ក្លិបបាល់ទាត់ភ្នំពេញក្រោន បានប្រកាសឲ្យកុមារអាយុចន្លោះពី៨ដល់១៣ឆ្នាំទាំងពីរភេទ ចូលរួមហ្វឹកហាត់ និងសិក្សាពីការលេងបាល់ទាត់ត្រឹមត្រូវតាមស្តង់ដារ ក្នុងជំហានដំបូងនៃសាលាបាល់ទាត់របស់ខ្លួន ដែលធ្វើឡើងនៅទីលានសិប្បនិម្មិត 3G និង Rama។ នេះបើតាមសេចក្តីប្រកាសរបស់ក្លិប។
អគ្គលេខាធិការក្លិបភ្នំពេញក្រោន លោក លី ហៀង ពន្យល់ថា គោលបំណងធំរបស់កម្មវិធីនេះ ដើម្បីបណ្ដុះបណ្ដាលកុមារអាយុពី៨ដល់១៣ឆ្នាំ ដែលវ័យនេះត្រូវបានគេចាត់ទុកថាស្ថិតក្នុងយុគមាស ឲ្យយល់ពីការលេងបាល់តាមបទដ្ឋានបច្ចេកទេសដ៏ត្រឹមត្រូវ ស្របតាមបាល់ទាត់សម័យទំនើប។ ប្រសិនបើ គម្រោងនេះដំណើរការបានល្អ ក្រោននឹងបង្កើនចំនួនកន្លែងហ្វឹកហាត់របស់ខ្លួន ឲ្យបានពាសពេញទីក្រុងភ្នំពេញ និងអាចពង្រីកខ្លួនទៅដល់បណ្ដាខេត្តនានាទៀតផង។ បើដូច្នោះមែន ធនធានកីឡាករ-ការិនី បាល់ទាត់កម្ពុជានឹងមិនពិបាករកទៀតឡើយ។
រូបថត៖ Facebook PPCFC
ចំពោះការហ្វឹកហាត់សាកល្បងឥតគិតថ្លៃ នឹងធ្វើឡើងនៅថ្ងៃទី២៦កញ្ញា ទី១០ និងទី១៧ តុលា ចាប់ពីម៉ោង៤និង៣០នាទី នៅទីលានបាល់ទាត់ 3G មុខរដ្ឋសភាជាតិ និងនៅថ្ងៃទី២៧ ខែកញ្ញា ទី១១ និងទី១៨ ខែតុលា ចាប់ពីម៉ោង៤និង៣០នាទីដូចគ្នា នៅទីលានបាល់ទាត់ Rama ទួលគោក។ អ្នកចូលរួមទាំងអស់នឹងត្រូវទទួលបានការបង្ហាត់បង្ហាញពីសំណាក់ គ្រូបង្វឹកកាន់ A License លោក Sam Schweingruber និងលោក ប៊ួយ ដារី គ្រូបង្វឹក B License ព្រមទាំងអ្នកជំនាញបាល់ទាត់មួយចំនួនទៀត។
លោកអគ្គលេខាធិការដដែលបញ្ជាក់បន្ថែមថា ចំពោះក្មេងៗដែលបានចូលហ្វឹកហាត់ក្នុងវគ្គសាកល្បងដំបូងដូចបានរៀបរាប់ខាងលើ នឹងទទួលបានការបញ្ចុះតម្លៃ៥០ភាគរយ សម្រាប់ការចុះឈ្មោះនៅវគ្គហ្វឹកហាត់បង់ប្រាក់។ មាតាបិតាឬអាណាព្យាបាល មានចំណាប់អារម្មណ៍ឲ្យកូនចៅរបស់លោកអ្នកចូលហ្វឹកហាត់ជាមួយភ្នំពេញក្រោន សូមទាក់ទងតាមទូរសព្ទលេខ ០២៣ ៦៦៦ ០៤៣៦។
ភ្នំពេញក្រោនជាក្លិបបាល់ទាត់អាជីពមួយ ដែលបានបង្កើតក្រុមកីឡាករថ្នាលមុនគេបង្អស់នៅកម្ពុជា។ ក្លិបមួយនេះធ្លាប់គ្រងជើងឯកលីកកំពូល៤ដង លើកពាន Hun Sen Cup ចំនួន២ដង និងធ្លាប់ឆ្លងទៅជុំផ្ដាច់ព្រ័ត្រព្រឹត្តិការណ៍ AFC President’s Cup ២ដង៕
0 comments:
Post a Comment