កីឡាករក្រុមបិសាចក្រហម Manchester United ម្នាក់ៗភ័យលួសព្រលឹងមិនស្ទើរទេពេលយន្តហោះដែលដឹកពួកគេទៅប្រកួត Champions League នៅអាល្លឺម៉ង់យប់នេះ ជួបបញ្ហាពេលចុះចត។
នៅពេលសល់តែ៤០០ម៉ែត្រទៀតដល់ផ្លូវរត់ (ចុះចត) របស់អាកាសយានដ្ឋាន Cologne អាកាសយានិកបានបង្ខំចិត្តមិនចុះចត ហើយបញ្ជាយន្តហោះឡើងទៅកម្ពស់ធម្មតាវិញយ៉ាងប្រញាប់ប្រញាល់ជាទីបំផុត។ ការបង្វែរទិសដៅយន្តហោះភ្លាមៗដែលបង្កឲ្យមានការភ័យខ្លាចពេញយន្តហោះនោះ គឺដោយសារតែអ្នកកាន់ចង្កូតយន្តហោះរបស់ក្លិបអ្នកមានអង់គ្លេសមួយនេះ បានសង្កេតឃើញមានយន្តហោះមួយទៀតកំពុងនៅលើផ្លូវរត់នៃព្រលានយន្តហោះនោះរួចទៅហើយ។
Ashley Young និង Jonny Evans នៅព្រលានយន្តហោះ Manchester មុនហោះទៅអាល្លឺម៉ង់
យ៉ាងណាក្ដី យន្តហោះនោះបានចុះចតដោយសុវត្ថិភាពនៅក្នុងការប៉ុនប៉ងចុះចតលើកទី២។ ក្រោយកើតហេតុ អ្នកបើកយន្តហោះបានមកសូមទោសដល់ក្រុម Manchester United ផងដែរ។
ចំណែកខាងក្លិបវិញ បានបដិសេធមិនធ្វើអត្ថាធិប្បាយណាមួយជុំវិញហេតុការណ៍នេះទេ ខណៈខ្សែការពារ Rio Ferdinand បានសរសេរក្នុង Twitter របស់ខ្លួនថា មកទល់ពេលនេះ ខ្លួនទើបតែមានអារម្មណ៍ធម្មតាឡើងវិញប៉ុណ្ណោះ ក្រោយការចុះចតដ៏យ៉ាប់នៅអាល្លឺម៉ង់នោះ។
នៅយប់នេះ បិសាចក្រហម នឹងត្រូវជួបក្រុមម្ចាស់ផ្ទះ Bayer Leverkusen វេលាម៉ោង ២:៤៥នាទីរំលងអាធ្រាត្រ។ លទ្ធផលឈ្នះ នឹងនាំឲ្យក្លិបជើងឯងអង់គ្លេសមួយនេះ ជាប់ទៅវគ្គ១៦ក្រុមចុងក្រោយជាស្វ័យប្រវត្តិ។
កាលពីឆ្នាំ១៩៥៨ ក្លិប Man Utd ធ្លាប់ជួបហេតុការណ៍អាក្រក់បំផុតក្នុងប្រវត្តិសាស្ត្ររបស់ខ្លួន ដោយសារកីឡាករ៨នាក់ និងមន្ត្រីរបស់ក្លិប៣នាក់បានស្លាប់ក្នុងហេតុការណ៍ធ្លាក់យន្តហោះនៅទីក្រុងមុយនិច ប្រទេសអាល្លឺម៉ង់៕
David Moyes និយាយក្នុងសន្និសីទកាសែតមុនប្រកួតយប់នេះ
0 comments:
Post a Comment