួមទាំងការតុបតែមុខ ធ្វើសក់បន្តិចទៀតទៅ ស្រស់ៗគ្រប់គ្នាតែម្ដង”៕
តើអ្នកវិញមានអារម្មណ៍យ៉ាងណាពេលឃើញនារីៗពាក់អាវប៉ាក់សំពត់ហូល?
មើលទិដ្ឋភាពផ្សេងទៀតទាក់ទងនឹងបុណ្យភ្ជុំបិណ្ឌ
អត្ថបទ៖ ផល្លា សុម៉ាលីណា
0 comments:
Post a Comment