ក្រោយឈ្នះមេដាយសំរឹទ្ធិ១ក្នុងប្រភេទកីឡាសីឈិនឡុង ក្រុមកម្ពុជាបានឈរនៅលេខរៀងទី៤ក្នុងតារាងមេដាយសរុបក្នុងថ្ងៃដំបូង គឺថ្ងៃទី៤ ខែធ្នូម្សិលមិញនេះ។
ចំណែកថ្ងៃនេះវិញ (៥ ធ្នូ) កម្ពុជានឹងត្រូវប្រកួតក្នុងវិញ្ញាសាមួយផ្សេងទៀតក្នុងប្រភេទកីឡាដដែលនេះ តើយើងអាចឈ្នះមេដាយទី២បានដែរឬទេ?
ពិធីបង្ហូតទង់ជាតិក្រុមឈ្នះមេដាយផ្នែកនារី Event 2 កាលពីម្សិលមិញ (រូបភាព៖ 27seagames2013)
មេដាយសំរឹទ្ធិដែលកម្ពុជាទទួលបានកាលពីម្សិលមិញ គឺវិញ្ញាសាផ្នែកនារី (Women’s Linking) Event 3 ដែលមាន៤ប្រទេសចូលរួមប្រជែងយកមេដាយ ដែលជាលទ្ធផលក្រុមម្ចាស់ផ្ទះមីយ៉ាន់ម៉ាឈ្នះមេដាយមាស ថៃបានមេដាយប្រាក់ ខណៈកម្ពុជា និងម៉ាឡេស៊ីទទួលបានមេដាយសំរឹទ្ធិ។
នៅថ្ងៃម្សិលមិញដូចគ្នានោះ ក៏មានការប្រកួតវិញ្ញាសាបុរស ក្នុង Event 3 ដូចគ្នាដែរ ប៉ុន្តែមិនមានកម្ពុជាក្នុង Event នោះទេ ពោលគឺមាន៥ប្រទេសគឺ មីយ៉ាន់ម៉ា ម៉ាឡេស៊ី ឡាវ សិង្ហបុរី និងថៃ។ លទ្ធផលគឺមីយ៉ាន់ម៉ាបានមេដាយមាស ថៃមេដាយប្រាក់ រីឯម៉ាឡេស៊ី និងឡាវបានមេដាយសំរឹទ្ធិ។
នៅថ្ងៃនេះក៏នឹងមានការប្រកួតដណ្ដើមមេដាយលើ២វិញ្ញាសាទៀតផងដែរ ខណៈកម្ពុជាចូលរួមចំនួន១វិញ្ញាសា។ វិញ្ញាសាដែលកម្ពុជាចូលរួមគឺផ្នែកបុរស Event 2។ នៅក្នុង Event 2 ផ្នែកបុរសនោះ មានប្រទេស៥ចូលរួម គឺ កម្ពុជា ឡាវ ម៉ាឡេស៊ី សិង្ហបុរី និងថៃ។ ក្រុម១ដែលបានពិន្ទុក្រោមគេ នឹងមិនបានមេដាយនោះទេ ខណៈក្រុមដែលស្ថិតនៅលេខរៀងទី៣ និងទី៤ បានមេដាយសំរឹទ្ធិ។ រីឯក្រុម២ដែលមានពិន្ទុខ្ពស់ជាងគេ នឹងត្រូវប្រកួតគ្នាដណ្ដើមមេដាយមាស និងប្រាក់។
ចំណែកវិញ្ញាសាផ្នែកនារី ក្នុង Event 2 ដែរនោះ គឺមានតែ៣ប្រទេសប៉ុណ្ណោះ គឺ ឡាវ ម៉ាឡេស៊ី និងថៃ ពោលគឺមិនមានកម្ពុជានោះទេ។
ចំ/ថ្នាក់ | ប្រទេស | មាស | ប្រាក់ | សំរឹទ្ធិ | សរុប |
១ | មីយ៉ាន់ម៉ា | ២ | ០ | ០ | ២ |
២ | ថៃ | ០ | ២ | ០ | ២ |
៣ | ម៉ាឡេស៊ី | ០ | ០ | ២ | ២ |
៤ | កម្ពុជា | ០ | ០ | ១ | ១ |
៥ | ឡាវ | ០ | ០ | ១ | ១ |
៦ | ប្រ៊ុយណេ | ០ | ០ | ០ | ០ |
៧ | ឥណ្ឌូណេស៊ី | ០ | ០ | ០ | ០ |
៨ | ហ្វីលីពីន | ០ | ០ | ០ | ០ |
៩ | សិង្ហបុរី | ០ | ០ | ០ | ០ |
១០ | ទីម័រខាងកើត | ០ | ០ | ០ | ០ |
១១ | វៀតណាម | ០ | ០ | ០ | ០ |
បើយោងតាមកាលវិភាគប្រកួត គឺក្រុមកីឡាឈិនឡុងផ្នែកបុរសរបស់កម្ពុជា នឹងត្រូវចាប់ផ្ដើមនៅម៉ោង១១ ដល់ម៉ោង១២ថ្ងៃត្រង់នៅមីយ៉ាន់ម៉ា ដែលត្រូវនឹងម៉ោង ១១:៣០ ដល់១២:៣០នៅកម្ពុជា ខណៈក្រុម៤ផ្សេងទៀតធ្វើការប្រកួតមុននោះ។
ប្រសិនបើយើងអាចរកបានពិន្ទុស្ថិតនៅលំដាប់ទី១ ឬទី២ យើងនឹងបន្តប្រកួតដណ្ដើមមាសនៅម៉ោង៣រសៀលបន្តទៀត (៣:៣០នាទីនៅកម្ពុជា) តែប្រសិនបើបានពិន្ទុក្នុងលំដាប់ទី៣ និងទី៤ យើងនឹងឈ្នះមេដាយសំរឹទ្ធិតែម្ដង ខណៈលំដាប់ទី៥ គឺមិនបានទទួលមេដាយអ្វីនោះឡើយ។
កុំភ្លេចចាំអ៊ុតទាំងអស់គ្នាណា ថាតើកម្ពុជា អាចមានលទ្ធផលក្ដោបយកមេដាយទី២របស់ខ្លួនបានដែរឬទេថ្ងៃនេះ?
ចំណែកប្រិយមិត្តវិញ មានពាក្យអ្វីជូនពរក្រុមកម្ពុជាពីចម្ងាយដែរឬទេ?
ចង់ដឹងច្បាស់ ថាតើអ្វីទៅជាកីឡាសីឈិនឡុងយើងខ្ញុំនឹងជម្រាបជូនប្រិយមិត្តនៅពេលបន្ទាប់ទៀតនេះ៕
អត្ថបទ៖ សុខ សុវត្ថិ
0 comments:
Post a Comment